يوميات زوج صايم ( مكتملة)

نفسه في حاجة يشربها

باسم : أنا نفسي في حاجة اشربها
علا : عايز تشرب ايه انا عاملة تمر وفراولة
باسم : الواحد عايز يجدد كدة
علا : مش كفاية اختراعات الفطار الي بتكون قبل الفطار بعشر دقايق
باسم : طب ما انا صايم ونفسي في حاجة اشربها
علا : يعني العصيرين وشوربة المشروم وشوربة لسان العصفور الي معمولين مع ٨ كوبايات شاي و٤ فناجين قهوة بعد الفطار ونفسك في حاجة تشربها
باسم : انت هتعدي عليا يا علا ما أنا صايم الله
علا : لا أبدا اشرب من دمي يا باسم مع لترين مايه ان شاء الله هتبقي راضيت عندك الحاجة الي عايز تشربها
باسم : عارفة انا نفسي في عصير ازرق كدة كنت شوفته في فيلم
علا : طب أنت عارف اسمه
باسم : لا بس هو كان شكله حلو
علا : طب خد مايه يا باسم واستهدي بالله يا حبيبي ونقفل وصلة الامنيات دي عشان انا مش جني مصباح علاء الدين