صــدفة الحــب

كل شخص في هذا العالم يعيش لنفسه فقط فلا تكن غبيا و تفكر في شخص ليس من ممتلكاتك😉

{ممنوع نشر أو الإقتباص من القصة أو إستخدام جزء منها?!🚫 }

صونيا[كتغوت عليه]: واش انت كتسمي راسك راجل ها تاخد الفلوس من عمد مرتك و تخزجها تشطح الذكورة حيت هذوك محال يكونو رجال أصلا .
عمر[ضار عندها بعينين لي حمرين هز يدو تالسما وصرفقا]: الكلبة لي ولداتك .
سميحة:بعد ليا من بنتي .
• عمرجبد واحد الخنجر من تجاكيتو و هز يدو تاسما و غرسو في الجسد ديال سميحة .
صونيا [كتغوت بأعلى صوت و دموعها لي ولاو شلال]: مااااامااااا أش درتي الحيوان الكل أش درتي قتلتي ليا ماما حرام عليك حرام .
•عمر ضار جيهتها و تم غادي قاصدها بخطوات تقيلة و هو كيتمايل .
•ضورت راسها يمين شمال هزات واحد الكورسي ديال الخشب و لاحتو عليه و خرجات لقات بلي صحابو هربو هزات سوارت لي كانو فوق طابلا خرجات و سدات الباب ديال البراكة و عمر لي كيغوت و كيخبط في الباب دنيا كلها عمرات و ناس كلهم كيتفرجو شدات تيليفون ديالها و عيطات البوليس أقل من نص ساعة جاو دنيا عمرات بيهم و لومبيلونص لي تسمع صوتها و هي جايا بسرعة كبيرة دخلو البوليس الدار و خرجو سميحة مغطينها كلها بليزار بيض مشات صونيا كتجري عندها و ركابيها مهازينهاش تنوض و طيح و تمسح في دموعها بالكمام ديال تريكوها .
صونيا [ وهي شادة في يد ماماها لي كانت خارجا من ليزار و عرات ليها على وجهها ]:علاش أماما خليتيني و مشيتي علاش ياك قلتي ليا غتبقاي معايا تنحقو كاع داكشي لي بغينا لمن خليتيني لمن .
•نطق واحد من هاذوك لي كانو كيدفعو في البياص لي فيه سميحة و قال أختي واخة تحيدي را خاص ضاروري نديوها دابا .
صونيا [بدموع لي وصلو ليها العنقها ]:غير 5 دقايق الله يرحم الوالدين را عمري غنعاود نشوفها غا نولي نشوف غا طراب فوق منها.
•شاف في لاخر لي جار معاه البياص و حرك ليه راسو باش يخليها واحد شوية .
•داز واحد شوية دالوقت و رجعات صونيا يد ماماها البلاصتها و باست ليها راسها الآخر مرة و غطاتو بديك ليزار جرو البياص و طلعوها في لومبيلونص اما صونيا لي طاحت في الأرض و كتبان ليها حياتها ولات ضلام بلا ماماها جات واحد جارتهم و هزاتها و قالت ليها البراكة في راسك و كلساتها في واحد الكورسي .
شوية صونيا بحالا ولات كتحلم أحلام اليقضة شافت ماماها لابسا البيض و كلها مضويا بحال شي قمر و جات عندها و حطات يديها على حناكها و قالت ليها أنا ديما معاك و الحلم ديالنا غنحقوه صافي أبنتي متخلايش على الحلم ديالنا .
صونيا [هبطو دموعها ]:كل شي كان على قبلك و تا دابا واخة مشيتي غندير على قبلك هادشي.
•ترسمات على وجه شبح ديال الأم إبتيسامة حنينة و تبخر بحالا معمرو مكان.
{بعد 30 دقيقة بعدما تهدنات صونيا شويا}
•جا عندها واحد البوليسي باش يسولها شنو طرا.
البوليسي: يمكن ليك ابنتي تعاودي لينا شنو وقع .
•صونيا عودات ليه كل شي و هي كلها حزن على الموت ديال ماماها  لي كانت كتحلم هي وياها و ضحك هي وياها سهات واحد شوية و لي كانت كدوز فيها سينتا ديال حياتها حتى فيقها صوت ديال البوليسي.
البوليسي :واش عندك أبنتي فين تمشي حيت الدار خاص تبقا واحد المدة مسدودة باش نديرو إعادة تمثيل الجريمة يعني ميمكنش ليك تبقاي هنا.
صونيا [بعيون دابلين و مغرغرين]:اه غنمشي عند جداتي نقلس معاها و هي نيت الأم ديال ماما .
البوليسي :مهم أبنتي لكان عندك مضيفي فيمكن ليك تجي المركز .
صونيا :واخة، [تفكرات شي حجا و ضارت عند البوليسي] واش نقدر ناخد شي حاجة من الداخل .
البوليسي [حرك راسو بإيجاب ] :أه ابنتي و متعطليش الداخل .
•دخلات صونيا خدات البيسي ديالها و كتوباتها و واحد زيف دايل ماماها شماتو و نزلات دمعة حارة على خدها هزات دوك الفلوس لي خلات عندها ماماها وشي حوايج دياولها خشات كلشي في واحد صاك كبير وخرجات جا عندها البوليسي .
البوليسي :يمكن ليك أبنتي تمشي ولحتاجيناك غنعيطو ليك.
صونيا: واخة .
•تاجهات الطاكسيات الكبار ركبات و تاجهات عند جداتها لي هي عينيها من الطف خلق الله لا هي لا خالتها سمية ، وصلات العندهم دقات في الباب تسمعو خطوات تقيلة باينين ديال شي مرا مسنة تحل الباب ترسمات على وجه جداتها سعدية ابتسامة فرح ملي شافت بنت بنتها.
سعدية [بنبرة صوت فيها فرح و ترحاب ]:أهلا أهلا ببنت بنتي الغزالا نهار كبير هذا كون غير قلتي ليا راك جاية نوجد الأرض بالوريدات بحالك أوريدتي ذخلي ذخلي متبقايش في الباب .
•شوية ختافات ديك الابتسامة ملي شافت صونيا كتبكي .
سعدية[شداتها من كتافها ]:فيناهي ماماك .
صونيا ساكتة و غير كتبكي و لسانها مبقا قادر ينطق تا كلما.
سعدية[كتحرك في صونيا من كتافها ]:دوي أبنتي دوي فيناهيا بنيتي كبيدتي.
صونيا [بتلعتم في الهضرة ديالها]:م...م...ماتت مام..ما م..مشات الحبيبة د...ديالي  مشات ميمتي امامي مشات .
سعدية [ طاحت الأرض و بدات تتخبط في حناكها و في فخادخا]: بنتي اميمتي خيتي مشات مشات نوارتي مشات مشات الحنينة عليا و تسول فيا مشات.
•جات سمية كتجري و هي معارفاش اش طاري و الغوات لي كتسمع ديالاش تا كتبان ليها ماماها طايحا و كتغوت و تقول مشات بنتي طلعات راسها لقات بنت ختها كتبكي و معنقا شكارتها محسات غير بدموعها لي بداو كينزلو بعدما عرفات انهو ختها فارقات الحياة غوتات و نوحات قد ما عيات هي و ميمتها دوزو الجنازة و ناس عزاو و مشاو شي عزا و شي تشفا كل واحد و شنو كيقول و شنو كيخبر و صونيا غا حاضيا و معرفات واش تَصْبَرْ ولا تْصَبِّرْ .

•

•

بعد مرور فترة قصيرة .
•صونيا كتجري في وسط واحد الغابة و كتحس بشي واحد تابعها سلام و معارفاش فين غادة حتى طاحت في واحد الحفرة  ، فاقت صونيا مفزوعا كتغوت ، جات عندها سمية و سعدية كيجريو يشوفوها مالها .
سمية [بفزع]:مالك اصونيا مالك [و هي كتمرر يدها على وجه صونيا ].
•صونيا منطقات بوالو إلا انها تلاحت في الحضن ديال سمية و ولات كتبكي .
•بدات سمية كتهدن فيها و طمنها انه را مكاين والو .
سمية [موجها هضرتها السعدية]: ماما غا سيري تنعسي في بلاستك انا غنبقا معاها هاد ليلة .
سعدية : غا سيري ابنتي تنعسي راك غدا فايقا بكري الخذمة خليني انا نبقا معاها.
سمية: لالا أماما صافي غا سيري انا بغيت نبقا معاها. سعدية : لي بغيتي أبنيتي .
•سمية تخشات حدا صونيا و عنقاتها و بدات كتمرر يديها على شعر صونيا لي بعد مدة قصيرة غرقات نعاسها ولكن واخة هكاك كتقفز من نعاسها ولكن ديما سمية كتهدنا و كترجع تنعس .
•صبح صباح {أصبحنا و أصبح الملك لله } بضبط 8:30.
•فاقت سمية قبل صونيا حيت عندها الخدمة خلاتها ناعسا و تسلات من النموسية يلا متفيقها طبعت على خد بنت ختها قبلة و خرجات من البيت لقات سعدية  موجدة ليها الفطور و قالسا في الطبلة.
سعدية: كي صبحتي أبنتي مزيان .
سمية:الحمد الله أماما .
سعدية: و صونيا حبيبتي .
سمية :البارح ليل كاملة هي تقفز منعساتش كاع مزيان فين ما ضربها الفيقا تجي تعنقني .
سعدية : الله على بنيتي الله يا ربي فرجها عليها يا ربي .
سمية : أمين أماما .
•فطرات سمية و خرجات الخدمتها أما ضونيا لي دازت شي ساعة عاد بدات كتحل عينيها بتقالة و كتحك فيهم .
صونيا [ وهي باقا فوق متكية] : اففف تعطلت في نعاس [قلبات حداها على سمية ملقاتهاش و عرفات أنها مشات الخدمة،ناضت و مشات الكوزينة حيت عرفات أنه سعدية غتلقاها تما ].
صونيا: صباح الخير جداتي الحبيبة.
سعدية[بابتسامة بشوشة على وجها]: صباح الخير الحبيبة ديالي كي صبحتي مزيان .
صونيا: لباس الحمد الله [ حدرات راسها و نطقات ] سمحو ليا على البارح برزطتكم .
سعدية : ويلي ويلي قداش قلتيها واش انت فين ما نديرو معاك شي حجا تشكرينا او بزاف را هادشي كنديروه حيت كنبغيوك أزين ديالي فهمتي.
صونيا : حتى أنا كنبغيكم ألميمة أحسن حجا كاينا في حياتي هوما وجودكم حدايا.
سعدية : ربي يخليك لينا النويويرة ديالي .
[تسريع الأحداث بعد شهر1]
•تسمع دقان في باب ديالة واحد الغرفة.
صونيا [مهزاتش عينيها من حفاضتها ]: ذخل .
سمية [حلات الباب ]: هانا البنت اختي جبت ليك أحسن و أحسن زبيب باش يولي عند الذكا فين وصلتي بعدا.
صونيا :ذكاء أخالتي ذكاء اااه لوكانت معانا ماما دبا كون راها تاهي كالسا حداية دابة الله يرحمك أماما كنتي من أحسن الحوايج في حياتي شافت البعيد و تفكرات شي حجا من دكراياتها مع ماماها .

{نتمنا هاد الجزء يكون نال الإعجاب ديالكم الكبيدات نشاء الله عن قريب نلوح ليكم الجزء تالت لي غيوقعو فيه يزاف ديال الأحداث تا هو شنو في نضركم غيطرا و شنو هما الأحداث لي غيوقعو هادشي كامل غنعرفوه في الجزء جاي إنشاء الله 🦋🍃}
~|في أمان الله و حفظه تشاو تشاو🤗🌹|~
✍️بقلم:kakitawa🌺