سعاد : ها يا بنتي جهزتي حاجة فطار بكرة متنسيش خطيبك معزوم عندنا
نور: جهزت اهو يا ماما، تفتكري الدنيا هتعدي على خير
سعاد : تفائلي بالله يا شيخة ايه ممكن ميخليهاش تعدي
نور : أصلي قاعدة بفكر في بكره، يا ترى أوقع كوبيات التمر، ولا أقع بطباق الشوربة، ولا ممسكش حاجة خالص، ونتكعبل أنا وطبق المخلل في السجادة؟
سعاد : يا شيخة بس بقي حرام عليك انت متعرفيش ان لسان ابن ادم موكل بالقول الي هتقوليه هيحصلك ارحمينا
نور : يوه يا ماما بقي كفاية تقطيم فيا
امجد : اسمعي كلام أمك بلاش لسان طويل وخدي الفاكهة دي افرزيها بلا خطيبك بلا بتاع لسه هجوزك كمان ٥٠ سنة متستعجليش
نور : يا ماما بقي شايفة جوزك يعني كمان ٥٠ سنة
سعاد : متخافيش يا بت هجوزك هو ابوك دمه خفيف
امجد : افرض طلع عايز يغدر بيك
سعاد : وانت حد يقدر يغدر بيك انت وبنتك
نور : ايوه طبعا ربنا يباركلي في عمره
سعاد : لا يا عين امك عشان انت قادرة اصلا مش محتاجة حد يجيب حقك
نور: شايف يا بابا
امجد : لا مش واخد بالي انا مراتي طول عمرها مبتقولش حاجة غلط
سعاد: تعيشلي يا روح قلبي
نور : يعني طلعت انا الغريبة طب أنا رايحة افتح التلفزيون يا عصافير الحب
سعاد : متفتحيش التلفزيون علي الفطار
نور : هنقاطع بقي المسلسلات وكدة عشان ده شهر عبادة
سعاد : لا الاعلانات بتشلني ورامز بيشلني اكتر وانا ست عندي الضغط
امجد : الإعلانات اغلبها بتشجع علي منتجات المقاطعة والاهم كل دي كهربا أنت عارفة الفاتورة كام الشهر ده
نور : الاعلانات دي فعلا مستفزة بيحسسوني ما هو إحنا مش هنفطر؛ هنستنى كل اللي بيتمنى لنا صوماً مقبولاً وإفطاراً شهياً وبعدين نبقى نفطر بقى مش مهم!!
سعاد : ايوه معاك حق الفاتورة عالية فعلا ما هي منورالي كل انوار البيت
امجد : معقول منورين النور وانت موجودة
سعاد : يالهوي عليك وعلي كلامك انا هأجل بقي موضوع الاطباق واقوم اعملك الكنافة
امجد : ايوه بقي دلعيني
أنت تقرأ
يوميات زوج صايم ( مكتملة)
Humorهتكون عبارة عن مشاهد لعيلة مصرية هتبقي مصاحبانا طول رمضان ويارب تعجبكم