من فترة اتقابلت مع واحدة صاحبتى هى كان معاها أولادها وأنا كان معايا ابنى فالمهم أنا سلمت عليها كويس جدا وسلمت على أولادها واحد واحد بحب واهتمام وهى تجاهلت تماما وجود ابني وطول الخروجة ماسلمتش عليه وأنا أحاول الاعبه قدامها واتكلم عليه وهى ولاهنا !!
الموقف بالنسبالى كان غريب جدا وضايقنى أوى وروحت يوميها وأنا زعلانة من جوايا إزاى أنا أسلم على أولادها بحفاوة كده واتكلم معاهم واهزر معاهم وهى متجاهلة وجود ابني كده ؟؟
المهم كان فى صوت جوايا بيقولى خلاص بسيطة لما تقابليها تانى فى أى مكان ابقى سلمى عليها بس واعملى نفسك برده مش واخدة بالك وبعدين ألاقى صوت تانى أقوى بيقولى لا لا أنا استحالة أعرف اعمل كده دول أطفال وبيبقوا فرحانين بالناس ازاى اكبسهم وفى النهاية فضلت مضايقة والموقف عدى وخلاص
قريب جداا عرفت أحاديث نبوية غيرت موازينى وحساباتى تماما
الرسول صل الله عليه وسلم كان بيقول:
(أقربكم منى مجلسا يوم القيامة أحسنكم أخلاقا)
وعرفت إن من حسن الخلق خصلة اسمها :
(حسن التحية)
وحسن التحية ببساطة هى:
(السلام باهتمام +وجه بشوش + كلام طيب )
وقال الحبيب صل الله عليه وسلم:
(إذا التقا المؤمنان فتصافحا فإن أحبهما إلى الله أحسنهما بشرا بصاحبه)
بشرا بكسر الباء يعنى أحبهما إلى الله اللى يقابل التانى كويس ووجه طلق وبشوش
قال الحبيب أيضا:
(إذا التقا المؤمنان فتصافحا وتساءلا نزلت عليها مائة رحمة تسعة وتسعون منها لأبشهما (أكثرهم بشاشة) وأطلقهما (اللى وشه مفرود ومهتم أكتربالتانى)
وأحسنهما مسألة بصاحبه (اللى بيسأل ويهتم ويقدر التاني أكتر)
وقال الحبيب صل الله عليه وسلم:
(إذا التقا المؤمنان فضحك كل منهما إلى الآخر ثم أخذ بيده تحاتت ذنوبهما (تحاتت يعنى سقطت بقوة) كما تتحات أوراق الشجر) يعنى كما تسقط أوراق الشجر فى الخريف
اللى عاوزة اقوله إن ربنا مابيضيعش أجر ابتسامة خرجت منك ولا أجر اهتمام اهتميته بحد ولاحتى أجر بشاشة وجهك وانت بتسلم على الناس
انت متخيل إنك تقابل صاحبك الصبح وانت رايح الشغل فتقف تسلم عليه بوجه طلق بشوش وانت بتسأل عليه ومهتم بيه وبعدين تمشى بس هتمشى وانت موازينك مقلوبة ميزان سيئاتك بقى فاضي وميزان حسناتك بقى مليان !!
حتى لو الطرف التانى ماقابلكش كويس تبسم انت وقابله كويس علشان هو لو زاهد فى الصدقة دى فانت محتاج الصدقة دى
(تبسمك فى وجه أخيك لك صدقة) ويبعث المرء فى ظل صدقته يوم القيامة فكتر بقى من الصدقات والحسنات والرحمات وصدقنى انت أولى
آخر حاجة ركز على نفسك وعلى سلوكك انت وماتركزش على سلوك غيرك راقب نفسك واشتغل على اصلاح نفسك بوعى واعرف إن الناس موجودين فى حياتنا كابتلاء (اختبار) لينا وكل موقف وحش بيحصل معاك من حد هو اختبار ليك انت من ربنا هيشوفك هتتصرف ازاى؟؟ هتتصرف بوعى وحكمة ولاهتتسرع وهتدخل فى صدام مع نفسك ومع الناس؟
"قد أفلح من زكاها وقد خاب من دساها
"وجعلنا بعضكم لبعض فتنة أتصبرون وكان ربك بصيرا" 🤲🏻🤍
~هبة أبو المجد
