عشق اولاد الراشد 3 (احفاد الراشد)

الفصل الرابع

If you want to know someone's mind , listen to their words.
If you want to know their heart , watch their actions...

اذا كنت تريد أن تعرف عقل شخص ما استمع لكلامه ، واذا كنت تريد أن تعرف قلبه شاهد أفعاله...

__________________________

قعدت مصدومه من كلامه و متنحه قدمها من غير ولا كلمه ، دخلت عليها عزيزه :

_اي يا ختي هتفضلي مكانك كده كتير ما تقومي تعمليلك حاجه بدل ما انتي ملكيش لازمه كده زي امك، ميجيش من وراكو غير المشاكل و بس .

ادايقت مي جامد من طريقه كلمها علي مامتها :

_متتكلميش عن ماما كده لو سمحتي .

وسبتها و راحت علي اوضتها وقفلت الباب ورها جامد :

عزيزه قعدت تصرخ بره الاوضه و متعصبه اوي:

_بقا كده بتردي عليا يا بنت شمس بس اما ابوكي يجي أما خليته يربيكي علي قله ادبك دي مبقاش أنا عزيزه.

بعد ما دخلت الاوضه فضلت قاعده علي السرير تفكر في كلام مراد تروح عنده الشقه ولا لأ ؟! ...هي كانت قلقانه منه في الاخر قررت حاجه ، بس ازاي هتنفزها؟!.. ، شويه وخرجت من اوضتها وراحت الصاله عند عزيزه ، كانت قاعده بتسمع التلفزيون ، اتكلمت مي وهي باصه في الارض:

_انا اسفه .

بصت عليها عزيزه وهي مستغربه :

_و ده من ايه انشاء الله ....؟!

بصتلها مي و هي بتترجها عشان تعرف تنفز خطتها في الخروج من البيت:

_عشان خاطري ما تقوليش لبابا و انا هسمع الكلام و هعمل كل الي تطلبيه مني والله .

بصت عليها عزيزه و هي شمتانه فيها:

_ ماشي يا ست مي مش هقوله حاجه ، بس تنزلي دلوقتي المضيفه الي تحت تنضفيها تخيها مرايا تشوفي وشك فيها .

مي بسرعه:

_حاضر هنزل انضفها حالا.

عزيزه بكره :

_يالا غوري من وشي، جتك البلااا في شكلك.

نزلت مي تحت وهي بتواسي نفسها علي الي بيحصلها من مرات ابوها :

_معلش استحملي لحد ما تعملي الي انتي عاوزه  يا مي، استحملي عشان خاطر ماما عشان تعرفي مين حرمك منها، وتخدي حقك و حقها من الي عمل كده .

بدأت مي تنضف الاوضه لحد ما رجليها جت بالغلط علي شئ بارز تحت السجاده، قعدت علي الارض ومسكت رجليها عشان وجعتها من الضغط علي الشئ البارز ده، بعدها بصت علي الشئ البارز ده بإستغراب:

_اي ده......؟!!

رفعت السجاده اتفجأت ان الشئ ده عباره عن مقبض صغير، بصت بإستغراب رفعت السجاده اكتر لقيت ان ده باب في الارض، و البروز ده عباره عن مقبض الباب ،قربت بفضول منه، وحاولت تفتحه، اتفتح فعلا معها سحبته لفوق، لقيت سلالم نازله لتحت و نور خفيف جاي من تحت، في الوقت ده فضولها هو الي كان بيحركها ،نزلت علي السلم جوها خوف وفضول في نفس الوقت تعرف ايه المكان ده، الي اول مره تشوفه او تاخد بالها اصلا من الباب بتاعه ، وصلت تحت، وفضلت تبص للمكان حوليها ومستغربه كميه الصناديق حوليها  و حجمها الكبير  وكان في تربيزه صغيره في ركن قربت  منها، لقت كميه صور كبيره في منها عليه علامات، و في لأ وهي بتقلب في الصوره لقيت صوره مراد استغربت  من وجدها، وبعده لقت صوره مامتها وعليها علامه، سابت الصور مكنها ومسكت الورق ودي كانت الصدمه الورق ده كان عباره عن صفقات لتجارات كتير غير مشروعه ، اتخضت وحطت الورق مكانه تاني وهي مرعوبه ، طلعت جري علي السلم وقفلت الباب بتاع القبو ده ، و رجعت كل حاجه مكنها وطلعت بره الاوضه ، لكن اتفجأت ب باباها واقف ورها  ،بصتله وهي مصدومه :