" بداية جديدة .."
أول ما ركبتا الطياره
كان قلبي بضرب سريع
كُنت حاسه بخوف ما طبيعي
قعدتا و قعد جمبي واحد
ما كُنت مركزه في شكلو اصلاً
كُنت قاعده جمبه الشباك
مبهورة بشكل السحاب
و مبهورة بفكرة انى فوق في السماء
إتمنيت مرام معاي في اللحظه دى
و إتمنيتها تكون شايفه كل ال بشوفو ده
غمضتا عيوني و كنت بس بدعي
يا رب نتلاقا في يوم
و يا رب تكون حسي كويسة
بعد زمن طويل وصلنا
و أثناء ما انا واقفه عشان أنزل
الولد ال كان قاعد جمبي كان واقف قدامي
نزلنا و هو عاين لي
_حمد لله على السلامه يا ميرال
لمن قال اسمي قلبي وقف
عاينت ليهُ بإستغراب
و ما كان منتظر ارد ليهُ
خلال دقايق إختفى من قدامي
حاولتا اتذكر أى حاجه ممكن تكون حصلت تخليهو يعرف اسمي
بس انا كنت ساكته الوقت كلو
اخذتا نفس و حاولتا أهدى
دخلتا الحمام بعد كملتا كل الإجرأت
طلعتا ال تلفون ال جابو لي و دخلتا ال شريحه
كان رقم قطري
أول ما دخلتها جاتني مكالمه
من رقم مسجل ب متوكل
رديت ليهُ و قال لي انا بره و فعلاً طلعتا
و ما كنت عارفه هو عامل كيف
بس هو عرفني و جا عندي
متوكل:ميرال صح
ميرال:ايوا
متوكل:حمد لله على السلامة
ميرال:الله يسلمك
اخذ شنطتي و ركب العربيه
أنا قبل اركب لمحتا نفس الزول ال كان ناداني ب اسمي جوا
إبتسم لي و ركب عربيه و اتحرك
متوكل:في حاجه يا ميرال؟
ميرال:لالا
ركبتا و حاولتا م اركز مع الموقف الغريب الحصل ده
طلعتا الدفتر
كنت كاتبه فيهُ العنوان
بس أول ما قلتا ل متوكل اسم الشركه قال لي م يحتاج توريني وين
