#صراع_الجبابرة
بقلم #روز_الفياض
ج٥
هبة : اي احسن تحترين وتعركين معناها اتحسنتي .. خوفتينه عليج يمعودة .
ايوب : ها هسه للبيت لو للمستشفى ؟
شمه :لا مااروح مستشفى .. نزلوني هنا واني اروح للبيت ماله داعي التعب .
ايوب : تعبتينه خلص ..
حسيت بالفشله من جوابه .. جاي موصلني على اعصابه ..
حقه .. الرجال ميشوفني بالصراط المستقيم ويكوني بحجاية ويكعدني بحجاية انوب هسه يوصلني بهالحر والشمس للبيت ..
بقيت طول الطريق دايره وجهي لو مدنكة مستحية وفشلانه .. شلون شسوي هسه من انزل ؟
اتشكر منه لو اغلس ؟
بس عيب اغلس مو صح ؟
اي بس هو ميستاهل واحد يشكره لان ماعنده اسلوب ولايحترم ولايفكر بمشاعر المقابل من يحجي ..
وصلنه للبيت ونزلت هبه قبلي ..
ردت اغلس وانزل بس استحيت مو اخلاقي حتى لو هو ميستاهل ..
بعدين سترته عندي .
اتحركت اريد مديت ايدي انطيه السترة هو جان يباوع بتليفونه :
هاي السترة ..
التفت علي ومد ايده اخذها بدون كلام .
شمه : شكرا
جاوبني واحرجني :
شبي العطر ؟
التفتت عليه كتله:
نعم ؟
يشم السترة طلع سامعني من حجيت عالعطر مفوتها الي..
ايوب : معقولة العطر مو حلو؟
شمه : هاا ..
ظليت ابلعم مااعرف شرد ساعة السودة الحجيت بيها احس وجهي ظل ينطي الوان :
لا قوي شويه ..
ايوب : اممم .. الحمد لله عالسلامة
شمه : الله يسلمك
نزلت من السيارة بسرعة من فشلتي وهبه واكفة ومتخوصره وتخزر بيه .
دكيت الجرس بعدما سلمت على هبه وطلبت منهم يتفضلون للبيت بس مقبلوا ..
صعدت هبه بالسيارة يم استاذ ايوب بس بقوا واكفين متحركوا الا من دخلت للبيت .
ماما فتحت الباب واستغربت من شافتني :
ها اشو رجعتي ؟ خوماكو شي؟
شمه : لا ماكو شي .. بس الفلاونزا موتتني .
درت على هبه اشرتلها وراحوا واحنه دخلنه البيت .
من كد متعبانه بس خليت راسي عالمخده نمت ورحت بسابع نومة .
كعدت وره ساعتين من اتصلت هبه :
هلو
شمه : هلو هباوي
هبه : بشريني شلون صرتي ؟
شمه : الحمدلله احسن
هبه : اكول حب ايوب استاذ ايوب يكول باجر لتجي خل ترتاح كم لحد متصيرين زينه داومي.
شمه : منو هذا ؟ معرفته ؟ منه من الشيطان ؟
هبه : هههه لا ياناكره .. مو احتار بيج اليوم وطلع ورانه ورجعج للشركة وبعدين وصلج لباب البيت من صخنتي وحتى عصير طلبلج حرام عليج ..
شمه : اهوو مو على اساس مو هو السبب .. هسه خليني ساكته لاتخليني احجي عليه .
هبه : عمي الرجال بس حس بنفسه غلط بحقج اجه بنفسه اخذ العصير ووداه الج للمكتب وبعدين وصلج شتردين بعد ؟ هسه اله يعتذر اعتذار صريح ؟
شمه : المفروض
هبه : حرام عليج
شمه : اهوو خلص .. خلص .
هبه : هسه شنو تداومين باجر لو لا؟
شمه : لا اجي يمعوده بعدين يطلع مسويلي فخ حتى انطرد ..ماعندي ثقه بي ..
هبه : ههههههه شدعوه
شمه :كل الي يسوي وياي وتكولين شدعوة ؟
