TXT SHORT STORY

CAN'T WE JUST LEAVE THE MONSTER ALIVE(Taegyu-1)

Song Recommendation - Deep Down by TOMORROW X TOGETHER

သူ​၏ဦးခေါင်းခွံအပေါ်တွင် ဖုထစ်နေသည့်အရာတစ်ခု တည်ရှိနေသည်။ ထိုအရာမှာ မနေ့တစ်နေ့ကမှပေါ်ပေါက်လာခြင်းမဟုတ်၊ လွန်ခဲ့သည့်နှစ်ပေါင်းများစွာကတည်းကတည်ရှိနေခြင်းဖြစ်သည်။

လက်ဖြင့်စမ်းကြည့်ရင်လဲ ဆုပ်ကိုင်မပြနိုင်ပါပဲနှင့် ထိုအရာရဲ့တည်ရှိမှုကို စိတ်ထဲကခံစားမိခြင်းသာ။ ဘယ်သူမှမမြင်ရပေမဲ့ သေချာတာတစ်ခုကတော့ ထိုအဖုအထစ်က အသက်ကြီးလာသည်နှင့်အမျှ တဖြည်းဖြည်းကြီးထွားလို့လာခဲ့​၏။

"တီတီ တီတီ တီတီ"

ကုတင်ဘေးမှာတည်ရှိသည့် အဖြူရောင်စားပွဲပေါ်ကလာသောအသံဖြစ်သည်။ အဝါရောင်နာရီအဝိုင်းလေးက လှပသည့်အသွင်ဆောင်နေသော်လည်း ထွက်လာသောအသံကစိတ်မနှစ်မြို့စရာ။

ကောင်းကောင်းမွန်မွန်အိပ်မပျော်သည့်ရက်တွေလဲအတော်များခဲ့ပြီမို့ နှိုးစက်သံကြားတာနှင့်တန်းနိုးလာခဲ့သည့်သူက ကြမ်းပြင်ပေါ်ဖြာကျနေသည့် နေရောင်ကို တော်တော်ကြာငေးကြည့်နေမိသည်။ ရွေ့လျားမှုမရှိပဲ တည်ငြိမ်နေတဲ့အရိပ်က သူ့ဘဝလိုပဲ တိတ်ဆိတ်နေပါလား။

သို့ရာတွင် သူ့ရဲ့ရုံးခန်းကတော့ တိတ်ဆိတ်မှုကိုဆန့်ကျင်နေခဲ့သည်။

"အားလုံးပဲ သတိကပ် သတိကပ်!!!"

ကပိုကရိုနှင့် ရုံးထဲအပြေးဝင်လာတဲ့သူက အရေးကြီးသောသတင်းတစ်ခုကိုသယ်ဆောင်လာသလို၊ တခြားသူတွေကလဲ Laptop ကိုအာရုံစိုက်နေရာမှ ထိုသူ့ဆီမြားဦးလှည့်လာပြီး

"ဘာတဲ့လဲ" "ဘာတဲ့လဲ"

ကမန်းကတန်းမေးလိုက်သည့်မေးခွန်း​၏အနောက်မှာ အဖြေကချက်ချင်းထွက်မလာ။ နဖူးတဝိုက်မှာချွေးစေးတွေထွက်သည့်ထိုသူက ရုံးခန်း​၏အလယ်မှာရပ်ရင်းအမောဖြေလိုက်ပြီးနောက်

"ဒါ-ဒါရိုက်တာဂန်..." "ဒါရိုက်တာဂန်ကို coffee ဆိုင်မှာတွေ့လိုက်တယ်"

ဝင်ပေါက်တံခါးကိုလက်ညှိုးထိုးပြရင်း အမောဖြေရင်းပြောနေသည်မို့ စကားမှာအဆုံးထိထွက်မလာသေး။