" خطة إنتقام .."
الشقه كانت حلوه شديد
في غرفتين و صاله كبيره
و كل غرفة فيها حمام كبير
حقيقي كُنت مبهورة
المطبخ كان ديكورو حلو شديد
فتحتا الثلاجه كانت مليانه اكل
و عصير و مويه
طلعتا الصاله قعدتا و ما كنت عارفة حا اعمل شنو
حسيت انو انا في مكان غريب تماماً
و الخوف متملك قلبي
فجأه الباب فتح
دخلت شابه و كانت ماسكه شنطه كبيره
بتجر فيها و بتاخذ في نفسها بصعوبه
قمتا و دخلتا معاها الشنطه
عاينت لي و كانت بتضحك
_اخخخ،تعبتا شديد و الله.. انتى منو يا حلوه؟
ميرال:انا ميرال
بيان:و انا بيان
#فلاش_باك :
أذكركم ب بيان في البارت الأول :
شابه في منتصف العشرينات، قاعده في مطعم في ضواحى قطر
بواحده من يدها ماسكه قلم و بتعاين للدفتر
و بيدها الثانيه بتلعب ب شعرها
كانت بتكتب و مندمجه جداً في الكتابه
قاطعها صوت
_لو سمحتي ممكن تخفضي صوت الاغاني
بنظرات مُبعثره
طلعت السماعة
بيان:عفواً؟
_صوت الاغاني.. عالي
بيان:اوك
بيان قفلت الأغاني و كانت بتعاين حولينها
المكان كان مليان ناس
بيان:حقيقي بكرهه الناس
طلعت من المطعم بعد دفعت حساب القهوه ال أصلاً ما شربت منها إلا شوية
على بُعد شارعين دخلت مبنى متواضع
و طلعت الطابق الثاني
فتحت الباب و كان البيت جايط
بيان:حبيبي وين انت..دايماً بتعمل كده، كم مره قلتا ليك ماف داعي نجوط الدنيا كده
دخلت الغرفه و لقت شاب قاعد في طرف السرير و في يدو لعبة سيارات
فضلت واقفه جمبه باب ال غرفه و بتعاين ليهو بحزن
صح كان شاب كبير في الشكل
بس كان صغير جداً في العقل
بيان:كيف عملو فيك كده.. انت ما تستاهل تكون محبوس في الغرفة دي، انت مفروض حسي تكون بتطلع و تدخل.. متعرف على بنات حلوين..مفروض يادوب تعيش حياتك و شبابك، بس ما مشكله كل زول كان ليهو يد في الحاصل فيك حسي ح يتحاسب
