What's wrong? ( Completed )

Ep - 25

တရုတ် ၊ ရှန်ဟိုင်း ...

ကြီးကျယ် ခမ်းနားပြီး ကျယ်ဝန်းတဲ့ အဖြူရောင် ၃ ထပ်တိုက်ကြီးထဲတွင် ...

' မုယွီ့ကျင်း !!! ညည်း ဘာပြောလိုက်တယ်။ ပြန်ပြောစမ်း ...။'

' ဖွားလေး ကလည်း ကြားရဲ့သားနဲ့။'

' အေး ... ကြားတယ်။ ငါပဲ ကြားတာ မဟုတ်ဘူး။ ညည်းရဲ့ အဖေ နဲ့ အမေ လည်း ကြားတယ်။ ပြီးတော့ မနက် စောစော စီးစီးမှာ ညည်း ခုလို နှလုံး ရပ်သွားစေနိုင်တဲ့ စကားမျိုး ဖုန်းဆက်ပြောလာစရာလား ...။'

တစ်ဖက်က ယွီ့ကျင်း ကလည်း သူမရဲ့ ဖွားလေး တုတ်ထိုး အိုးပေါက် ပြောလာတဲ့ စကားကို ချက်ချင်း ပြန်မပြောနိုင်ပဲ အဖေ အမေ ပါ ကြားတယ်ဆိုမှ ဘေးမှာ ထိုင်နေတဲ့ ရှဲန့်မု ကို စိုးရိမ်တဲ့ မျက်ဝန်း နဲ့ ကြည့်လိုက်သည်။

' ပါး နဲ့ မား က ပြန်ရောက်နေကြတာလား ...။'

မု အိမ်တော်က မု အဖွား ကလည်း ဘေးမှာ ထိုင်နေကြတဲ့ သူ့ တူ နဲ့ တူမ ကို ကြည့်လိုက်ပြီး မျက်မှန် တစ်ချက် ပင့်လိုက်ရင်း ...

' ဟုတ်တယ်။ သူတို့ရဲ့ တာဝန် ကနေ ခွင့်ယူပြီး ပြန်လာကြတာ။ အခုလို ညည်းရဲ့ မင်္ဂလာ မရှိတဲ့ စကား ကြားရတာပဲ။'

' သမီး ကတော့ ဆုံးဖြတ်ထားပြီးသားနော်။ သမီး မိန်းကလေးချင်း စိတ်ဝင်စားတယ်ဆိုပေမယ့် သူ နဲ့ ကျမှ။ အဲ့ဒါကြောင့် သမီး သူနဲ့ပဲ ဘဝ ကို အတူကုန်ဆုံးချင်တ ယ်။'

' ညည်း ကိုတော့ ငါ ပြောစရာ စကားတောင် မရှိတော့ဘူး။ အရင် က ဝမ် အိမ်တော် နဲ့ ငါ့ကို မျက်နှာ ပျက်ရအောင် လုပ်ပြီးပြီ။ အခုကျ ငါ့ကို သိက္ခာကျအောင် သဘာဝ မဆန်တဲ့ မိန်းကလေးချင်း ယူအုံးမယ်။'

' ဖွားလေး ကလည်း သိက္ခာချ တယ်လို့တော့ မပြောပါနဲ့။ ဝမ်ရိပေါ် လည်း ယောကျာ်းလေးချင်း ကြိုက်နေတာပါပဲ။ သမီး နဲ့ သူ အတူတူပဲ။'

' ဘယ်လို !!!!!.'

ဒီတစ်ခါတော့ မု အဖွား သာမက ဧည့်ခန်းမှာ အတူထိုင်နေကြတဲ့ မုချန်လု နဲ့ မုရှူ့ရင်း တို့ပါ အံ့ဩတဲ့ မျက်နှာတွေ ဖြစ်သွားကြရသည်။

ယွီ့ကျင်း လွှတ်ခနဲ ပြောမိသွားပြီး ဖွားလေး ဘက်က အာမေဋိတ်သံ ကြားတော့မှ သူ့စကားကို ပြန်သတိရတယ်။