#صراع_الجبابرة
بقلم #روز_الفياض
ج١٣
وها هو صراع جديد يبدأ ..
مابين جبابرة المال .. ومامن ضحية فيه غيري ..
.
.
.
.
.
وصلني للبيت بس من وصلنه بقيت كاعدة بالسيارة خفت انزل ..
ايوب : شرفي ست ..
بقيت متحنطة بمكاني شلون انزل بحالتي هاي بالله امي شافتني شكوللها شبيه ؟
همزين الدنيا بدت تصير ظلمه والشمس غابت عالاقل محد من الجيران ينتبه ويشوفني جايه بهاي حالتي وجماله واحد غريب موصلني بالظلمه ...
طلع جكارة وبدا يدخن ..
بديت اكح .. فتح الشبابيك وهو ساكت ومد ايده بره السيارة وبيدها الجكارة .. ساكت منتظرني انزل ..
شمه : لوما انت جاي الله يعلم جان شصار بيه ...
ايوب : ميصير شي .. لتخافين ... اليوم انتي ضيفة شرف بس ... يجرون رجلج للطريق مو اكثر ..
شمه : ردت اموت .. رجليه انشلت من الخوف .. لو باقية دقيقة اكثر يمكن جان متت ..
ايوب : اتصلت بيج ردت اكولج ابتعدي عن هبة لان سمعت عنها مو خوش حجي بس انتي لو متجاوبين لو من جاوبتي كلتي بالبيت ..
عجبج الصار هسه ؟
شمه : مااصدك ... مااكدر اصدك الي صار .. هبه صديقتي صار سنين اعرفها من جنه بالمدرسة هيجي تسوي بيه .. تبيعني علمود الفلوس ..
ايوب : لا صدكي ..اريد افتهم انتي شعاجبج بيها ؟ سنين تعرفيها يعني متعرفين اخلاقها ؟
شمه : والله مجانت هيجي .. والله جانت فقيرة مشفت شي عليها بيوم من الايام ...
ايوب : الثقة الزايدة والعمية هاي بطليها .. اذا انتي متعرفين الناس شلون صايرة سألي غيرج واتعلمي واخذي النصيحة لان غيرج يجوز اعرف منج وافهم ..اتوقعي من الناس كل شي ..
شمه : شلون متصير عندي ثقه عميه بيها واني اعرفها من جنت بالمدرسة واعرف خواتها واهلها .. وبايته عندي ونايمه على فراشي وماكله من ماعوني .. شلون اتوقع هيج شي من وحده صاحبة فضل علي بعدما بعت كل شي علمود العيشة حتى حلقتي بس هي وكفت وياي وشافتلي شغل .. وحتى من بطلت من شركتكم هم هي اتوسطتلي يم استاذ مؤيد وقبلني ...
صيح علي كلي :
مااااالها فضل عليج وكتلج ولمحتلج بيوم اللي لكيتجن بالمطعم وجنتي عازمتها .. تتذكرين ؟ تتذكرين شكتلج من كتيلي ليش دفعت الحساب بقت هبه تطلبني عزيمه ؟ كتلج مالها عندج شي متطلبج شي واذا سألتج كوليلها استاذ ايوب كلي ... كتلج لو لا؟
شمه : اي .. كتلي ..
ايوب : معناها افتهمي مالها فضل عليج لان مو هي الي شغلتج ولاهي الي اتوسطتلج ..
بقيت ساكته وصافنة هذا شيريد يكول ؟ شيقصد ؟
بس لاا ؟؟؟!!!
شمه : لعد منو ؟؟؟؟؟
كلي بهدوء وهو يشعل جكارة ثانية :
آني ...
