صــدفة الحــب

لا تنتضر من يشعر بحزنك و يخبرك أني أعرف بشعورك فلا أحد سيحس بما تشعر إلا نفسك 😙

{ممنوع الإقتباص أو إعادةنشر القصة أوجزء من
أحداثها 🚫⁉}

•سمية لي بانت ليها صونيا سهات بدات كتشير بيدها قدام عينين ديالها.
صونيا {قفزات من سهوتها}: ن... نعام سهيت واحد شوية.
سمية: ماشي مشكيل مهم هانتي كولي و انا غنمشي دابا الخدمة متخلي والو في طبسيلك.
صونيا : غناكل داكشي لي قديت عليه.
سمية :يلة نخليك.
•خرجات سمية و خلات صونيا غارقا في داكشي لي كانت كدير.
{تسريع الأحداث بعد مرور اسبوع و لي هو يوم الامتحام الوطني كلشي متوتر و كلشي على أعصابو}
سعدية{شادة وجه صونيا بين يديها}: بنتي متخافي موالو كلشي غيدوز بيخسر و على خير و غتكوني نشاء الله انت لولة كي ديما.
سمية : هانتي أصونيا ها هوما 4 ديال الأقلام و ستوليات تاهوما و الحاسبة و داكشي كاع لي غتحتاجي.
صونيا: افف شاداني الخلعة يا ربي يعاوني.
سمية : صليتي صلاة الفجر؟
صونيا:اه صليتها و دعيت ربي يعاوني.
سمية :إنشاء الله ربي غيعاونك يلة لبسي هاكي سبرديلتك انا نجيب الكاب ديالي نمشي معاك.
صونيا:بلا منعدبك غنمشي بوحدي.
سمية:لا ضروري نمشي معاك را خديت هاد الايام لي غدوزي فيهم كونجي باش نمشي و نتسناك تا تخرجي.
صونيا{تلاحت عليها بتعنيقا و باستها }: شكرا بزاف على هادشي لي كديري معايا أحسن خالة في العام [نزلو دموعها و هي معنقا خالتها].
سمية [بتاسمات و بدات كتمسح ليها في دموعها]:اويلي على الهبيلة كتبكي متبكيش و متشكرينيش أنا هدشي كنديرو حيت كنبغيك قد العالم راك طرف مني الهبيلة.
•صونيا عنقاتها تاني و هاد المرة بابتسامة خفيفة لي خلاو حنيكاتها يبرزو.
سمية: يلة سربي لبسي باش ميمشيش عليك الحال يلة أنا غنجي دابا.
•مشات سمية جابت الكاب ديالها و صونيا لبسات سبرديلتها أما سعدية لي بقات كدعي معاها باش ربي يسر ليها.
[بعد 10 دقايق وصلو المدرسة ]
سمية: يلة أبنتي هانتي وصلنا بكري دخلي قادي مسائلك و قراي المعودتين و راجعي شوية صافي يلةسيري و الله يسر ليك و الله يدوز ليك داكشي بحال شريبة الماء و أنا را غنتسناك هنا تا تخرجي.
صونيا : إنشاء الله أ ربي و غير سيري ماشي موشكيل أنا غنرحع مني نسالي لدار بوحدي.
سمية :لا غنبقا نتسناك هنا تا تسالي و را نيت كاينا كلثوم جارتنا كتسنا تا هي بنتها غنبقا معاها.
صونيا : صافي لي بغيتي.
•مشات صونيا دخلات و تقادات في بلاصتها بدا الإمتحان كلشي متوتر الأساتيذة مزيرين و صونيا دايرا كتر من جهدها باش تجاوب .
[تسريع الأحداث بعد ما خرجات ]
•خرجات عند خالتها و هي فيها الفرحة و الخلعة معارفاش واش داكشي لي كتبات مزيان ولا لا واش غتنجح ولا لا أفكارها متناقضين.
صونيا: يلة أخالتي نمشيو يلة نبدا نراجع داكشي ديال العشية.
سمية [بلهفة]: كي دوزتي بعدا مزيان كي حطو ليكم الإمتحان.
صونيا : شوية أخالتي مهم خدمت و يا ربي يكون داكشي صحيح .
سمية: إنشاء الله غيكون غير الخير.
• رجعو الدار تغداو و راجعات شوية و مشات تكمل الإمتحانات ديال العشية و من بعدها مشات هي و خالتها المدرسة تاني و دوزات دوك الإمتحانات و دازو الأيام ديال الباك و صونيا كلها تفاؤ بأن الله مغيخيبهاش و معمرها فرطات في صلاتها و دعاءها بالرحمة الماماها و بنجاح ليها ، وصل الوثت باش غيحطو نتائج البيسي محطوط فوق الطبلة و سمية لي شادة قدامها البيسي و صونيا لي كالسا في واحد الكورسي مقايلا معاهم كتسنا خالتها شغنقوليها.
صونيا [ كطرطق في صباعها بتوتر]: واش مزال محطوش نتائج.
سمية{باقة حاطة عينها على البيسي }:لا باقين محطو والو و المسار مبلوك ، بلاتي بلاتي يمكن حطو شي حجا.
•بدات كتقلب هكا عاود و صونيا كتاكل في دفارها بتوتر و كتسنا خالتها تنطق بشي حجا.
سمية : ها هما حطو ص... صونيا .
صونيا [ بخوف ]: مالكي أخالتي يكما سقطت.
سمية [ بالابتسامة عريضة و غوتة ]: نجحتي أبنتي نجحتي و انت ثانية يا بنتي حبيبتي[ضرباتها بواحد تزغريتا تا من جيران ولاو تيطلو من شراجم ].
•صونيا كضحك و كتبكي في نفس الوقت مشاعرها مخلطين كتحس بأنها حيدات حمل تقيل على كتافها ملي نجحات كتحس بحالا ماماها فرحانة بيها أنها حقات الحلم ديالهم ، أما سعدية لي كتعنق و تبوس في صونيا و تقول معنقت فرحات بيها قد فرحت زيادتها.
سمية:على هاد الحساب خاصنا شي زردة غنفقصو جيران قولي ليا أبنت ختي شنو بغيتي اليوم أي حاجة حطيتي عليها فمك تحضر لي بغيتي غا هي متفوتيش ليا 50 درهم ههه غا ضاحكة معاك نخسر عليك تا مليون ماشي كثيرك في حقك غا تكون و أنا معاك.
صونيا :لالاممحتاجة والو و الله الحمد الله مسكنيني عندكم و موكليني مشربيني .
سمية: واياك تعاودي تقولي هاذ الهضرة إلا هاذ الهضرك فهمتي راك طرف مني الهبيلة واش أنا نقد نفرط فيك راك العمرديالي أنت و الا مبغيتيش تقولي شنو بغا أنا غنقول.
صونيا: واخة أخالتي لي بغيتي.
سمية : أول حاجة مغتبقايش تعيطي عليا خالتي حيت أنا ماشي شارفة .
صونيا : واخة يا سمية الغالية.
سمية : ثانيا غتلبسي حوايجك و غنديك عند واحد صاحبتي كوافورة غدير ليك سواند ڤيزاج و شوڤو راك وليتي حالتك و تنقي ليك دوك ضفيرات را الوطني مخلا فيك حالة.
صونيا : وليني هادشي را غالي را القليل في هادشي الحاجة داير 200 درهم.
سمية : لبسي و سكتي أنت دتيرا بحال سميحة الله يرحمها نعطيوها الفلوس بزز و مني تبغي تمشي تحطهم في الكوافوز ديال الصبابط و تمشي.
صونيا[بتاسمات إبتسامة خفيفة]: هي ديما كانت هكاك تا معايا ماشي غير معاكم نفسها عزيزة متبغيش لي يعطيها.
سمية: و نوضي لبسي حوايجك دغيا .
•ناضت صونيا بدلات عليها بواحد السروال و كابيتشو في الكحل لي مكانتش كتحيدهم.
سمية : تي مالك مع هاد اللبسة مكتحيديهاش كاع معندك كساوي معندك جلالب.
صونيا [بحرج]: مبقاوش عندي الحوايج كلهم شي تقطع و شي صغار عليا.
سمية : ليوما كيبان ليا غيدوز طويل غندوزو تا عند حميد عندو شي هوتات في الحوايج واعرين يلة زيدي.
صونيا :بلاش أخالتي هذو غنبقا نلبسهم.
سمية : وزيدي باراكا مديري فيها عزة نفسي.
• خرجو بجوج بيهم و شراو داكشي لي بغاو مشاو تهلاو في راسهم و رجعلو الدار محملين و مجملين.
سمية : يلة سيري قيصي ديك الكسوة لي في الباج و أجي نشوفك.
•مشات صونيا قيسات و خرجات عندهم و هي كدور بديك الكسوة.
سمية : هاي هاي هاي على بنت أختي شحال غزالة تبارك الله و صلاة على نبي.
صونيا :بصح أسمية واش جات معايا زوينة.
سمية: غزالة كتحمقي .
• دوزو داك العشية زوينة و صونيا لي فرحانة بدوك الحوايج لي شاريا اما سمية لي طايرا بالفرحة وهي كتشوف أنه بنت ختها مرتاحة معاهم ، حتى الواحد النهار لي كلشي غيتقلب سفاه على علاه صونيا كيف العادة خارجة مسخرة تجيب الكومير باش يفطرو حتى وقف عليها عمها سعيد لي كانت كتخاف حتى من ضل ديالو معرفاتو منين تصلط عليها لاحت داك الكومير و رجعات كتجري الدار حلات الباب و ذخلات و حتى من الساقطا سداتها سمية سمعات خبطة مجهدة ديال الباب مشات بزربة شافت أش واقع ، بانت ليها صونيا كتقفقف و دموعها شلال.
سمية [ مخلوعة و كتقلب فيها ]: مالك صونيا شوفي فيا مالك.
صونيا [ و هي باقا مصدومة و كتبكي]: جا باغي يقتلني غادي يقتلني أخالتي عفاكي عتقيني .
سمية [ بخوف]: شكون قولي علامن كتهضري.
صونيا: عمي سعيد جا أخالتي جا وقف عليا .
سمية : يمكن غير تخيلتيه ولا كيشبه ليه .
• [دق، دق،دق] تسمع دقان ديال الباب تحبسو الانفاس ديالهم يجوج و الخلعة شداتهم من صبعهم صغير .
صونيا :هاهو جا باش يقتلني ها هو جا عفاك أخالتي متحليش الباب .
سمية [ بخوف و تلعتم]: شكون .
•تسمع صوت من جيهة المعاكسة الباب .
{و هنا نقدرو نقولو أنه وصلنا النهاية الجزء نتمنا يكون نال الإعجاب ديالكم الكبيدات نشاء الله عن قريب نلوح ليكم الجزء الرابع لي غيوقعو فيه يزاف ديال الأحداث تا هو شنو في نضركم غيطرا و شنو هما الأحداث لي غيوقعو هادشي كامل غنعرفوه في الجزء جاي إنشاء الله 🦋🍃}
~|في أمان الله و حفظه تشاو تشاو🤗🌹|~
✍️بقلم:kakitawa