⛔"L'amore" غير مباح⛔
الفصل الثاني: اللعب مع الكبار🔥
نهار جديد و على طاولة الغداء .. فالجردة ورا الباب الامامي دالمزرعة، كاينة جليسة مشمسة .. لابيسين جنبهم و الاشجار و الورود محاوطينهم، طاولة دائرية ممتلئة بكل ما لذ و طاب .. و الجميع جالسين عند الطبلة كياكلو بهدوء
سرية: (تنهدات و شافت فعابدين) مرتك فوقاش غتجيبها؟
عابدين: (شاف فيها بجدية) اليوم غانمشي موراها، هاد الايام عييت معاها و مابغاتش تجي گاليك كاتسنى باها يجي تدوي معاه و منها تشم ريحة ماماها فديك الدار و لكن دابا جا وقت ترجع فحالها، تا قرايتها غانصيفطها تبداها
سرية: جوج سيمانات و هي بوحدها .. انا اجلت الحفلة اللي عندي على قبلها تا تفوت الربعين د ماماها و تقدر تحضر لشي حفلة تفوج شوية مسكينة
عبد الحي: (تنهد) صعيبة عليها هاد الحالة!
شاف فيه عابدين بصمت، مجاوبوش و محاولش يديها فكلامه عليها .. حتى تحنحنات ميادة كاتشوف جيهت مهيار و همسات بخفوت
ميادة: مهيار بليز انت خارج تقدر توصلني معاك غانتلاقى واحد صاحبتي غير قريب
مهيار: (كياكل ببرود) هزي طموبيلتك
ميادة: بليز عفاك راه مافيا مانصوگ
مهيار: (شاف فيها بجدية) شكون يجيبك؟
ميادة: نجي فطاكسي!
عقد حواجبه و كمل ماكلته ببرود
مهيار: فاش نكون راجع لا كنتي مزال مادخلتي نجيبك معايا
تبسمات بفرحة .. قلبها كايتراقصو فيه الفراشات و هو ساكت و جامد، حتى تنهدات سرية اللي راقبات حركاته و ملامحه و قالت بجدية
سرية: اشنو مزال مقلق؟
مهيار: (شاف ناحيتها) شنو؟
سرية: جوري ماعاوداتش دارت بجيهتك!
مهيار: (ببرود) خليها خدامة
سرية: بغيت غير نفهم اش طرا! فرمشة عين تبدلتو! كانت عزيزة عليك و...
مهيار: (قاطعها بجدية) ماتجبديش سيرتها هاد الساعة!
هزهزات كتافها و شافت فالكل كدوي بهداوة
سرية: و لكن مزيان صراحة تعرف حدها، ديك الخطرة مللي صيفطتيها معانا انا و عائشة .. خسرات الفلوس فحال شي مهيفة، بانتليا طماعة بزاف مكاينش شي حاجة ماشراتهاش و كانضن خدات تليفون حتى هو!
مهيار ناض وقف عاقد حواجبه و شاف فيها بحدة
-براكة من النميمة فعباد الله!
دار خارج فحاله .. حتى وقفات ميادة مزروبة
ميادة: غانجيب صاكي من البيت و نجي عندك امهيار واخااا!!
مجاوبهاش كمل طريقه بصمت و برود .. حتى ضرب الدورة للجهة الثانية، توقف فالجنب لبرهة من الزمن و صغر عينيه فيها!
أنت تقرأ
l'amour (غير مباح)
Romanceإستعداد، Ready، إنطلاق 🎬 فنظركم شنو هو مدى تأثير الفلوس على حياة الإنسان؟ كانت عايشة حياة هادئة، قابلة عليها بتقلباتها و صعوباتها و كاتخبط مع مواجها باش تنجى من عقايبها، كانت عايشة بلا ماتعرف أش كايساينها فالمستقبل حتى صادفاته فطريقها "زعيم الذياب...
