نطق خالد: اجل تحبيني وماتبيني اطلقك ؟
شروق بربكه ووجها اللي صار لونه احمر: ماكنت اقصدك
خالد قرب منها ونزل لمستواها وقال بهدوء وعينه عليها: شعور متبادل
ناظرت فيه وحطه عينها بعينه: ايش !
خالد ضاعت علومه وهو يناظر بعيونها وسرحان فيها عضت شفتّها
اخذ نفس وبعد عنها: لو بنبقى كذا بجرم فيك
طلع ، توسعت عيونها واحمرت خدودها حطت يدينها على وجهها وهي تضربالارض من قوة الاحراج طلعت فوق بينما خالد فتح اول زرارين وهوا على نفسه اخذ نفس وزفر ودخل عندهم
فهد: سعود وينه له وحشه مايجي ولا يسأل واتصل عليه ولايرد
ماجد بضيق: مسافر
فهد: ماجد وش فيه صوته قل لي الحقيقه سعود وينه مستحيل يسحب علي !
ماجد كان بيتكلم لولا صراخ عبدالله: تااكل تبننن والله انك غشاش واكبر غشاش
عبدالعزيز: عض على شحم بس انا ماغشيت
خالد ضحك: عزيز قم وور عبدالله اللي تحت
عبدالعزيز: مافي شي
عبدالله: والله اني داري ياخي ابي مره وحده اشوفك تفوز بدون غش
عبدالعزيز: اغش عليك وانت سبك ماتفهم ذي مشكلتك
فهد قام وجلس عندهم: انا انا بلعب مع ذو الاخلاق الرفيعه
عبدالله: والله ذو الغشاش الرفيعه وانت المدير حقه انقلع بس
قام وعبدالعزيز ضحك:خلاص تعال انت فايز بس لاتبكي
فهد: لا ذا مو فايز ذا العبدالله
عبدالعزيز رمى الاوراق : والله ملعب
فهد: خلاص تعال انت عزوز بس لاتبكي
عبدالعزيز مسك راسه وقام: يووووههه
ضحكو كلهم على سماجة فهد وصراخ عبدالعزيز اللي منهبل منه نطق: وشفيه ذا
عبدالعزيز: سعود وينه يعلمك وشفيني
فهد: مجيد يقول انه مسافر
عبدالعزيز: الله وكبر والمسافر مايتصل ولا وش ؟
خالد: العلم عندي
عبدالله: اسلم
كلهم لفو له ونطق: سعود بالمستشفى
كلهم قامو: وشتقول ، وش صار ، ليه ؟
فهد: اي مستشفى
خالد: اللي هنا
لف عبدالله على ماجد: وانت ليه ما تهرج تبيني اهفك طراق على عينك اخوك ذا كيف محد يدري عنه !؟
فهد: امشو امشو خلو التبن اللي يحسد اخوه
عبدالعزيز: طيب سعود بالمستشفى زين بس وشفيه
خالد: انتم روحو وشوفو
قامو بسرعه ودخل كل واحد لسيارته واتجهو للمستشفى نطق ماجد: ليه قلت لهم الحين يسوون سالفه وحنا قلنا بنخليها بيننا لأن لو اهلك واهلي درو باللي سواه سعود وباللي سويته انت بينتهي اللي بيننا
خالد: ماردهم بيعرفون وسعود يحتاج احد يقعد عنده خلهم وانا بتفاهم معهم
~
دخلو المستشفى وسألو عن سعود وعلمهم رقم الغرفه واتجهو له ، دخلو عليه وانصدمو من حالته اللي عصب واللي حزن واللي خاف قربو منه وهم يشوفون الاجهزه عليه ، عبدالله: ذا مصدوم ولا سوا حادث الكلب ماجد ليه ماقال لنا!!
فهد قرب منه ودمع على خويه هز كتفه بخفه: سعود
عبدالعزيز: على حالته ذي اتوقع ان فاقد الوعي
فهد صرخ: وش فاقد وعيه يقوم الله لايهينه
عبدالله: ولد اقصر حسك الرجال نايم وتعبان
فهد مسح دموعه وطلع يدور على الدكتور مر واحد من جنبه وقال: من المشرف على حالة سعود عيسى
الممرض: الدكتور رضى تلقاه هنا
أشر على الغرفه ودخل فهد ونطق: سعود وشفيه
الدكتور: انت مين
فهد: اخوه ورفيق دربه وتوأم روحه سعود من مسوي فيه كذا
الدكتور قال نفس الكلام اللي قاله لماجد نطق فهد: ومتى يقوم
الدكتور: الله اعلم
فهد مسك راسه وطلع ودخل غرفة سعود وقعد جنبه تكى راسه على كتف سعود وقام يبكي انصدمو عبدالله وعبدالعزيز: ولد شفيك وش قال الدكتور
فهد ببكاء: مغمى عليه ياعيال
عبدالله: وشوو !! ومتى يقوم ؟
فهد: مدري مدري بس الظاهر انه مطول
عبدالعزيز مسح على ظهره: لاتبكي سعود قوي وبيقوم ترا في معلومه يقولون اللي مغمى عليهم يسمعون ، سولف معه
فهد مسح دموعه: طيب اطلعو برا
عبدالله: بعدها دوري فكلامي خاطر
عبدالعزيز وفهد ضحكو من ربكة عبدالله نطق عبدالعزيز: امش امش فكلامي خاطر اجل
عبدالله: والله خفت قلبي قاعد يرجف
عبدالعزيز: بسم الله على قلبك لاتخاف على الوحش
طلعو وخلو فهد نطق: سعود خلاص قم تكفى لاتسوي فيني مقلب وانت تدري بقلبي الخفيف ماتوقعت يوم بخاف عليك قد الحين لاتطول الغيبه يكفي غبت عني ايام ولاسألت وانا كنت احسبك منتب كفو خوتنا والله العظيم ان
لاجابو طاريك وصدري ضايق اني ابتسم واقول لضيق هات اللي وراك وهذا بس طاريك كيف لو تجي انت تكفى قم بس وبسويلك اللي تبي مارح اقدر اصبر تكفى
تنهد وهو يناظر فيه: من اللي مسويلك كذا من
رفع يدينه وهو يدعي: اللهم يا سامع دعاء العبد إذا دعاك، يا شافي المريض بقدرتك، اللهم اشفه شفاء لا يغادر سقمًا، اللهم ألبسه لباس الصحة والعافية يا رب العالمين، اللهم رب الناس، أذهب البأس، واشفِ أنت الشافي لا شفاء إلا شفاؤك ياحي يا قيوم بقدرتك استغيث اصلح شأنه كله ولاتترك له طرفة عين
مسح على وجهه وباس راس سعود وطلع دخل عبدالله وبعده عبدالعزيز وبعدها كلهم دخلو ~ بعد ساعتين داخل نطق عبدالله: ياعيال احس باكتئاب وانا اشوف سعود كذا
عبدالعزيز: تهقون وش صارله ؟
فهد زفر بعصبيه: له اسبوع هنا ولا احد قال لنا
عبدالعزيز: كيف!!!!!
عبدالله: اسألك بالله ! بعدين اهله مسافرين كيف يتركونه
فهد: ماتوقع احد يدري غيرنا
عبدالعزيز: اما غريبه وش السالفه ، المريض يحتاج احد يجلس عنده وماجد وخالد مخبين عننا
فهد كان بيتكلم لولا الممرضه اللي دخلت: انتهى موعد الزياره تفضلو برا
عبدالله: يلا ياعيال
طلعت ونطق فهد: الحين من الوصي عليه ؟
عبدالله :اتوقع نجلاء
فهد: ونجلاء ساحبه عليه وجايه للعزيمه!
عبدالعزيز: امشو امشو ترا مانعرف وش السالفه خلونا نعرفها بالاول
اتفقو على كلام عبدالعزيز وطلعو برا متوجهين لبيت عيسى بعد مده وصلو
دخلو داخل ونطق فهد بعصبيه: ماجد سعود وشفيه حالته ليه كذا !
عبدالعزيز بنفس عصبية فهد: وليه ماقلت لنا
ماجد: صار عليه حادث
فهد بعصبيه وصراخ: اسبوع كامل ومحد يدري عنه وش مغزاك لما ماتعلمنا عنه !!
خالد: ولد اقصر حسك ماودنا احد يدري لجل ماتخرب خطتنا
عبدالله: وش خطته
خالد: بأننا نمسك اللي صدمه
فهد: شدخل ذا بذا يا انت عليك ربط مواضيع اقول عطنا العلم
خالد ناظر بماجد بمعنى انه توهق بعدها تنهد وقال: انا اللي ضاربه
فهد: هااا وش تقول انت
عبدالله: توك تقول حادث تستهبل علينا
عبدالعزيز: خالد لاتلعب علينا وقل وش صار فيه
خالد: صارت بيننا هوشه وسوء فهم وشكلي تحمست بزياده
فهد بعصبيه: وش سوء فهم ذا
ماجد: شي مايخصكم
فهد: انت اص ولا كلمه من دريت انك ماعلمتنا وانا داري انك رخمه
ماجد: احترم نفسك يا فهد واللي سويته...
خالد قاطعه: الدكتور قايل لحد يجيه خلال اسبوع عشان كذا ماقال لكم وهو يدري انكم بتزعجونه
فهد بصراخ: ابي اعرف ليش ضاربه يالسلوقي
خالد عصب: مالك دخل يخوي مب ولدك وحديث رجال مالك فيه
فهد: احترم نفسك
عبدالله وعبدالعزيز مسكو فهد ونطق عبدالعزيز: انت وياه اهدو
فهد بعدهم بقوه: بعد عني وليش اهدء وهو ضارب خوي ومكسر له راسه والاخ ماجد عاجبه الوضع ولا دافع عنه ولا اخذ بحقه
ماجد: اخذت حقه لاتكثر بربره يافهد
فهد: كيف اخذته ها عشانه انقذك وانقذ اختك تبي تسامحه على تصفيق اخوك ؟ اخوك بالعنايه المركزه واجهزه فوق راسه وحواليه وجهه متفقع وراسه به ١٦ غرزه عشان الكلب كان في سوء بينهم وسوا به كل ذا والله لو انه حيوان بدون عقل مايسوي اللي يسويه صدق ماتستاهل خوته
طلع وكان بيناديه عبدالعزيز لكن ماجد سكته
عند فهد واللي الدنيا ضايقه فيه ونسى ان اخته موجوده فالبيت اصلاً كان بيركب السياره لكن لف على صوت جنى: فهد
فهد زفر: وشتبين
جنى قربت منه: وشفيك معصب
فهد تنهد وسحب يد جنى وحضنها تحت صدمتها من تصرفه ! حضنها بقووه لين ما انحرجت جنى: ف فهد
فهد وهو حاضنها : عيون فهد
الكلمه ذي كانت كفيله بأن تخلي جنى تذوب مكانها ضحك وبعد عنها وقال: وين رايحه
جنى: ل للبيت
فهد: وراك مستحيه ماعليه بتتعودين لما اخذك ، وبعدين وين بتروحين لحالك
جنى: بيتنا قريب
فهد: صاحيه انتي طالعه بالليل ماشفتي وش صار بشروق امشي معي انا بوصلك
جنى: واختك ؟
فهد تذكرها: اييه اختي تقول بتجلس عند شروق مسكينه مافي احد يسليها
فتح الباب ونطق: اركبي
جنى: اخاف
فهد حط يده على الباب: وليه تخافين
جنى: اللي صار لنجلاء
فهد عقد حاجبيه: وش اللي صار لنجلاء
جنى: ماتدري ؟ هي وسعود كيف تزوجو
فهد: ها
جنى بلعت ريقها وحست انها جابت العيد نطق فهد: اركبي اركبي السياره مكتمه محد بيشوف انك معي ، يلا ؟!
عضت شفتّها بربكه ودخلت سكر الباب وتوجه لبابه ودخل حرك السياره ووقفها بمكان بعيد شوي لف عليها وقال: قولي اللي عندك
جنى: وش اللي عندي !
فهد: تراني اشتقت لوجهك ماودك تمتعين عيني بطلّتك ؟
ابتسمت بحرج وشالت حجابها وطلعت شعرها توسعت عيونه بمظهرها الجميل اللي كان يصدمه كل مره ويحس قلبه متولع فيها صدّ عنها وحط يدينه على الدركسون ويطبطب فيه يناظر فيها بطرف عين ثم يلف استغربت من وضعه وقالت: وشفيك
فهد لف عليها بكامل جسمه: حرام عليك على اللي تسوينه فيني
جنى رفعت حاجبيها: وش سويت ؟
فهد: الحين كلهم يشوفونك وانتي بذا الجمال
جنى ابتسمت ونزلت راسها وشبكت يدينها ببعض بتوتر بلل شفته وابتسم وهو يشوف حياها نطق: ناظري فيني
جنى هزت راسها ب لا مد يده وحطها على فكها وخلاها تلف قباله ناظر فعيونها وشوي شوي تنزل لشفتّها رفع ابهامه وحطه على شفتّها قرب لها وقبّلها هو يفرغ طاقته وعصبيته فيهم بعد دقيقه كامله جنى بعدت عنه واخذت نفس وزفرت مسكت شفتّها بحرج واللي كانت منتفخه ومتورمه ناظرت فيه ونزلت عيونها بسرعه ووجها قلب احمر فهد تكى راسه على ولف عليها
وقال: احبك
جنى رفعت راسها له ومندهشه: تحبني ؟
فهد: احبك واعشقك
جنى نزلت راسها وهي تلعب بيدينها: لو تحبني كان خطبتني
فهد: وراك مستعجله اكيد بخطبك بس خليني اظبط اوضاعي وترا وراها مهر وحوسه وابوي يبيني اتوظف ولا مستحيل اتزوج وبعدين تونا صغار
جنى عقدت حاجبيها بعصبيه: ولمتى بنبقى كذا ؟! انت تدري انك اول واحد اسوي معه هالحاجات وتراها ذنب كبير لكن ان شا الله بيغفر لما تتزوجني
فهد غير الموضوع: على طاري الزواج ، علميني سالفة سعود ونجلاء
جنى: منب معلمتك
فهد عدل جلسته: افا ! ليه معصبه طيب
جنى: منب معصبه
فهد: شوفي ملامحك واسلوبك وتقولين منتب معصبه ؟
جنى: ايوه عندك شي
فهد:لاتخليني ابوسك واغير من كلامك اللي ماله سنع
جنى صدّت عنه تناظر فالشباك مسك فهد يدها وقال: صدقيني بتزوجك تراني احبك لكن الظروف مانعتني ولا تحسبين اترك الجمال ذا كله واسحب عليه صاحيه انتي تراني رجال ولي شنب وقد كلمتي
جنى تنهدت براحه من كلامه: تمام الحين وش ودك فيه
فهد: ودي اسمع قصة سعود ونجلاء
جنى قالت له القصه بتوتر وقالت عن نوره وكلشي من الاف الى الياء وفهد اللي كان متسمع وكل شوي ينصدم وينغبن يوم خلصت نطق: عشان كذا خالد ضرب سعود !!
جنى: ايه كشف الحقيقه المُره وحقيقة سعود القذره
فهد تضايق من كلامها ، حرك بدون لايكثر هرج لبست حجابها ونقلبها ووصلّها البيت وهو يناظر قدامه ويهوجس وعى على نفسه يوم جنى قبلّته على خده وقالت: لاتتضايق والامور بتنحل قريب
فهد حس ان نفسه توقف ومقدر يستحمل حاوط بيدينه على وجه جنى وقبلّها بكل مكان وقف وهو يناظر فيها ويدينه للحين على وجهها ومع كل كلمه يقبلها: لاتخافين ، علي ، وانتبهي ، على نفسك
انتهى بكلامه بقبلّه طويله بعد عنها وهو مبتسم نزلت بحيا والشعور اللي كان يداهمها هو فراشات بوسط بطنها دخلت داخل وضحكت بحُب
عند فهد اللي مسك قلبه اللي كان يدق بجنون وبنص الطريق يتذكر سعود ويتضايقق ~ رهف: الو فهد وينك
فهد: بالبيت بنام
رهف: وماشاء الله ليه ما اخذتني
فهد: احسبك بتقعدين عندهم
رهف: طيب
فهد: اجيك ؟
رهف: لا لا
فهد: يلا انتبهي على نفسك
قفل ورهف راحت عند شروق: شوشو خمني
شروق: اخمن وش
رهف: بنام عندكم اليوم
شروق نقزت بفرح: احلفييي
رهف: والله ، نجلاء ونوره وسوير وشرايكم نسوي سهره جماعيه
نجلاء: معليش بس خالد برا ان شاء الله يوم ثاني
رهف: قهر وسوير؟
سارا: انا عندي شغل وبعدين شايفين رجلي
شروق: اما اجل رهف خلص انقلعي لبيتكم
رهف ضربتها: ياحيوانه
شروق ضحكت وبعد دقايق راحن البنات وشروق ورهف غيرن ملابسهن وجلسن على السرير يسولفون بعدها نامو نوم عميق
__الساعه 5 الفجر__
صحت رهف وهي عطشااانه دخلت الحمام غسلت وجهها وربطت شعرها ودورت بغرفة شروق عن مي ولا لقت توجهت لشروق وهزت كتفها: شروق ، شروق اصحي
شروق: هممم
رهف: روحي جيبيلي مي
شروق: انتي روحي منب فاضيه
رهف: صاحيه انتي لو ماجد يشوفني
شروق: ماجد بالمشب
رهف: تكفيين قومي اخاف اشوفه
شروق حطت البطانيه على راسها: يووه انتي روحي
تأففت ونزلت تحت وهي تمشي بشويش وتناظر يمين ويسار وصلت للمطبخ بأمان تنهدت واخذت كوب وشربت مي مسكت بطنها وهي تحس بالجوع فتحت الثلاجه ونزلت وهي تدور على اكل ~ لبس ثوبه متوجه للمسجد نزل وبيده الجوال دخل المطبخ ورهف سمعت صوت اقدام وابتسمت وراحت تخبت ورا الباب ولما دخل صرخت لجل تخرعها جمدت مكانها وهي تشوف ماجد اللي كان رافع حاجبيه ولا هزت فيه شعره ابتسم ، عضت شفتّها بحرج ولون خدودها قلبت حمرا من الخجل رجعت لورا وماجد مبتسم بجانبيه وهو يتقدم نطقت رهف: م ماجد وخر ليش تتقدم !
رجعت لورا لين ماصار وراها رف المطبخ قرب منها وهي غمضت عيونها ضحك بخفه على تفكيرها واخذ كوب وراح يشرب مي فتحتهم بخفه لمى حست انه راح وشافته يشرب مي هرولت تبي تطلع وتنقذ نفسها من الموقف لكن مادرت ان الموقف المحرج الحقيقي بيصير الحين وهي تهرول بتطلع من الباب زلقت على ورا لكن لحسن الحظ ماجد حط يده حول ظهرها ومسكها قبل لاتطيح ناظرو فعيون بعض ماجد تنحنح وبعد عنها صدّ وقال: انتبهي على نفسك مرا ثانيه
طلعت رهف بسرعه وهي ترجف من الموقف المحرج راحت للغرفه واندست تحت البطانيه ضربت رجلينها على السرير وتدحرجت كلما تتذكر الموقف اللي ودها تنساه اليوم
