جاتلي فترة انتكاسه فظيعة وبعدت عن ربنا وقطعت الصلاة والورد اليومي والصيام والأذكار وكانت حجتي إني ثانويه عامه مش قادره واكيد يعني ربنا هيسامحني، مهو انا يعني تعبانه وشقيانه في الدروس والصحيان بدري مش مشكله بقي! وشيطاني في الخلفيه بيسقف برافو خدي استراحة لـنفسك من مشقة العبادات!
مشقة؟!
يا الله علي نعمة العباده! ياالله!
محستش بيها غير وانا بعيد وببعد وادي لـنفسي اعذار وابعد وابعد طاب وبعدين! ولو مُت! الحقيقة إني انا مرتحتش ثانية واحدة كل حاجه باظت حرفيا
نفسيتي
علاقتي بصحابي
علاقتي بأهلي الي اصبحت مُنعدمه
دروسي ومذاكرتي
نوم متواصل طول اليوم، حتي وانا نايمه حاسه بوجع وعدم أمان! يا الله عفوك
هَم زي الجبل فوق قلبي مش عارفه اتنفس مش قادره استحمل الوَحشه دي مش قادره)) ٠
باخد خطوه وارجع عشره علي استحياء،
لكن كل مره بضعف كان بيجي في بالي قول الله تعالي(إِنَّ اللَّهَ يَغْفِرُ الذُّنُوبَ جَمِيعًا)
يُثلج قلبي بعد قراءتي للآيه مراراً وتكراراً، يارب يعني انا عبدك العنيد الضعيف المُذنب هتغفرلي بمجرد توبتي! يا كريم!
فـ الحمدلله علي نعمة الإسلام
الحمدلله علي نعمة العبادات
الحمدلله علي نعمة الصحه الي بنقدر نقوم بها بـ العبادات
الحمدلله الذي أذن لنا بيوم جديد لـنعبده به
الحمدلله حتي يرضي والحمدلله عند الرضا والحمدلله بعد الرضا♡♡♡♡
