جدرانٌ بنية ..
اثاث من الطراز الفرنسي القديم ..
لوحات غريبة مُعلقة ..
بعض الشمعدان ذهبية اللون ..
ارفف مكتبية كبيرة ..
هكذا كانت غرفة الجدة الكبيرة لعائلة البدري ..
" ليا "
فتشت الغرفة كلها ما خليت زاوية ما فتشت فيها .. ما لقيت شي !
كل شيء عادي مافي حاجة مثيرة للشك ..
التسريحة ؛ الدولاب ، البيانو البيجي في نص الغرفة ..و ..
في حاجة في الزاوية البعيدة للغرفة مغطية بغطى سيتان كبدي ..
سحبتو ظهرت مراية طويلة مزخرفة بالذهبي ..
وقفت قدامها ظهرت صورة لمرة شعرها زي شعري ؛ بتشبهني نوعا ما بس كبيرة في العمر .. ما كبيرة شديدة عمرها تلاتينات تقريبًا ..
ايوة دي انا وانا في عمر التلاتين !
ابتسمت حلاتي والله شكلي حلو
بس كيف المراية بتظهر المستقبل !
اشرت ليها بيدي .. اشرت لي بيدها
ابتسمت ليها ابتسمت لي ..
= هاي
المراية : ليا !
بسم الله الرحمن الرحيم اعوذ بالله من الشيطان الرجيم ..
غطيت المراية وجريت جري غرفتي .. من الخوف ما شوفت المسند القدامي ووقعت في الارض .. قفلت علي الباب و اتغطيت وانا برجف تحت الغطا..
دي شنو المراية دي ؟
مراية بتظهرك في المستقبل ؟
معقولة الذكاء الاصطناعي وصل لمرحلة يصنع مرايا مستقبليه ؟ وبتتكلم مراية بتتكلم !
ولا ده شنو مافاهمة !!
راسي جايط فكرة تودي وتانية تجيب .. كيف المرة الفي المراية قدرت تتكلم معاي ؟ هل الانا سمعتوا صح ؟ احس روحي بحلم ..
ما حصل سمحوا لينا ندخل غرفة ستو خالص .. بنقيف في هول الغرفة بس جوة ابدا ما بيسمحوا لينا ندخل !
بالنسبة لي بقى واضح سبب المنع .. ستو عندها مراية مستقبليه بتتكلم !
فكرت اكلم منو مافي غير تميم عارف اخبار اهلي وبقدر أتمنه على السر دة ..
فكرت اتصل ليه بس الوقت كان متاخر ..
خلاص ح استنا الصباح واكلمه ..
فضلت اليل كلو اتعوذ واعاين للباب كل دقيقتين .. خيل لي ان بت المراية تطلع وتجيني .. ما نومت من الخوف استنيت لغاية الصبح صليت ونومت ..
