هلو من جديــدَ 😔😂
.
خل احجيلكم عاللهجة المصلاوية بما انو السؤال تكرر بالخاص
شوفو قبل لا اوضح الكم مسئلة اللهجة
نحن عدنا بالموصل مصطلحين الي هما
(موصلي ) و (مصلاوي)
زين شنو الفرق بينهم ؟؟؟
اني اكول الكم شنو الفرق
اللهجة المصلاوية (القح) هذة لهجة خاصة بأهالي الموصل الاصليين (قتولو وقلي واغشعكم ) الي يستخدمون حرف ال (غ) بدل من حرف ال (ر ) في اغلب الكلام
الي يتكلم بهاللهجة وماخذها ابآ عن جد هذا اسمه (مصلاوي ) يتكلم بهالطريقة 👇
لكن ....اقعد هوني .....غوح هنوك .....من عابت عيونك
واغلب السكنة الاصليين كانو ولازالو يقطنون بمناطق الموصل القديمة
اما (الموصلي) فهو الشخص الي عاش بالموصل وتأثر بلهجتها وثقافتها يعني متحظر
بس شلون يتكلم الموصلي ؟؟
يتكلم مثل لهجة صلاح الدين والانبار ويتكلم مثل محافظات سورية الحدودية مثل دير الزور ...الخ
عجل ... اكعد هينا .... روح غادي .... يول من جبح هالعيون ....
او قد يكون هالموصلي مو بس عربي قد يكون مسيحي او كردي او يهودي ... الخ وسكن الموصل فيما بعد
يعني كلمة موصلي ادل على موقع الشخص ومكان سكنه
الموصل مقسومة نصين نص عرب متحضرين
ونص مواصلة قحيين
وهسه حاليا اغلبية سكنة الموصل اصبحت من سكانها العرب
الي نزحو من القرى والنواحي التابعة لقضاء الموصل وخاصة بحلول عام ٢٠٠٦ ومنهم عشائر الجبور ..الحديدين ... السبعاويين ...الدليم .....الخ
زين بالنسبة للقوميات ؟؟
القوميات الطائفة المسيحية تتواجد تتواجد بقضاء الحمدانية واخوانا الشبك موجودين كذلك بسهل نينوى اما طائفة الازيدية متواجدين في قضاء سنجار والتركمان متواجدين في قضاء تلعفر وهكذا....الخ
كل قومية متجمهرة بمكان او قضاء معين ينجمعون بأسم محافظة نينوى مثل سلة الجكليت المشكل كل جكليته شكل
وكل الطوائف والعشائر والاديان عالراس
اتمنى اكون وضحت الكم جزء بسيط عن التساؤلات الي وردتني
❤️
