السيره النبويه العطره

هذا الحبيب 52

5️⃣2️⃣
#السيرة_النبوية ❤️

" حادثة الإفك " لحظات صعبه علي النبي ﷺ والسيده عائشه
ونزول البراءه من فوق سبع سماوات 💖

💢شفنا الحلقه إلى فاتت النبى عليه الصلاه و السلام و هوه بيحاول يعمل رأى عام عشان يقدر يعاقب سلول المنافق ، و بدأ يسأل اكتر من حد عشان يضمن ان فى ناس مأيداه فى تبرئه السيده عائشه..
النبى حزين ان حد مس حبيبته بكلمه و عائشه ميته من العياط عشان مش قادره تتخيل ان ممكن حد يفكر انها تعمل شئ يمس حبها لرسول الله.. و مش مصدقه انها حطته فى موقف صعب بالشكل ده ..
والوحى بينزل على رسول الله بالآيات بس مفيش شئ يخص موضوع عائشه و الازمه تستمر لمده شهر ..

💢طيب النبى عمل رأى عام و هيقف دلوقتى على المنبر ويبدأ يواجه الناس بالآراء الى معاه ويحاول أنه يكسب الناس فى صفه و يقف النبى على المنبر ويقول : أيها الناس إن هناك رجلاً بلغ أذاه الى أهل بيتى ووالله ما علمت عن عائشة إلا خيرا ( هو بنفسه بيبرأها فده أكبر دليل أنه مكنش مصدق الكلام ده) ولقد ذكروا لى رجلاً من أصحابى (يقصد صفوان بن المعطل) وما علمت على صفوان الا خيراً (وكمان برأ صفوان ، يعنى النبى مش مصدق أن هما الاتنين يعملوا كده وبرأهم الاتنين) ..

و يكمل النبى كلامه و يقول : أيها الناس والله إن صفوان كان لا يدخل البيت الا معى ( بيقولهم كده علشان الكلام الى اتقال أن صفوان كان بييجى لعائشة البيت والنبى مش موجود .. شوفتوا الموقف الصعب الى اتحط فيه النبى.. اضطره انه يتكلم لحد تفاصيل صعبه ازاى !! 😢 ) ...
❤️ياحبيبي يارسول الله ❤️
فسيدنا سعد بن معاذ مش قادر  يستحمل الكلام ده فقام وقال يا رسول الله فداك أبى وأمى وعِرضى إن كان هذا الرجل من الأوس (لأن سعد أوسى) مُرنى آتيك برأسه وإن كان من إخواننا من الخزرج فمرنى أفعل ما تشاء ..
( اصل المنافق بن سلول يبقى خزرجى ..فسعد نسب الأمر للنبى .. عشان يبان ان سعد قتل بن سلول الخزرجى تنفيذ لأمر النبى فبتالى مش هتحصل مشاكل بين الاوس و الخزرج )

فقام واحد تانى اسمه سيدنا سعد بن عُبادة ( وكان خزرجى بس هو هيحصل منه تصرف مش صح عشان خدته النعره القبيليه فحيقوم يرد على سعد بن معاذ و يقول : كذبت يا سعد بن معاذ ، فأنت لا تستطيع أن تقتل رجلاً منا فأنا سيد الخزرج .. فيقوم واحد تالت اسمه أُسيد بن حضير (صاحب سعد بن معاذ .. وكان أوسى برده)
فقال يا سعد بن عُبادة : كذبت أنت منافق تدافع عن منافق (أكيد يقصد ان مدام بتدافع عن سلول يبقى أنت اكيد زيه !) و كلمة من هنا و كلمه تانيه من هنا فقامت خناقه ... والنبى مش ناقص ﷺ.. فنظر اليهم النبى ودمعت عيناه ..

و راح قايل : أبدعوى الجاهلية وأنا بين أظهركم ؟ (هترجعوا للجاهلية وانا فى وسطكم) اسكتوا اسكتوا ما لهذا جئت.. ما لهذا جئت.. فسكتوا ونزل من على المنبر يبكى ﷺ..
و دخل الى بيته ..(بأبي انت وأمي يارسول الله😢)