عند سعود وشهد اللي كانوا مستمتعين بالمنظر وغروب الشمس
شهد : ودي اتأمل بدون توقف
سعود : تأمليني انا وخليني اخذ حقي بالتأمل
شهد ابتسمت بخفه : ما كفاك تأملي البارح ؟
سعود : ولا راح اكتفي دامني مقابل وجهك
شهد احمر وجهها بالاحراج وهذا مبتغى سعود : سعود !
سعود حضنها من جنب : ما ودك نقرب الزواج ؟
شهد وهي تدفه : يعني مسوي ذا كله عشان نقرب الزواج
سعود : افاا ما اسويها جيتك مشتاق
شهد : لا لا واضح تراك
سعود : تلوميني طيب ؟
شهد بتنهد : سعود كم مره قلت لك ما اقدر تعرف الحين ضغوط الجامعه ما ادري الحق على ايش على الاختبارت ونهاية تخرجي ولا على الزواج لا تهلكني بعد !
سعود بضيق : خلاص يا بنت لا تصيحين
شهد وهي تمسك كفه : هي كلها ثلاث شهور وخلاص !
سعود : الله يعين
شهد : سعود ! جايين نغير جو ولا تعكر مزاجنا ؟
سعود : لا والله جينا نغير جو ، انسي انسي وش قلت
شهد : وين سفرتك الجايه ؟
سعود : إيطاليا
شهد : بتطول ؟
سعود : اسبوع كذا على حسب اذا ما تغير الوضع
شهد : تعب عليك والله !
سعود : بعدها راحه ان شاءالله ماعاد بعدها سفره باخذ اجازه
شهد : كويس ترتاح
سعود : انا راحتي مقابلك
شهد وهي تقرصه من كتفه : ما تتوب !
ضحك بعلو صوته وهو يحضنها : شهد احبك
ابتسمت وهي بحضنه ودايم مشاعر سعود تفضحه وهو ما يكتمها يعبر عن اللي بخاطره وبذات شعوره معها وحُبها لها
سعود بهمس : ما تقولين وانا بعد ؟
شهد : وانا احبك
شد على حضنها يقبل عنقها لثواني وهو يبتعد يناظر ملامح وجهها : خففي خجل !
شهد : كيف اخفف وانت كل شوي محرجني !
سعود وهو يلمس خدها : تعودي لا تخلين للخجل فرصه بيننا
شهد ابتسمت : بحاول
سعود : الحين بينزل لك احلى عشا
شهد : تكفى لا تقول ذبيحه !
ضحك سعود : والله كان ودي بس قلت مع الأجواء ذي يبي لها مشاوي على كيف كيفك
شهد : الله الله بيطبخ لي الطيار !
سعود : لعيونك بس
ابتسمت وهي تنطق : تسلم لي هالعيون
سعود ابتسم وهو ياخذ اغراض الشوي ويحط المنقل بعيد شوي عن الجلسه ويبدا يطلع الدجاج ويحطها ف المنقل يشويها
اخذت شهد ترتب الجلسه عشان تخلي مساحه للعشا ، ووقفت جنب سعود تشوف كيف يشوي
شهد : والله فاتهم من يدك بيصير لذيذ !
سعود : بناخذ لهم بس زياد ولمى طلعوا اليوم جده
شهد بصدمه : اما ! ما قالت لي
سعود : ما دريت الا اليوم حتى زياد ما قال عُمر مصوره لي
شهد : وش فيها ذي دايم تقول لي بس غريبه؟
سعود : امكن طلعوا مستعجلين فجأه
شهد وهي تطلع جوالها : اوريك فيها هالحمار !
ضحك سعود وهو يشوفها تتصل على لمى
ردت لمى وهي تبعد الجوال عن اذنها من سب شهد لها وهواشها لين سكتت : لا حول ولا قوة إلا بالله ، شفيك من مطلع شياطينك علي ؟
شهد : انتِ طلعيتها لنفسك يا حيوانه جاحدتني ولا قلتِ لي انكم بتطلعون جده اليوم !
لمى ضحكت بسخريه : تصدقين حتى انا ما دريت الا الصبح جاني زياد وانا توي صاحيه من النوم حتى لقمة اكل ما اكلت قال بنطلع فجأه
شهد : وليه طلعتوا فجأه فيهم شي ؟
لمى : لا بسم الله بس اتصلت عمتي تقول وينكم من زمان وتعرفين لنا شهر ما جينا لهم من شغل زياد واختباراتي وهالاسبوع فضينا وطلعنا
شهد : اووف فاتكم سعود مسوي شوي وقال بناخذ لكم بس طلعتوا مو فيه
لمى : يا الخيانه تشوون بدوننا !
شهد : والله وش نسوي فيكم ؟
ضحكت لمى : بالعافيه عليكم بس افتحي المكبر خليني اكلم سعود
شهد وهي تفتح المكبر وتكلمت لمى : كيفك يا طيارنا ؟
ابتسم سعود: الحمدلله بخير ، كيفكم انتم ؟
لمى : تمام الحمدلله ، تعوضنا عن المشاوي اذا جينا عشان ما نزعل
سعود : افا ولا زعلكم ابشروا
ضحكت لمى : تبشر بالجنة
قفلت المكبر شهد وهي ترفع الجوال لاذنها : مطولين؟
لمى : لا بس لين السبت ونرجع
شهد : كويس بنطلع المول لا جيتوا
لمى : ان شاءالله يلا ما أطول عليك تمتعوا
شهد : مع السلامه يا روحي
قفلت منها وهي توقف جنب سعود
شهد : عطني بجرب
سعود : لا بتحترقين ما تعرفين
شهد : سعود ! عادي اجرب وعلمني وانت حولي ما بيصير لي شي !
سعود تنهد وهو يمد لها الاعواد ويعلمها كيف تشويهم : انتبهي لا تطيح ولا تمسكين المنقل تراه حار ابعدي يدك عنه
هزت راسها وهي تلف الاعواد لجهه الثانيه حتى تستوي من جميع الجهات
التهى سعود عن شهد وهو يجهز الخبز ويجهز الببسي
طاح عود منها وهي تحاول تشيله وما تلمس المنقل لكن لمستها صرخت بوجع : احح
التفت سعود بخوف وهو يتجه لها : وريني وين حرقك
مدت يدها وهي توريه الاصبع نطق : الله يهديك قلت لا تلمسينه !
شهد بوجع من الحرقه : سعود لا تجلس تأنبني !
سعود : خلاص اهدي بشوف سيارتي فيها مرهم حروق
اتجه لسيارته وهو يفتح الدرج يطلعه وكان جايبه احتياط
رجع لها وهو ياخذ يدها يمسحه عليها : الحرقه بسيطه شويات ويخف الوجع ، اجلسي ولا تسوين شي !
شهد : تعاملني معاملة الطفل خير؟
ضحك وهو ينطق : ابي راحتك ما اعاملك معاملة طفل
شهد عطته نظره وهي تكمل اللي سواه سعود وتحط المشروبات على جنب وتوزع الخبز على السفره
