Unicode..
" ဒီက ညီမလေး လမ်းခရီးမှာ အဆင်ပြေရဲ့လား.."
" ဟုတ် ပြေပါတယ်အစ်မ၊ တွေ့ရတာ ဝမ်းသာပါတယ်"
မိုင်ရိုစ်ကမ်းပေးလိုက်သည့် လက်ကို ထိုအမျိုးသမီးက အပြုံးလေးနှင့် ပြန်ဆုပ်ကိုင်သည်။ရင်ခုန်နှုန်းသည် တဖြေးဖြေးမြန်လာပြီး အလိုလို ပျော်ရွှင်မှုကို ခံစားလာရသည်။ပျောက်ဆုံးနေသော နှလုံးသား တခြမ်းကို တွေ့လိုက်ရသည့်နှယ် နှလုံးသားလေးမှာ ပျော်မြူး ခုန်ပေါက်နေပေသည်။မိုင်ရိုစ်မှာ ရင်ခုန်းနှုန်းကို ထိန်းရင်း..
" ရိုစ် နာမည်က မိုင်ရိုစ်ကက်သရင်းနိုဒယ်ပါ။မိုင်ရိုစ်လို့ ခေါ်လို့ရပါတယ်။ဒါနဲ့ အစ်မနာမည်ကရောဟင်.."
အစ်မက မိုင်ရိုစ်၏ ခရီးဆောင်အိတ်ကို ကူဆွဲပေးပြီး
" မိုင်ရိုစ် နာမည်ကို တို့သိပြီးပါပြီ။ တို့နာမည်က နွေခီယာဝန်းပါ.. မိုင်ရိုစ် ခေါ်လို့ရမယ်မထင်ဘူး..'
အပေါ်ထပ်တက်မည့် လှေကားကို တဆင့်ချင်း ဂရုတစိုက် တက်ရင်း ထိုအမျိုးသမီးက ပြောသည်။
" ဒါဆို ဟန်နီလို့ ခေါ်ရမလား.."
" အို!"
ဘေးတဇောင်းမြင်နေရသော ပါးမို့မို့လေးသည် ရုတ်ချည်းနီမြန်းသွားလေသည်။
" တို့က အသက်ကြီးတာလေ ကလေးမရဲ့"
" အသက်ကြီးရင် မခေါ်ရတော့ဘူးတဲ့လား.."
နွေသည် လှမ်းလက်စ ခြေလှမ်းတို့ ရပ်သွားပြီး နှုတ်ခမ်းကို ကိုက်ရင်း တစ်ချက်စဉ်းစားသည်။
" တို့မသိပါဘူး မင်းဖာသာ ခေါ်ချင်သလိုခေါ်.."
အားကောင်းမောင်းသန် အမျိုးသမီးသည် နားရွက်ဖျားတို့ နီရဲသွားပြီး ခရီးဆောင်အိတ်ကို မ ရင်း အခန်းတစ်ခုထဲ ခပ်သွက်သွက် ဝင်သွားလေသည်။
မိုင်ရိုစ်၏ နှလုံးသားလေးသည်လည်း ခုန်ပေါက်မြူးထူးပြီး လိုက်ပါသွားလေသတည်း..။
..
သစ်သားကုတင်သည် အခန်းထောင့်စွန်းတွင် ရှိနေပြီး ကုတင်၏ ခပ်လှမ်းလှမ်းရှိ ပြတင်းပေါက်ဘေးတွင် စာဖတ်ရန် သစ်သားထိုင်ခုံနှင့် စားပွဲကို ချပေးထားသည်။အခန်းသည် အလင်းရောင် ကောင်းစွာရပြီး တော်တော်လေး ကျယ်ဝန်းသည်ဟု ပြောရမည်။အခန်းထဲထဲတွင် ဗီရိုတစ်ခုလည်းရှိသည်။ပြတင်းမှ လှမ်းကြည့်လိုက်ရင် အိမ်အနောက်ဘက်က ခြံဝန်းကို အတိုင်းသား မြင်နေရပြီး သီးပင်၊စားပင် စိမ်းစိမ်းစိုစိုတို့မှာ အမြင်အေးစေသည်။ညနေစောင်းပြီ ဖြစ်သောကြောင့် တစ်အိမ်လုံး လျှပ်စစ် မီးရောင်တို့ဖြင့် လင်းထိန်သွားသည်။
YOU ARE READING
လွမ်းမောစရာ ခေတ်ဟောင်းမြေ (လြမ္းေမာစရာ ေခတ္ေဟာင္းေျမ)
Historical Fictionရှေးဟောင်းဟန်လင်းမြို့ကို သွားလိုက်ရအောင်လား.. (ေ႐ွးေဟာင္းဟန္လင္းၿမိဳ႕ကို သြားလိုက္ရေအာင္လား..)
