22
« حلّة ساير | بيت حاكم »
بعد الفطور والإنتهاء من كل شيء تقدمت قصيد تعطيهم القهوة والشاي، أبتسم نايف وهو فعلاً ع كثر الخدم بس إنه شايلة البيت شيل م تحب الخدم يلمسون شيء لها تحب كل شيء تنجزه من نفسها عشان تحس بطعم الإنجاز الي تحبه
بعد تأمل طال فيها نطق حاكم : الا يانايف ما حددتوا متى الملكة؟ أبطيتوا بالحيل عشان نجهز من بدري ، نايف : والله ياعم كان ودي انها قبل رمضان لكن ما ودي أعجل ع قصيد فقلت نخيلها بعد زواج عيال عمي براهيم افضل منها يمديها قصيد تخلص وانا يمديني احجز الإستراحة وكل شيء
حاكم:ما قصّرت ياوليدي الله يوفقكم ويسعدكم يارب ، نايف ناظره وابتسم:وياك ياعمي بس تسمح لي أطلبك طلب ؟ ، حاكم:طلب ؟ اطلب عشرة ياولد جابر ، نايف بحرج :ودي ياعم بما انه قصيد عندها دوام يومين بالأسبوع ودي انه تروح معي ياعم منه اتعرف عليها ومنها ترحم السواق وهذال من المشاوير دام زوجها هنا ، حاكم أبتسم:
تدري؟احسد قصيد والله انه عندها مثلك الله يوفقكم وأشوف عيالكم يارب وعيال عيالكم، نايف:الله يطوّل بعمرك ويخليك سند لعيالك وعمتي عجّايب ، دخلت عجّايب ع جملته ونطقت:ياحبيبي يانايف ويخليك لقصيد يارب ،
سراج:نايف ما ودك تنزلع للطائف وتفكني شرك حتى باختي مناشبني ، نايف أبتسم وهو يغيظه : يوه ياسراج يوهههه الله يرفق ع قلبي اول ما شفتها ياسراج تشلع القلب من مكانه شلع والله حلوة الله يسامحكم ليه ما علمتوني انه عندكم هالجمال خليتوني معزب من اول ، سراج رفع سبحته:والله لخليها تعلم في وجهك لا تمدحها قدامييي ياورع لا تمدح ، هذال بضحكة: تغار عليها وجاء الي بيحرقك منّ الغيره الله يعينك وانا اخوك تحمل تحمل ، حاكم: صلوا صلاتكم وارقدوا ياعيالي خلوا الطفاقة عنكم واهجدوا ولا اشوف احد يطلع مع هالباب سامعين ولا أعيّد كلامي طبعاً
نايف ضحك:حتى انا بعد معهم ؟ ، ضحكت قصيد عليه ونطقت:دامك ببيتوه يعني تحت مسؤوليتوه اكيد
« في بيت أمير | حائل »
بيت امير يتكون من دورين وفوقهم سطح الدور الأرضي فيه مجلس للحريم وصالة ومقلط ومطبخ وغرفة للضيوف الي يباتون عندهم مع حمامين وجنبهم مصعد يودي للدور الثاني ، والدور الثاني يتكون من غرفة لروابي مع حمام ومقابلها غرفة سلطان كذلك مع حمام ويمينهم ع طول غرفة أمهم وأبوهم وجنبهم مكتب للشغل حقهم وصالة مبيت للعائلة ومطبخ وحمام ودرج يرقى للسطح أما بالخارج كان حوش كبير يتكون من كراج فيه ٤ سيارات لامير وريمان وسلطان وروابي ، وقريب منه غرفة بها كراسي وفرشات وطاولات للمناسبات الكبيرة وجنبه مجلس رجال خارجي كبير يكفي قبيلة كاملة ومن داخل الصالة بوه باب زجاجي يطل ع المسبح الخارجي وباقي الحوش زرع والعاب بزارين حاطتهم ريمان عشان احفاد أخوها لما يجون يستانسوا عليها ، داخل البيت تحديداً غرفة سلطان الي سادح ع رجل امه ويفكر باللي سلبت عقله وقلبه وكل ما فيه التفت لامه الي نطقت:سلطان ، رفع راسه على صوت امه الي تمسح ع شهره :سمّي ياعين سلطان ، ريمان : وش رأيك تتزوج يمه ؟ ، لف سلطان بكل جسمه:وش جاب هالطاري عليك بهالوقت ياعيوني ؟ ، ريمان:مدري بس بخاطري بنت والله ودي انها تكون زوجة لك وأمّ لأحفادي ابدا ابدا ما تليق الا انها تكون نصيبك فيها رضا ياسلطان وجهها بشوش تستحي كثير ما تليق الا لك ياسلطان ما خلقها الله الا عشان تكون حرمك، سلطان ناظرها وببتسامه:هالله هالله ومين هالبنت الي لقت هالرضا كله منك ! منهي الي ع قولك تؤامي ؟ ، ريمان :بنت عبدالله اخت هادي وأكبر بناته يوم شفتها بالإستراحة حبيتها ياسلطان اشي اسلوب اشي جمال اشي رقة كل شيء فيها من اول شايفتها قبل سنة وحبيتها لكن هالمرة بزود والله ما عمري حبيت احد كثرها حتى انت احبها اكثر منك ياوليدي الطيبة تنصب من عيونها صب
لاشعورياً ضحك سلطان ونطق:اشهد بالله انك صدقتي
ريمان:ومنين تعرفها بالله ؟ ، تنحنح سلطان:كانت مرا مع روابي وشفتها ، ريمان:خل الحب والخرابيط عنك ازعجتنا تبي تتزوج عن حب خلاص مو لازم تتزوج عن حب ياسلطان
سلطان أبتسم وبهمس:طايح ومغلوب على امري من زمان ، الي تشوفينه يمّه سويه ، ريمان زفت بفرح:يعني نخطبها؟؟ ، سلطان ضحك:ايه ايه مو هالفترات حرام من مناسبه لمناسبه تعبوا خليهم بعد العيد خير ، أستانست ريمان من الخبر وطلعت بعد ما غطت سلطان الي رجع لفراشه واحلامه وهو يفكر فيها مو شيء جديد ، دخلت ريمان غرفة روابي وشافت الغرفة كأنّها ثلاجة من البرد نزلت ع المكيف وشالت الأوراق عن روابي ولحفتها بلحاف ادفى شوي وباست جبينها وطلعت تاكدت من الباب حق البيت ورجعت دخلت لامير ونطق:تأخرتي علي ياريمان شفيك
ريمان:ابطييت بالحيل؟ ، امير وهو يصغر إصبعه:بس هالقد
ريمان:طيّب بقولك خبر حلو ، امير : اصلا ما تجي منك الا الاخبار الزينه غرّدي غردي ، ريمان:سلطان قرر يتزوج وعاد البنت والله زينه ومافيها عيب ياامير تنحط ع الجرح يبرى منّ لطافتها ، امير:ومنهي هي من بنته ؟ ، ريمان:بنت عبدالله اخت هادي الي كان مع سليطين يوم كنا عند حاكم
امير:والله والنعم فيهم نخطبها له ولا يهمه حبيب ابوه والله
ريمان تقدمت تجلس جنبه :بس مو الحين بنخطبها لا خلصت زواجاتهم حرام من مناسبة لمناسبة انهد حيلهم والله ، أمير أبتسم لها:أي والله صادقة المهم أنا بنام لا خلصتي طفي الليت وتعالي ، ريمان:بنام الحين قاعدة افكر بكرا اعتذر دامه اول ايام رمضان ، امير:ليه بسم الله عليك شنوحك وش توجسين ، ريمان:بسم الله عليك شفيك مافيني شيء بس بريح شوي من تعب الدوامات ، امير تقدم يحط راسها ع صدره ويمسح عليها بخفيف وينطق:افااا يتعبون حبيبتي ؟؟ ، خذي اجازة من عندي شهر المهم راحتك يابعد كل حيي انتي ، ريمان حضنته وحس بثقل جسمها دليل نومها ، أبتسم وباس جبينها ونام هو بعد ، اما عند روابي صحت نصّ بالليل تحديداً الساعة ثلاثة تغادر غرفتها وتنزل الدور الارضي وتجلس جنّب المسبح تفكر وهي نعسانة بس لازم تصحصح وتشرب قهوة قبل الاذان ، اتجهت للمطبخ وطلعت كوبها المفضل وسوت لها قهوة v60 كولومبي واخذت لها قطعة حلا بس شهقت اول ما حست بيد تحاوطها من ورا ، سلطان ضحك:ياخوافة شفيك
روابي تنهدت بخفة:طيب خرشتني شفتك نايم قبل شوي
سلطان:سوي لي قهوة معك طيب قبل يأذن بأكل تمام؟
روابي:طيب تمام تبي إثيوبي ولا كولومبي ؟ ، سلطان:ما تفرق المهم قهوة بصحصح للشغل انهد حيلي والله من الشركة
روابي حضنته:اجر اجر ياحبيب اختك ، سلطان:محد مصبرني ع الحياة الا انتي والله ، روابي:الصدق؟بديت اغار من الحين لا تتزوج ، سلطان بوهقة:ابشرك امي قد حددت وكل شيء بنخطبها بعد رمضان ، روابي بزعل:طيب ليه ما علمتني كنت ابي رزان تكون لك حبيتها والله ، سلطان ضحك
:ايه رزان اجل ، روابي:شفيك؟ ، سلطان:هي الي امي تبيها لي اصلا ، روابي:احلفف ، سلطان: والله ياعيون سلطان انتي بتشوفيني عريس قريباً بالله كم تعطيني ؟ ، روابي ضحكت : عشرة من عشرة بدون تردد اصلا
سلطان:يوه احبك والله ، روابي مدت له كوب القهوة حقه واخذت كوبها وطلعوا برا يتأملون الجوو كيف حلو بحائل نصّ بالليل وهواء يرد الروح من مكانها
« ببيت عبدالعزيز | غرفة تركي »
تركي طول اليوم يفكر بالبنت الي جابت راسه من اقصاه صار مُتيم فيها ، قرر يصارح امه الي قاعدة جنبه ناظرها ونطق:
يمّة ناظريني ، رفعت سارة عيونها له:ها يامي أنت شتبي مني
تركي:يمّة أبي اتزوج ولقيت البنت الي ابيها ، سارة:ومنهي هالبنت الي حبيتها يا امي؟ ، تركي :روابي بنت عمتي ريمان
سارة:بس البنت ياتركي كلنا ندري انها لولد عمها وخاطبين من زمان ، تركي ناظر امه بصدمه:وليه ما علمتوني طيب؟
سارة:وقتها انت كنت تكمل دراستك بـ لندن والبنت نصيبها جاها ووافق ابوها وخطبوا ، تركي:يمّة طيّب حبيتها ابيها ليه ليه ، سارة:ياتركي انا شدراني انك تبيها وهي محجوزة لولد عمها من كانت صغيرة ، تركي مسك قلبه بوجع:يمّه خلاص مابي اتزوج قفلي الموضوع ولا عاد ينفتح الله يوفقها البنت
