📍تنويه :
" يرجى من الاطفال دون سن الخامسة عشر و اصحاب القلوب الضعفية ، الخفيفة ، الرهيفة تخطي متبقي الحلقات ابتداءً من هذه الحلقة 🧟♀️🔞 "
《 متابعة ممتتعة 》
___________
" ليا "
كان في وردة حمراء في فنيلتي السوداء .. طقمتها مع الخاتم السرقته من ستو امبارح .. شكلو حلو شديد في يدي .. شلت مفاتحي وطلعتا .. انا مدينة باعتذار لتميم فمشيت ليه المكتب .. بعد حاسبت روحي وراجعت نفسي لقيت اني غلطانة في حق تميم مش هو الغلطان في حقي .. لولا الكف ما كنت وعيت للي انا بعمله .. هو كان عايز مصلحتي وانا اتعاملته معاه باسلوب ما كويس وسمعتو فارغة كتيرة .. شلت معاي " فواحة "و نوع عطر لعربيتهُ متاكدة حاتعجبه وحايصالحني.. اصلا هو بحب اي شي ممكن يزيد حلاوة عربيته ..
بقدر ما بعرف ان تميم طيبان وحنين بس زعله كعب وبخوف .. فقبوله لاعتذاري وحصولي على رضاه مح يكون ساهل ابدًا.. متاكدة حايتعبني بس الا ما يرضى ♡
شافتني زميلته وانا ماشة اتجاه مكتبه سلمت علي بأبتسامة مصطنعة ..
زميلته : لو ماشة لتميم فهو ما موجود !
= لسه ما جا ! غريبة ما عادته يتاخر عن الشغل
_ هو سافر من يومين .. ما عارفة ؟
= سافر ! وين سافر ؟
_ ما بعرف تفاصيل كتيرة ..
= طيب ما مشكلة ، حاتصل ليه اعرف منه شكرًا ليك ..
اتبادلنا ابتسامات مصطنعة ومشيت بيته .. لقيته ماف !
نانا : قال مسافر لشغل ..
= مسافر وين يعني ما فاهمة وشغل شنو ؟ اصلاً شغلو كلو جوة تايستي
نانا : والله يا ليا انا ما سالتو كتير .. شال شنطته وسافر
= وما قال ح يجي متين ؟
صوت من ورانا : حسب كلامه جاي بعد اسبوع
اتلفت اتجاه الصوت كان راجل على مشارف الخمسين طويل ، عريض ، اسمر ، اشيب الراس والحية .. ابتسم لي وجا سلم علي وقعد
عبدالماجد " ابو تميم " : غريبة انك جاية تسالي عن تميم ، نحنا بنعرف اخباره منك .. حاصل شي بينكم ؟
سكتا وما عرفت ارد .. عمو عبدالماجد فهمني وغير الموضوع بهدوء وذكاء : شايف البطولة السنة دي حاتكون برا جامعتكم
استغربت : كيف برا الجامعة !؟
= حسب المعلومات الوردت مؤخرًا ان المدير الجديد رفض تتعمل في الجامعة وده السبب الخلاها يأخروها شهر .. هو كان اسمه منه العميد الجديد ؟
_ عبدالصمد ..
= الوالي ؟ عبدالصمد الوالي ؟
_ ايوة ..
