المتدينة 🤎✨🖇️

الحلقة 1

بعد بسم الله الرحمن الرحيم 💙
اميمة :
نضت الصباح على 6 هكداك باش نصلي الفجر ماشي روطار مي الاذان عندنا راهو يأذن قبل وقتو صافي الناس لي يصلو فهداك الوقت مادارو والو ستنيت نص ساعة بعد الاذان و نضت خرجت رحت للصالدوبان كنت خايفة بسك عندي تخيلات كبيييرة و واسعة هه بديت نقرا فالقرآن حتى لوين لحقت و شعلت الضو سميت بالله و توضيت كي كملت مامسحتش هداك الما بسك يقولو من المستحسن ماتمسحوش راح يغسلك الذنوب رحت لبيتي البالكون كان مفتوح و جنا ساكنين فباطيمة ايتاج 5 حسيت بواحد البرودة يا يماا غلقت التقة ديراكتومو جبدت سجادتي و طاقم الصلاة من الخزانة و جبدت خاتم التسبيح صليت و دعيت كملت سبحت
و جبدت دوزاني نراجع بسك صباح هكدا نحس روحي نراجع الاز يمكن لأنو عقلي يكون فارغ و هاد الشي يخليني نستوعب المعلومة بالخف ، بقيت نراجع و نلخص باش تسهال عليا الحفاظة زيد هاد العام عندي باك ، ويي عندي باك عاودتو بسك كي جوزتو الخطرة اللولة جبتو ب14 وانا حابة نكون طبيبة و هاد المعدل مايكفينيش صافي عاودتو
جات 7 نضت وجدت روحي لبسة عادية حجاب ازرق و خيمار باج و بسكات بيضة و رحت ديرلكتومو لليسي قريت عادي مي فالحصة الدوزيام طولت الشيخة جلتنا المراقبة و كان قدامها واحد الجان يبان فالعشرينات هكداك ما اهتميتش بيه الصراحة لأنو كيما قلتلكم خاطيني هاد الصوالح مي قعت غير شويااا بديت نسمع البنات يتهامسو عليه ايه الله غالب هدي هي كلاصتي مايهتموش بالقراية قد مايهتمو بالداخل و الخارج نطقت المراقبة اخيرا بعد ما سكتت الفوضى لي كانت و قالت : هدا التلميذ الجديد لي راح يقرا معاكم قالتنا بلي اسمو زيد الدين و جا من ولاية وحدخرا يعني تغيير ولائي رحبنا بيه كإحترام
انا كنت قاعدة وحدي قالتو روح اقعد مع اميمة، شوكاتني نطقت انا
اميمة : ااا استاذة نن ماكلاه انا طفلة ماقعدتش معاها حبيتيني نقعد مع طفل استاذة راكي تعرفيني و تعرفي طبايعي و بلي نكره هكدا حاجات نتمنا تحترمي قراري و تخليه يقعد فبلاصة خلاف
المراقبة : اكك خلاص
زينو :
نضت صباح على يما لي كانت تعيط مع صباح ربي و تقولي بلي راني روطار من بداية العام ووو نضت غسلت وجهي لميت دوزاني فالكرطاب ديجا فهدوك برك درت الروطار كانو مزربعين ڨاع حبطت كليت هكداك غير باش مانروحش كرشي فارغة و رحت لليسي ، انا بدلت ولاية علاجال الخدمة تاع يما بسك كيما قلتلكم تخدم استاذة صافي بدلوها المهم راطيت الحصة اللولة الحصة الدوزيام دخلت مع المراقبة البنات شفتهم ڨاع يتهامسو غير وحدة كانت قاعدة التالية من جيهة التقة ماكانتش ڨاع محلبتني المهم حتى رحبو بيا باش طلعت راسها و رحبت بيا حتى هي قالتلي المراقبة روح اقعد معاها شفتها كي شغل ماحبتش على عكسي انا ابخي نطقت و علابالكم واش قالت لتما تقبلت المراقبة هدرتها نوضت واحد الطفلة كانت قاعدة وحدها قعدتها معاها و انا رحت قعدت فبلاصة هديك لي ناضت بداو يجو الاساتذة عانيت من لي كاستيو تاوعهم مي ماعندي ما نقول كملو السوايع الصراحة عجبني الحال و تأقلمت مع هديك الكلاصة بالخف مالڨري انا معاود و هوما صغار عليا مي عقليتهم كانت مليحة الصراحة ماشي تاع اطفال ....
نهاية الحلقة نتمنا تكون عجبتكم رايكم فيها 👈🦋 تفاعلوووو 💕😍
لووووف يووو💞💞💞