ناظرته تشوف تجاهله لها ، ينكسر قلبها وتوجعها روحها ، الشخص اللي حبت حياتها معها يصد عنها وهو كان اقرب لها من رمش عينها
جلست على الكنب الثاني تلهي نفسها بالجوال ، ترفع نظرها كل دقيقه تتفحصه ، كان جالس وقدامه اوراق شغله
تنهدت بهمس لكن سمعها ورفع نظره يشوف ملامحها المتقلبه ، رجع نظره للأوراق وهو اصلاً حاطها قدامه كذا لاهو قادر يستوعب الكلام اللي قدامه من وجودها ولا هو اللي قادر يتحمل صدته
وقف بانزعاج واضح لها ، وهو ياخذ مفتاحه واللي يبين لها انه بيطلع
ناظرته وهي تحترق توقف وراه تمسك كفه تلفه لها
ناظرها ببرود اوجع قلبها وهو ينطق : نعم؟
لمى : شفيك زياد ؟
زياد : وش فيني ؟
لمى : تسألني أنا وش فيك ؟ ، ما تشوف حركاتك معي ؟ ما تشوف تعاملك وكيف متجاهلني وصاد عني
سكت يمشي لكن سحبته مع كتفه تدفه مع صدره نطقت بغصه : وش مسويه عشان تعاملني كذا لا تتجاهل كلامي وجاوب !
ناظرها يسكت لثواني ينطق : اسألي نفسك ليه تسأليني ؟
لمى : يعني لو اعرف بسألك ؟
زياد : مشكلتك ذي مو مشكلتي
لمى : ليه ما تقول؟ إذا أنا غلطانه بعتذر بس قول وش اللي سويته يخليك تسوي كذا
زياد مشى يتجاهلها متجه للباب
نطقت بصراخ : تكلم زياد لا تهرب مثل كل مره !
غمض عينه يطلع يقفل الباب بقوه وراه
صرخت تضرب رجلها بالكنب ، جلست بتعب تمسك راسها
من تجاهله لها وخروجه ، واللي قهرها اكثر نظراته البارده لها
طلع من البيت بعصبيه يركب سيارته ، ضرب الدركسون بيده اكثر من مره : كيف تسوي نفسها مجنونه ولا تعرف سواتها كيف !!
ناظر البيت لثواني وهو يحترق ، شغل السياره يطلع من الحوش متجه لأبعد مكان عنها
تنهدت بضيق تحاول تتذكر وش سوت حتى صد عنها ، وقفت تصعد لغرفتهم تحاول تلهي نفسها ولا تفكر فيه ، أخذت كتابها تذاكر وهي تذاكر بدون فهم عقلها كله معه ، تخاف عليه لأنه طلع بعصبيه وراح ، تخاف من سرعته الجنونيه إذا عصب ولا يهتم بروحه ، قفلت الكتاب ترميه على جنب ، طلعت للبلكونه تجلس تاخذ نفس ، تهوي روحها المحروقه ، احتارت بنفسها وش الغلطه اللي غيرته عليها ، ليه ما يصارحها ؟ دمعت عينها بقهر من حركاته وتجاهله وصده وإهمالها وكأنها مو موجوده قباله
وقف على جنب الشارع يناظر الطريق ، تايه مايدري وين يتجه ، كانت هي كل وجهاته متى ماصعب عليه شي يتجه لها الحين هي اللي صعبت عليه كيف يتجه لها ؟
تنهد يامي براسه على المرتبه ، يضغط على عينه يحاول يهدأ
نطق بحيره : وش قصرت فيه أنا وش ؟ حبي ماكفاها تتجه لغيري ؟ غرقتني بحبها وهي غارقه بحب ثاني !
صرخ بقهر من فكرة حبها لثاني : ليه؟؟؟ ليه !!!!
شوق : فزت تتجهز يوم درت اننا رايحين لام حبيب قلبها
ضحكت شهد : شدعوه ؟
شوق : يابنت اثقلي ، خليه يشتاق لك مو كل شوي قدام وجهه
شهد : هو بس اروح عنه يشتاق ، ليش اقطعه ولا أقابله ؟ حرام
تنهدت شوق : ما تفهمين ماتفهمين الله يعين
شهد وهي تغني : وشلون مغليك وانت اللذي علمتني حبك
شوق : الله يجيرني ف مصيبتي
شهد تكمل : ياهاجسي عشقي عيونك
شوق : كملي كملي مكياجك يا هايمه
ضحكت شهد ، تكمل آخر لمساتها تحط الروج الأحمر ، وتاخذ اكسسوارتها تلبسها ، وقفت تتأمل شكلها واخذت العطر تختم فيه تعطر نفسها
شوق : الحمدلله خلصتي يلا نمشي امي تستنى تحت
شهد التفتت : ايت عبايه اخذ ؟
شوق : اي شي امشي كلها عبايه
شهد : لا وش يليق على لبسي
شوق تنهدت تناظر عباياتها : خذي الكحلي
شهد طلعتها تلبسها وتاخذ شنطتها وجوالها تنزل مع شوق لامها اللي تنتظر
عايشه : يلا امشوا
وقفوا قدام السياره نطقت شهد : بسوق أنا
عايشه : أنا بسوق خليك
شهد : يمـ
قاطعتها عايشه : يابنتي خليني أسوق شفيك ؟
شهد : شدعوه تسوقين وحنا مفروض تجلسين مثل الاميره
ضحكت عايشه ونطقت : انتم خليكم اليوم الأميرات
ضحكوا وركبوا يتجهون لبيت منير
