_بيخوني!
اصعب لحظة لما تلقي الشخص اللي سبت أهلك وناسك وصحابك وحتى بلدك عشانه بيخونك.
كانت اصعب لحظة عدت بعد جوزنا لما يحيى ساب فونه ودخل ينام شوية بعد ما رجع من شغله، فمسكته فونه فضول مني ألعب فيه شوية فدخلت الواتس لقيته باعت لبنت عمه بيسأل عن بنت عمه التانية اللي كان خطبيها قبلي، هو قالي إنه كان خاطب بنت عمه سنة ومرتحهوش مع بعض فسبها ونسيها، بس الواضح إنه منسهاش ولسه بيحبها، شعور مؤلم لما حبك يكون هَباء لشخص مش بيبادلك نفس الشعور.
_ سارو حبيبتي مالك بقالك أسبوع مش مظبوطة حاسس أن في حاجة مخبيها عني؟
غمضت عيني بحاول مبكيش:
_متأكد من كلمة حبيبتي دي؟ أنت بتحبني بجد يا يحيى ولا هي كلمة بتتقال والسلام! وعلى فكرة أنا شفت المساجات اللي بتسأل بنت عمك عنها!
قررت مهربش تاني، بقالي أسبوع بحاول اتكلم معه عن المسدجات اللي شوفتها بس بفشل وبهرب، بس خلاص مش ههرب تاني وهواجه مشاكلي، لقيته اتوتر وعمال يبص يمين وشمال، ودي عادته لما يكون بيكدب أو خايف من حاجة، نصاب ضحك عليا وخلاني أحبه وهو لا، مقدرتش اقوام دموعي اكتر من كده وسمحت ليها تنزل.
_طب مدام لسه بتحبها اتجوزتني ليه، ليه سيبتني بيتي وأهلي واصحابي دول كلهم عشانك ليه مدام مش بتحبني.
سكت ورجفة دهمتني وحسيت ببرودة بتكتسح جسمي، وهو لا رد منه قمت واقفت وكنت داخلة اوضتنا فوقف ومسكني من دراعي وبنبرة مهزوزة:
_ حنيت!
بصتله بصدمة مش مصدقة ومش عارفة ارد عليه، دا بيدبحني بسكينة تلمة! وهو مش حاسس أما هو فنزل رأسه في الأرض بحزن.
_شوفتها من عشر أيام وهي ماشية في الشارع وبتعيط، فغصب عني حنيت ليها لذكرياتنا سوًا فسألت مريم عليها، صعب أوي يا سارة تنسي حبك الأول، أنا آسف على اللي قولته أنا عارف إني بجرحك بكلامي دا بس بالله غصب عني سامحيني.
نفضت ايدي من ايده وجريت على الأوضة، لا لا دا أكيد كابوس وهفوق منه، دا مش يحيى اللي اتقدملي من تمن شهور اللي سبت بلدي وأهلي وجيت معاه القاهرة شاب طموح محاسب في شركة لاستيراد الأجهزة الطبية، طيب وحنين على كُل الناس، جوازة صالونات، خالته شافتني في فرح بنت خالي اللي عايش في القاهرة وقالتله عليا وجايه اتقدملي بعدها بأسبوع، صليت وارتحت ليه وكان صريح معايا وحكالي كُل حاجه عنه حتى عن خطوبته من بنت عمه، وصدقت مقولة لوحدة صاحبتي لما قالت ما الحُب إلا للحبيب الأول.
_ بتعملي إيه.
_زي ما أنت شايف، بجهزلك الفطار عشان تفطر قبل ما تروح شغلك.
قرب مني وشدني من ايدي وقعدنا على التربيزة، فشيدت ايدي بهدوء.
_مش عاوزة تروحي يومين لعند اهلك؟
