#صراع_الجبابرة
بقلم #روز_الفياض
ج٣٦
رسالة الى ذلك الصباح الذي سيجمعني بك ...
متى تأتي ؟
.
.
.
.
ايوب ...
بعد موصلت امي ونور لبيت اهل شمه بقيت كاعد بالسيارة برة منتظرهم ..
مقبلت تحجي وياي بالتليفون حتى لخاطر نور ..
بقى تليفونها مغلق ..
الليل كله اتصل مغلق ..
اففف ..
قبل جنت من اضوج عالاقل ادخن هسه حتى التدخين ممنوع ...
ثاني يوم الصبح رحت للدوام شفت سرمد جاي ...
محاجيته ردته هو يفتح الموضوع ..
محجه ولافتح الموضوع فكتله :
اريد اروح اخطب شمه ... شوكت عندك مجال حتى تروح ويانه ؟
حسيته اتفاجأ كلي :
وانت مو مريض وينك ووين الزواج ووين شمه ؟
ايوب : حتى لو مريض انت تدري اني رايدها من الاول مااكدر بعد ..
سرمد : ادري دصير زين بالاول ..
ايوب : مااكدر ... صبرت هواي ..
سرمد : مو وكته هسه ... خلص علاجك واني اجيبلك مره معدله لامنى ولاشمه .. شمه شنو ؟
ايوب : ليش ؟ شبيها شمه ؟ شايف عليها شي ؟ سامع شي ؟
سرمد : لا لا بس يعني مو من ثوبك ... وحده بت فگر شوفلك وحده بت ناس عليهم العين ..
ايوب : شبيها بت فگر بالعكس اشوفها عدها عزة نفس ... ومنى شجانت هم بت فگر مو بت خير وشايفه وعايفه ؟ وشسوت بيه وشحصلت منها ..
سرمد : لا لا اني اشوفلك وحده مرتبه بس صير زين بالاول ..
ايوب : لا خلص مااريد غير شمه ... البارحة رحت حاجيت اهلها ..
وجهه ظل ينطي الوان بعدين كال :
اهووو شجلبت انت شلزكت شمه وشمه شدعوه هيج ذابح نفسك عليها شنو بس حلوه تره اكو احلى منها بالف مره ..
ايوب : وانت هسه ليش صرت عصبي .. بعدين انت تدري اني البنيه احبها ورايدها من الاول مو مسألة احلى منها واجمل منها ..
اني احبها ورايدها ..
مو تتذكر جبتها عندك شغلتها وامنتها ؟ ليش ؟ مو لان احبها ورايدها ؟
سرمد : اهوو هسه الا تخلينه نحجي ..
ايوب : شكو ؟ احجي مو سألتك اني اذا شايف عليها شي او سامع كتلي لا ؟
سرمد : اكو شي مردتك تعرفه ؟
ايوب : شنو ؟
سرمد : تره شمه هناابغداد .. رجعت لبغداد ودتشتغل ..
ايوب : شوكت ؟ شمدريك ؟ ووين تشتغل ؟
سرمد : صار فتره .. اتصلت بيه حتى اشوفلها شغل بس بشرط انت متعرف ..
ايوب : وتالي ؟
سرمد : شفتلها شغل يم ولد صديقي هم عنده مكتب طيران بس فشلتني وياه ... ظل يشتكي منها تنطي مجال للشباب الموجودين بالمكتب .. وطلعات وطبات .. حتى البارحة رحت حتى احجي وياها شسوت بيه وانت مالك علاقة وانت متستحي وانت وانت كلبت الدنيا وطلعتني اني الغلطان واني الموزين وسوتلي قصة حتى ايهاب اجه بالصدفة ومن سمعني احجي زعل عباله اني الغلطان بحقها وزعل وصار بينه حجي وصياح وهي ولاعبالك ...
ايوب : كل هذا يصير واني ماادري ؟
سرمد : مو كتلك البنية متفيدك انت مجلب بيها ... تولي اصرف نظر عنها واني اجيبلك العروس التستاهلك ..
ايوب : بس ايهاب كال انت متحرش بيها ؟
سرمد : ااني ؟ اي طبعاً يكول هيج لان هو ميعرف الموضوع شنو اجه بالنهاية وحكم من حجيها ..
ايوب : مو مشكلة اول وتالي راح اعرف بس هسه اريد اعرف انت شلون تضم علي كل هالحجي ؟
سرمد : شضام عليك ادري انت مو صرفت نظر عنها ؟
ايوب : حتى ولو... صرفت نظر بس اني احبها ... المفروض تكولي برجعتها حتى لو هي متقبل .. مو صح ؟
سرمد : وترجع من جديد الدوخة والاذيه وانت تعبان ومريض ؟ لا اخذها مني نصيحة هاي البنية متفيدك ..
ايوب : ماكو واحد يبقى مصر على هيج رأي الا اذا شايف شي او مجرب وياها وصادته ..
سرمد : لا مشايف شي بس كتلك الولد صديقي كلي البارحة عليها ومستحيل هو يكون محاول وياها يعني .. لان هو اصلاً رجال متزوج ويحب مرته ومقتنع بيها .. وماعنده هيج سوالف ..
ايوب : امم ... مو مشكلة اني راح اعرف شمسويه متصعب علي ..
سرمد : بس تريد الصدك اني هم حاولت اجسلك نبضها من جانت عندي وحسيتها مو مضبوطه ..
ايوب : شلون يعني ؟
سرمد : يعني بس واحد يضغط عليها ترخه .. تنطي مجال ..
