#زواج جِني ❤️ .
لـ ملاك المغـربي 💕 .
الساعة 12 فالليل :
حور ناظت مفجوعة واتعوذ من الشيطان شافت حاجة فالحلم خلتها ترعش مع بعضها 🤦🏻♀️ .
عند مؤيد صار نفس الشي ناض وجه معرق و حس روحه مازال مُراقب و الحلم اللي شافه يدعي ان يكون كذبه 🤦🏻♀️ .
________
فالمدرسة :
نور : يعني جاية ولا لا ؟
حور : مش عارفه يرا . نفكر مانجيش !
نور : في عينك فرح عمتي والله تزعل منك
حور : يـ نور عارفتني مانحبش نخلط بالعرب بالذات هلك سامحيني فيها انا عيت جدك عندي تمام لكن خوت جدك لااا
نور : مافيش حد بيكلمك ليش ماتنسي اللي صار ؟
حور : شن ننسى بالله ، دمرو حياتي حسبي الله فيهم 💔💔💔 .
نور : مش هكي يـ حُوري ، ليش تحبسي روحك تعالي احظري يوم حفلة الحنه والصالة فقط ، والله عمتي تزعل را بالذات انتِ وياها قريبات من بعضكن واجد ، وانتِ غالية علينا كلنا وربي فوتي اللي صار و ولا كأنهم قاعدين تعرفي حاجة شوفي الهواء وهما ماتشوفيهمش غير هيا يرا 🥺 .
حور ابتسمت : حاضر لكن يوم الحفلة و الفرح بس
نور : نجك نجك 😍😂 .. وحظنتها 🫂 .
___________
ومشى اسبوع علي نفس الروتين قرايه وقرمة وصماطة احمد اللي معش بطلها .. والرقم اللي ساكن لمؤيد والاحلام اللي تجيه هو و حور وشعورهم انهم مراقبين ديما
يوم الخميس
حور روحت من المدرسة و ماشيه في اتجاه حوشهم وبسبب الزحمة اضطرت انها تخش من الزقاق اللي فيه الباب الخلفي متاع عيت محمد عشان تبلط من الزحمة 🤦🏻♀️ .
حور ماشية في امان الله وتشوف عجوز تخوف شايفتها من قبل لكن وين مش عارفه
حور : سلامٌ قولٌ من ربي الرحيم 😳😳
العجوز تضحك : شن قتلك نا ؟ مش قتلك نفذي بسرعه 😈 ؟
حور اذكرت انها هي نفسها اللي تشوف فيها فالحلم وكانت تطلب منها حاجات غريبة : ش ش شن قلتي 😖 ؟
العجوز قربت منهاا بطريقة مُخيفة وكانت بنتها يعع : تجوزي مؤيد 😈 ، كلامي واضح نفذي والا مش ح نريحك طول عمرك 🔥 .
حور بخوف و تردد : حاضر يصير خير ان شاء الله 😳😳 .
في نفس الوقت مؤيد كاين طالع من الحوش وشاف حور تحكي مع روحها !
مؤيد ؛ هذي كنها بسم الله .. وعيطلها : حووور !
حور فاقت علي روحها والتفتت بعد شافت مؤيد اذكرت كلام العجوز وبحركة لا ارادية لقت روحها مكمله طريقها بدون ماترد عليه .
مؤيد : امفيكة 🤦🏻♀️ ... وحس ان مازال في حاجة تراقب فيه . تعوذ من الشيطان وركب سيارته ومشا شور الكفي .
_____
فالحوش :
حور تغير في دبشها وتحكي مع روحها : يـ ربي هذا شنوو .. عنجد مؤيد يراا .. بعدين من وين طلعتلي العفريته هذي .. يـ ربي شن ندير نا توا ! زعمه نحكي لماما ؟ لكن مستحيل تصدق 😭😭 تو تحسابني ميته علي مؤيد يـ ربيي هضيسماا
و التفتت لقت العجوز تبحت فيها وتضحك حور خافت وسمت بسم الله ❤️ وطلعت تجري تبي تكلم نور 🤦🏻♀️ .
