#راهب_ابو_غضب -
#البارت 45 -
يگشاية بالراگ وچلبت بيك
يطين الجنه مدري شردت احاچيك
يراي المستحي وسالوفة اعيون
اندهلي بعد خل التفت ليك
يسنبل وانحصد بيدين فلاح
ماودة يبيعك وده يشريك
يلون الماي واصفئ،،ويخبط الماي
ماتخبط واعرفك ضايج اشبيك
اذا خلگك يضيگ شويه مرات
دصيح وشوف وجهي اشلون مااجيك
يدين المستحه بملوحة الهور
شايف طينتي شتريد اراويك
يروحي وكلشي بيه وكلشي مابيك
قارنتك بروحي وماساويك
يالحاسب احساب الشوفتك عود
اشبگنك واشمك من الاگيك
،،،،،،،،،
راهب ابو غضب ج2
،،،،،،
لارا،،ضيگ عيونه وسالني
همام،،م موافقه علئ شنو?
لارا،،ادري عرف قصدي بس يريد يتاكد
احس الكلام وگف بحنجرتي وصار اصعب
گتله بصوت متلعثم
ع علئ طلبك
بمجرد ماسمع كلامي لمعت عيونه ونهض من مكانه الفرحه ماسايعته
مسح وجها بثنين ادي ورفعهن رجع شعرة لورة
رجع كعد يمي مامصدگ ومبين من فرحته ضاع الكلام منه ومايعرف شنو يتصرف
عكسي تماما بمجرد مانطقت الكلمه اتملكني الشعور بالندم حسيت نفسي اتسرعت
بس خلص لازم اخطي خطوة لكدام
خطوة تغير من حياتي
همام،،لاراا احبج احبج والله مامصدگ اتمنئ ارگص من فرحتي
لارا،،فقد يحجي بصوت عالي بدون وعي اتقربت منه سديت حلكه قبل لايفضحنه
بقه صافن بوجهي واني حسيت بروحي ابتعدت وهو ابتسم
كور ايدة وضرب صدرة مرتين يمكن هاي حركته المعتادة من يشوفني
همام،،الصبر ياربي
لارا الاسبوع الجاي يجوكم اهلي
ماضل شي للتخرج هسه خطوبه وعقد سيد وبعدين المحكمه والعرس
لارا،،همام ل لتستعجل ترة حتئ اهلي ماعدهم علم
بس
سكتت ماگدرت اكمل
همام،،بس شنو?
لارا،،اهلك
همام،،اشبيهم اهلي
لارا،،متاكد موافقين?
همام،،لارا خلينه بفرحتنه لتحجين هيج مصيرهم يوافقون لان لو انتي لو ماكو زواج طول العمر والله لخليهم يملون مني ويزوجوج الي غصب عنهم
لارا،،اتصنعت الابتسامه وهو احتار شيسوي
صار وقت المحاضرة وهو گاعد الفرحه ماسايعته
تركته وتوجهت للقاعه العبرة خانگتني
بعدنه بالبدايه وحسيت نفسي وگعت روحي بمصيبه ثانيه بسبب استعجالي
ااخ ياراهب حبك دمرني خلاني اتصرف بدون وعي
بس غصب علئ گلبي اتمرد علي واعاندة يختار غيرك حتئ ينساك
ابتدة المحاضرة وانتهت واني بوادي ثاني هايمه
مااعرف الشي السويته صح لوغلط وشنو الراح يصير
مر اسبوع وتعبت نفسيتي الابعد الحدود معاندة روحي مااريد اتصل واسأال عنه
محمد جابلي خط جديد مارجعت من الارقام القديمه غير رقم سارة وسوالي صفحة جديدة غير ذيج لان حاضرة راهب منها
بليل مالگيت نفسي غير اتصلت بيها اسأل عن اخبارة
لان هذا حدي مااگدر مااسأل
ارتاحيت من گالت حالته الصحيه اتحسنت ورجله خف الورم بيها
من فرحتي وگعن دموعي ويه ضحكتي
شي بداخلي ارتاح وخف تانيب الضمير
نهيت المكالمه وياها
اتمددت وكالعادة ادخل علئ حسابه احجي ويه صورته
لگيته ناشر مقطع اغنيه قبل ساعه
وكاتب جواها بيت شعر
ولك ردناك بس النه
شكثر جينه وترجعنه
شكثر دگينه بالبيبان
لسه ولون بيبانك بااصابعنه
اقرة وانقهر كعدت ضربت علئ راسي مرتين
كاافي ماناوي تشيله من تفكيررك كاافي شليتني انته وگلبي ماناووين تنسون وتريحوني
اشلوون انسااه وعقلي يحثني ادخل لحسابه حتئ اشوف صورته وارتاح
اشلون انساه وگلبي يكلي تحبي وتضحكين علئ نفسج بالنسيان
لزمت رگبتي مختنگه دخييلك ربي
الف مرة اترجيتك تشيله من بالي
لعد ليش ماجاي انساا واكرهاا ليش?
يوميه اكتشف حبه بگلبي يززيد ماينقص
بس كرامتي كلشي ولاكرامتي هانها وداسها بدون رحمه لو اعرف اشلع گلبي واشمرة ولاارجعله واذل روحي
ثاني يوم داومت ومبين عليه التعب احسها اطول سنه بعمري خلصتها تعب وقهر حتئ اكثر من السنه الفاتت ويه راهب
ماصدگت تنتهي المحاضرات وارجع للبيت
طلعت من الجامعه رجعت للبيت تايها
هوسه داخل عقلي افكاري مخربطه مااعرف تصرفي صح لوغلط واستعجلت اتخذت قراري بسرعه
العصر جنت كلش مترددة منين ابدي وشحجي
امي تلف دولمه ومحمد عينه بموبايله
جليت صوتي گتلها ماما
عندي موضوع اريد احجي وياكم
محمد ترك موبايله عدل گعدته منتضر يسمع كلامي وامي مل مهتمه وهي تلف گالت شكو?
حجيتلهم موضوع همام انو اتقدملي
محمد ماحجه وامي گالت
سعاد،،لازم نسأل عليهم خو موانطيج ويطلع هلمرة ثارة اقوة يمكن يذبحنه
لارا،،ابتسمت بااستهزاء امي بعد فوات الاوان تريد تسأل من اتقدملي راهب ماقبلت واحد من اخواني يسأل عنه كل همها جان المنصب والفلوس
هسه صارت حريصه بعد ماضيعتني بسبب طمعها
محمد،،انتضري يمه
لارا،،التفتلي وكمل كلامه
محمد،،مو استعجلتي بقرارج ?
لارا،،دنگت ماعندي جواب
محمد،،لارا انتي حاليا مطلقه وماصارلج سنه من اطلگتي
وحالتج الصحيه تعبانه يعني انتي تشوفين هلشي مناسب الوضعج ?
