ငါ့ရဲ့ နူးညံ့တဲ့ချစ်ဇနီးလေးဘယ်ရောက်သွားလဲ

Chapter 7

Chapter 7

ထိုညက ရှဲ့ယွင်နန်သည် အလုပ်အားလုံး အပြီးသတ်ပြီးနောက် ထုံးစံအတိုင်း အပေါ်ထပ်တက်ကာ သူ့အိပ်ခန်းထဲရှိ လူမမာကို သွားကြည့်လိုက်သည်။

ယနေ့တွင် ထိုလူမမာကို ဒေါက်တာဟူ ညွှန်ကြားခဲ့သည့်အတိုင်း Amino Acid အပါအဝင် ဆေးနှစ်ပုလင်း သွင်းပေးထားရာ မျက်နှာအသားအရေမှာ ယခင်နေ့ကထက် ပိုမိုအခြေအနေကောင်းလာတော့သည်။

သို့သော် ပိန်လှီကာ နာမကျန်းသည့် ပုံစံမျိုး ဖြစ်နေဆဲပင်။

“ညနေကျ ကြက်သားနဲ့ ထမင်း ချက်မလို့ မင်းလည်း အတူတူစားလေ ... စားလို့ရနေပြီဆိုတော့ ထမင်းကို နည်းနည်းလေး ပျော့အောင် ချက်ပေးမယ် ...”

သူက အိပ်ယာပေါ်တွင် ရှိနေသူကို ပြောလိုက်သည်။

ပထမဘဝတွင် သွမ့်ချန်ချင်းသည် လွန်စွာ မှတ်ဉာဏ်ကောင်းမွန်ခဲ့သည်။ အရာအားလုံးကို တစ်လုံးမကျန် အပြည့်အဝ မှတ်မိခြင်းမျိုး မဟုတ်သည့်တိုင် သာမန်သူများနှင့် နှိုင်းယှဉ်ပါလျှင်မူ အတော်လေး မှတ်ဉာဏ်ကောင်းမွန်သည်ဟု ဆိုရပေမည်။

ကျင့်ကြံရေး ကမ္ဘာတွင် နှစ်ပေါင်းရာနှင့်ချီကာ နေထိုင်ကာ စိတ်ဝိဉာဉ်ကို သန်မာစေရန် ကျင့်ကြံခဲ့သည့်အတွက် ... သူ၏ မှတ်မိနိုင်စွမ်းသည် ပိုမိုသန်မာလာခဲ့သည်။

ကာတွန်းကားများကို တစ်နေကုန် ကြည့်ထားပြီးသည့်နောက် ဝေါဟာရအချို့ကို မှတ်မိနေပြီ ဖြစ်သော်ငြား ထင်မိထင်ရာ လျှောက်မပြောရဲသေးသည့်အတွက် ရှဲ့ယွင်နန်ကို ပြုံးလျက်သာ ငေးကြည့်နေလိုက်သည်။

ဒီလူက သူ့ကို ကယ်တင်ခဲ့ရုံတင် မကဘူး .. သူ့ကို သဘောလည်း ကျနေသေးတယ်ဆိုတော့ ... သေချာပေါက် ဒီလူ့ကို ကောင်းကောင်းဆက်ဆံပေးရမှာပေါ့ ...

မြောက်များစွာသော နှိပ်စက်ညှင်းပန်းမှုတို့ ခံစားခဲ့ရသောကြောင့် အားနည်းဖျော့တော့နေသော အလှလေးက အပြုံးတစ်ပွင့် စွန့်ကြဲလာသည့်အခါ ရှဲ့ယွင်နန်၏ နှလုံးခုန်သံတို့ စည်းချက်လွဲချော်သွားတော့သည်။

ဒီပုံစံလေးက တကယ်ကို တစ်ခုခု ကျူးလွန်လိုက်ချင်စရာပဲ ...

သူ ငယ်ရွယ်စဉ် အချိန်များ၌ လွန်စွာ လှပသည့် အလှလေးတစ်ဦးနှင့် လက်ထပ်ချင်ခဲ့သော်လည်း ထိုကဲ့သို့သော အလှလေးများမှာ သူ့အတွက် စိတ်ကူးပင် မယဉ်နိုင်သည့် အိပ်မက်မျိုး ဖြစ်သည်။