انت مش جاي الدنيا تحقق أحلامك !
في حاجات كتير جداً نفسك فيها ومش هتاخدها في الدنيا .. ايوه تصالح مع الحقيقة دي بدري بدري .. وإلا يبقى إيه طعم الجنة لو كل أحلامك في الدنيا بتتحقق وكل اللي نفسك فيه بتاخده ؟!
انت جاي الدنيا تسعى وبس
والسعي اللي هو بين قوسين (العبادة)
لإن سعي معرفتش تحوله لعبادة يبقى سعي ع الفاضي !
تاخد طريق يرضي ربنا وتخلص فيه النية وتجيب اخرك فيه يبقى انت كده والله العظيم ناجح حتى لو موصلتش في النهاية
النتيجة مش بتاعتك ولا ربنا طلبها منك
ولا هيحاسبك عليها
كان بيعمل إيه في شبابه ؟
كان بيعمل إيه بصحته ؟
كان بيعمل إيه بفلوسه ؟
كان بيعمل إيه بوقته ؟
دي طريقة التصحيح اللي هتتحاسب عليها
مفيش سؤال هيكون فيه "وصل لإيه ؟؟"
لإن وصل لإيه دي إجابتها مش عندك
فنرجع ونقول "انت مش جاي الدنيا تحقق أحلامك" .. انت جاي الدنيا "تسعى" والورقة تتسحب منك في أي وقت تبقى ناجح طالما اتسحبت منك وانت بتحاول وبتسعى صح
فكمل سعي واشتغل وطوّر نفسك واعمل اللي عليك .. بس وانت هادي ومطمئن طمأنينة المؤمن اللي عارف حقيقة الدنيا صح وانها ممر لا مقر وان شرها زائل وخيرها كمان زائل
واللي حسسوك انك في سباق وكل دقيقة انت بتتأخر ومليون واحد بيسبقك وحولوا حياتك لضغط ومقارنات وجحيم ضحكوا عليك علشان تنسى انت جاي هنا ليه زي ما هما كمان نسيوا
الدنيا امتحان هتمتحنه وتمشي
لا انت اللي بتحدد وقته ولا الأسئلة اللي فيه
انت تجتهد في الإجابة وبس وفي النهاية ليك جنة بإذن الله تحقق فيها كل أحلامك
