صــدفة الحــب

اليوم يوم و قد مر و اصبح ماض مضى فهل ينسى الانسان أمسا مؤرقا عاشه🕷🖤

{ممنوع الإقتباص أو إعادةنشر القصة أوجزء من أحداثها 🚫⁉}

•في واحد الكاريان في أحد البراكات المكونة من بيت و مرح فيه الكوزينة واحد البنت لي مضورة بيها الكتوبة و حاطا قدامها واحد البيسي و كتحفض و سهر لي خلا في  التحت ديال  عينيها ليسيغن بحكم انه الوطني مبقا ليه والو و خاصها تسالي الحفاضة في أقرب وقت.
صونيا[بتأفف و تعب و هي كتهضر مع راسها]:اففف عيت فوقاش غنسالي و يدوز الوقت و ندوز داك الوطني بيخير و على خير و نفرح ميمتي يا ربي.
•تحل الباب و دخلات واحد المرأة لي العمر ديالها كيقارب ديك 43 عام  و هي كتمايل من تعب .
سميحة:الله الله الله العافية نايضة في الخضرة افف على الغلاء و مدار في سوق را جبت شوية ديال خضرة نطيب شي غديوة فاعلة تاركة البنتي .
صونيا[رسمات على وجهها ضحكة خفيفة و ناضت هزات القفة و بدات كتستف الخضرة في واحد ثلاجة صغيرة ]:قلت ليك خليني نمشي معاك نهز عليك غير القفة بعدا و راك عارفاني كنعرف نتشطر حسن منك هههههه.
سميحة[ كتنش على وجهها بزيف لي كانت دايرا إثر قطرات العرق بسباب صهد لي في زنقة]:لالا غير گلسي و قابلي حفاضتك و جيبي شي نقطة مزيانة  و تخدمي شي خدمة و  تخرجينا من هاد تمارة .
صونيا [حطات وجه ماماها بين يديها و تقابلا معاها يالعينين ]: و على انا هادشي كامل لمن كنديرو غير باش نخرجك من هاد العذاب لي كتعيشيه كل ليلة بسباب داك راجل و انا غندير مجهودي كامل و كثر باش نحقق هاذ الحلم [صونيا و هي كتلطف الجو]تخيلي معايا دابا سميحة سايقا شي رونج روڤر ويلي ويلي تي را بشاخ.
عمر[بصوت لي غليض و مبحوح بسباب الاستهلاك المزمن ديال الشراب]:واش كاين شي غدا ولا مقابلين غا ضحك و تكركير .
سميحة [بصوت خائف]:دد...ددابا غننوج...دووو دغغييا .
عمر [و هو مخنزر ]:و على من صباح شكنتي كديري يكما كنتي محنية {عمر و هو كيطلع فيها و يهبط }فين الفلوس لي خلصاتك بيهم مدام ليلة لبارح.
سميحة[كتقفقف  جبدات الفلوس و بغات تعطيهم ليه ]:هاهوما هاك .
صونيا [خطفات الفلوس من يد ماماها]:والله لشميتيهم و لا خديتيهم بغيتي تاني تشريهم شراب و تجيب صحايك يقصرو هنايا واش شي يعرق عليهم شي ياخدهم باردين .
سميحة[كتخرج فيها عينيها زعما باش تعطيهم ليه حيت مناقصهم مشاكيل].
عمر [ضحك بجنب ]:لمن خرجتي انتيا ولا كتحرشك مك عليا ها [ضار كيشوف في سميحة و هو مخنزر .... دار رجع كيشوف في صونيا و هو يمد يدو الشعرها و يدا كيمرر عليه يدو في لحضة و هو يجرها منو]: يا غطلقي ذوك. الفلوس يا مغيعجيك حال .
سميحة[و هي خايفا على بنتها و مشات كتجر فيه باش يطلق منها ]:طلق ليا من بنتي طلق .
عمر [دفعها تا طاحت و تضرب ليها راسها مع القنت ديال الطابلة ]:ماشي سوقك انت دخلي سوق راسك.
صونيا[يخوف طلقات الفلوس ]:مااااماااا طلق مني الحمار طلق.
عمر [باستهزء]:ملي طلقتي الفلوس قولي لي بغيتي اصلا مكيهمنيش شكتقولي.
صونيا[تاجهات الماماها و نوضاتها]:ماما ماما فيقي [ناضت جابت بصلة هرساتها و بدات كدوز ليها على نيفها]
سميحة [بدات كتحل عينيها بتقالة و شدات في راسها]:اميمتي راسي شنو وقع أبنتي صونيا
صونيا :دفعك داك الكلب على راسك و مشا
سميحة [كتقلب في بنتها ]:واش طرات ليك شي حجا أبنتي واش انت بيخير .
صونيا : انا  بيخير الحمد الله نوضي تسندي عليا نقلسك في لحاف.
•نوضات سميحة و قلساتها فوق لحاف و جابت ليها شوية تلج باش ديرو في ضربة .
سميحة[بعينين مغرغرين]:سمحي ليا أبنتي معرفتش نختار ليك أب لي يحن فيك و يعطيك الأمان .
صونيا[تنهدات]:ماشي موشكيل أماما تا حد ملقاها كيف بغاها معرفنا ربي شمخبي ليه من عقاب و أماما انت ديما كتقولي ليا {الله إن أحب عبدا إبتلاه } ولا هاذي نسيتيها و عاود وحدة أخرة {إن الله مع الصابرين }ولا تا نسيتيها
سميحة [عينيها دمعو]:الحمد الله تربيتي ممشاتش في الخاوي .
صونيا : تربيتك الحبيبة ممشاتش كاع في الخاوي محذك انت لي معلماني و ناصحاني تا حاجا مغتمشي في الخاوي

سميحة[ابتاسمات بتيسامة خفيفة]:الحمد الله إوا الخانزا صليتي ولا باقي{نغزاتها شي حجا في راسها} ااااي راسي ميمتي خيتي.
صونيا [بخوف]:واش كيضرم بزاف يكما نمشيو عند مي رقية تشوف ليك دقة و داويها ليك .
سميحة :لالا بلاش خليها غتبرا متخافيش .
صونيا : ماما نقوليك واحد الحاجة
سميحة : نعام قولي
صونيا : را معطيتش البابا الفلوس كاملين  خبيت منهم  هاكي خليهم عندك .
سميحة :ناري على المسخوطة كي درتي ليها .
صونيا :شتي ملي دفعك خديت منهم نص و خليت ليه شي لاخر .
سميحة :صافي خليهم عندك حسن حيت أنا غيلقاهم عندي .
صونيا :صافي واخة
                       *تسريع الأحداث*
•في ليل.
[جا داخل عمر الدار هو و صحابو و هو كيتمايل و يغوت بلسان تقيل ]: سميحة و سميحة اجي أجي ضربي لينا شي شطيحة .
سميحة[معنقة بنتها في البيت و كتبكي]:بعد مني عفاك صافي وسختيني مقديتي.
عمر[دخل عندهم البيت  و بدا كيجر فيها باش تنوض]:نوضي نوضي و باراكا من الفشوش
سميحة[تنترات منو ]:بعد مني أنا مبغيتش واش بزز.
عمر : اه بزز منك حيت مغتحشمينيش قدام صحابي لي قلت ليهم عندي الفراجا اليوم .
سميحة[صغرات عينيها ]: شناهي الفراجا واش أنا شيخة فين ما تسكر تجيب ليا صحابك أنا نشطح ليهم.
صونيا[كتغوت عليه]: واش انت كتسمي راسك راجل ها تاخد الفلوس من عند مرتك و تخرجها تشطح الذكورة حيت هذوك محال يكونو رجال أصلا .
عمر[ضار عندها بعينين لي حمرين هز يدو تالسما وصرفقا]: الكلبة لي ولداتك .
سميحة:بعد ليا من بنتي .
عمر[جبد واحد الخنجر من تجاكيتو و هز يدو تاسما و.....   ]

{نتمنا هاد الجزء يكون نال الإعجاب ديالكم الكبيدات نشاء الله عن قريب نلوح ليكم الجزء تاني لي غيوقعو فيه يزاف ديال الأحداث شنو في نضركم غيطرا و شنو هما الأحداث لي غيوقعو هادشي كامل غنعرفوه في الجزء تاني إنشاء الله 🦋🍃}
~|في أمان الله و حفظه تشاو تشاو🤗🌹|~
✍️ بقلم:kakitawa 🌺