ماريونت

11

   " تميم "

استغرابي للكديس البتكلم كان اقل من استغرابي ب "ايجا " القرية الجابتنا عليها حور على اساس نلاقي شيخ يرقي ليا ..

اتفاجئنا انها خالية تمامًا من البشر!

الشوارع و البيوت فاضية تمامًا الا من الكدايس و الحيوانات الموجودة في الزرايب .. عاينت لحور اللي كانت بتتلفت باستغراب ..

نانا : متأكدة جيتي المكان ده قبل كدة ؟

حور : متاكدة كنا هنا وانا عناب قبل فترة بسيطة شديد ..

جاتني : لمن قولت ليك اني حاسافر وعايزاك تكلم بابا انت على اساس مسافرين سوا .. انا جيت هنا وانت مشيت المنتجع قعدت هناك يا تميم

نانا عاينت لي : يعني انت ما سافرت في شغل ؟

حور بتوتر : لا ؛ انا طلبت منه يعمل كدة

نانا : ليه ؟ وليه اللف والدوران ده كله ؟

قاطتعهم : ما اعتقد ده وقت نناقش في اي شي غير وضعنا الحالي .. وين مشت الناس وليه القرية دي فاضية .. معقولة مافي انسان واحد ساكن في البيوت دي ؟ الحيوانات دي بتاكل وتشرب معناها في حد بجي باكلها ويشربها .. والشوارع نظيفة باين ان في حد موجود " اتلفت عليهم " او دي بلد مسكونة انا بقيت ما فاهم " عاينت للكديس الواقف جنب نانا" وما مستبعد اي شي !

نانا : خلينا نقعد في ضل لغاية نعرف الحاصل ..

صوت خافت : وين نحنا ؟

اتلفتا عليها كانت ليا شكلها صحت وبتعاين بشباك العربية اتجاهنا نحنا الواقفين برا ..

مشيت عليها بسرعة : انتي كويسة كيف حاسة ؟

وقبل ترد لي صوتها اتغير : قولت ليك ابعد عنها اسمع الكلام والا حاحرمك منها طول عمرك

نانا جرتني وهمست لي : تميم امشي شوف اذا في حد في البلد دي .. وخلينا انا وحور وعناب مع ليا

عاينت ليها ..

ربتت على كتفي : ما تخاف عليها مح يحصل شي ..و سوق معاك " همام " وعاينت اتجاه الكديس ..

حور باستغراب : همام منو يا نانا ؟

ابتسمت ليها بهدوء : ده كديس ليا يرفقوا احسن من يمشي براهو ..

زحيت منها : بمشي براي ..

نانا بنبرة حاذمة : امشي مع همام احسن من تمشي براك .. المكان فاضي و نحنا غريبين عن المكان ..

بضيق : كويس

عاينت ل" ليا" اللي رجعت لطبيعيتها بمجرد ما بعدت عنها ! .. نانا وحور كانوا معاها عاينت اتجاها بضيق ومشيت افتش على بني ادم ولا بني جن زاتو في المكان ده .

كل شي كان هادي و نظيف ..

القرية في شكل قطاطي حديثة باين ان المهندسين كلاسكيين و مودرن في نفس الوقت .. القطاطي مصفوفة في شكل مستقيم عشرة ورا عشرة وفي سوق في النص وساحة كبيرة ..المحلات و الخضروات فاتحة .. ومافي اي بايع ولا صاحب محل ولا حتى حرس ساي يحرسه كانهم متاكدين تمامًا انو مستحيل زول يقرب منهم معقولة ما خايفين من الحرامية ؟ او ما عندهم حرامية ؟ طبعًا لو افترضنا اصلاً العايشين هنا بشر !