عبدالرحمن : بشر انجلدت؟
احمد وهو يغمز: نوو بيبي جدو يقول خل زياد حبيبي يجي ويزوجنياه بالسر
زياد : تخسى وتعقب مكتفي باللي عندي
احمد : اعع انت والمخيسه ذيك
زياد : والله مو المخيس إلا انت يا الأشهب
احمد : يع تجيبون المرض
سعود : خل الكلام عنك وكمل بس
احمد : ما تنسى الشغل انت !
سعود : ما أنسى يا قلبي انت كمل كمل
أمجد كان ساكت يناظرهم وأخذ القدر يحرك بهدوء وهم كانوا بعيدين عنه
عبدالرحمن : ذا شفيه؟
زياد : مدري من يوم رجع وهو متغير
احمد : صاير نفسيه
سعود : اسكتوا ما تدرون عن ظروفه
عبدالرحمن : ايه يلا يلا خلصوا بسرعه الوقت راح
بدأو يسوون الغدا بعد دقايق انتهوا وغطى زياد القدر ينطق : شويات واحد يجي يحط الملح
احمد : خلاص أنا أحطه بس ذكروني
هز راسه زياد وتقدموا يدخلون للمجلس ينطق غياث : ها زينتوه ؟
احمد : والله ياهو بيطلع فنان
لمى بهمس : الله يستر يا جدي
احمد وهو ينزل غترته يلفها ناوي يلسعها : اقول !! سمعتك ترا
التفت زياد يمسك كتفه : وش بتسوي ؟
ابتسم بوهقه يربطها عصبه على راسه : اعدلها بس عشان أسويها عصبه
ضحكوا ونطقت لمى : ياخي لا تهايط اجلس بس
احمد : حشمة لجدي ولا وريتك الهياط
غياث : هي بقت فيها حشمه ؟
احمد بضحك : شدعوه جدي !
غياث : شدعوه تعرف حركاتك !
احمد : نمزح يبه
ضحك غياث والتفتت مها تناظر لمى بنظرة سخرية والتفتت لمى من حست بانها تناظر لوقت تلف لها ، والتفتت مها تسولف مع عايشه
تنهدت لمى من تصرفات مها اللي مو قادره تتحملها
جلسوا يسولفون بمواضيع مختلفه وبين الضحك وبين مناقرة احمد للبنات وخاصه شوق اللي يحب ينرفزها اكثر
نطق عبدالرحمن : قوم احمد حط الملح
وقف احمد يتجه للخارج يوقف عند العزبه ياخذ الملح ويرش لكن بلحظه انفتح غطا الملح وانكب الملح بغزاره
شهق بخوف يرفع الملح من شاف تناثره كله ينطق بوهقه : والله اني ودعت
التفت يناظر بجركل المويه يزيد القدر مويه عشان يروح طعم الملح ، اخذ الملعقه وهو يحرك فيها الغدا وقفل عليه يوقف يعدل نفسه من راعته بعد الملح يدخل المجلس بهدوء عشان ما ينكب نفسه
اجتمعوا حول الغدا وبلع ريقه احمد بخوف من طعم الرز
بسرعه مد يده يأكل قبلهم عشان لو كان ملح كثير ينحاش قبل يمسكونه
اكل الرز وفتح عيونه بصدمه من طعم الملح وتفله بوجه عبدالرحمن اللي جنبه
وصرخ عبدالرحمن بغضب : ياولد يا ......... أوريك
ركض بأقوى ما عنده للحمام يغسل فمه ويناظر وراه بخوف منهم
ضحكوا ومدوا الباقين يدهم ياكلون جاهلين عن سبب قومة احمد
وغمض عينه غياث من حس بطعم الملح ينطق : الله لا يبارك في عدوك يا الأشهب !
بلعوا اللقمه غصب والتفت زياد ينطق : والله اني داري وجهه من اليوم قالب انتظر يسوي شي طلع كاب الملح
سعود مسك بطنه : عز الله ودعنا
منير : ليته قال لنا ولا حطنا ف الأمر الواقع
غياث : مدري متى يعقل الولد ذا !
ضحكوا من سمعوا صراخ احمد والواضح ان عبدالرحمن صاده
احمد : تكفى تكفى والله بالغلط !
عبدالرحمن : الله يقرفك ياشيخ تفالينك ! والله ما أخليك
احمد : ياخي بالغلط الملح كثير عاد انت جنبي
تقدم يجر شعره ويضربه : جنبك مو جنبك بضربك عنبوا بليسك وش ذا
احمد بصراخ : خلاص ياخي خلاص
دفه عبدالرحمن وتقدم للمغاسل يغسل وجهه
