المتشرده

البارت12

#المتشرده
٠٠٠٠٠٠٠٠٠٠٠٠٠٠٠
#البارت__12

#مرج_البحر

لجين : طلعت النتيجه ماعنده اعصاب بالقالون يعني عنده شلل بالقالون اني هنا ادمرت ماعرف شسوي اني قبل لا اجيب ليان بعت ذهبي كله ولميت العندي واشتريت قطعه ارض زراعي كلت المهم جهالي عدهم شي سند

فكرت ابيعها واخذ أمير واسافر كلي الدكتور متفيده العمليه اذا سويناله العمليه لازم اشيل القالون كله ومعناها يبقه طول العمر اسهال تتحملين انتي خطيته بهيج عمليه

كتله لا بس لازم اكو حل كال اكو بعض الاكل ممنوع ياكله مثل الموز والتفاح الأحمر والرمان والتمن والخبز والاندومي والحليب وكل انواع الاجبان ونطاني اله حقنه شرجيه كل ٣ ايام اخليله منها طبعا اني مبطلت بجي مقهورة ع ابني بهيج عمر وممنوع من الاكل ومن اخليله الحقنه يروح ينتهي من الوجع

ورة شهر صدرة تنك صار افلاونزة وهيثم يندل دكتور بشارع حيفا رحناله اني وشهد وأمير وبقيت ليان يم امي

طبينه للدكتور وطلعنا جنت شايله أمير شهد كلتلي جيبي اني اشيله اخذته هيه جاي تنزل من درجع عثرت وكعت أمير بجه شويه وسكت من شلته واباوع فوك حاجبه مفتوحه كلها ضليت الطم اجه ولد كال امشي اوديكم للمستشفى كتله لا شكرا صعدت تكسي ورجعت لهيثم اني تخبلت لان بالتكسي أمير نام عبالي صار بي شي طبيت لمحل هيثم كال ولج شبيج كتله شوف أخذه وركض بي للسيارة ورحنه للدكتور ويخيطه ٥ خياطات

أخذنا ورجعنه لبيت اهلي ضليت يمهم كم يوم طبعا جنه نلتم أبيت اهلي اني وسارة وتجي بت خالي هبه وسجى كلش حلوة لمتنه ودائما منجمعين بس اني جنت كلش تعبانه من المسؤوليه ومرض ابني كلش تعبني

من بعدها بديت بعمليه ابني وضلت هاي
حالته لحد ما سويتله ٦ عمليات وحتى
بنتي طلع عدهه نفس مرض اخوهه وهم
سوتلهه عمليه تعبت حيل وعلي حاير
بنفسه وطباته وطلعاته ولا مهتم الاولاده

طبعا بهاي الفترة مرتين اني ردت اطلك من علي وامي متقبل ضليت نفس وضعيتي مسؤوليه براسي وعلي حاير بنفسه وبعلاقاته وبااهله لحد ماظهري صار بي وجع قوي هملت روحي ورة سنتين يلا رحت للدكتور وجان يطلع عندي ورم سرطاني والدكتور يكول اخاف نشيله ويصير نزف وينتشر بالجسم كله واخاف نفتح الظهر وهوة واصل للعمود الفقري ولازم بهيج حاله اتحول جمله عصبيه لان الورم مرتبط بالشرايين طبعا اني تعبت نفسيتي كلش واباوع لجهالي اذا صار بيه شي منو الهم سوالي الدكتور رنين وجان باقي للورم شويه ويوصل العمود الفقري قرر يسويلي الدكتور العمليه سويت العمليه واخذو الورم زرعو واني كلش تأذيت بهاي العمليه يعني وجعها لحد الان بيه ومااكدر انام ع ظهري

مرت الايام وأمير سجلته روضه جان احلى يوم بحياتي واني اشوف ابني يداوم واروح وارجع ويا لحد متعلم يداوم وخليتله خط كلهم حبو بالروضة واتخبلو ع شكله ونزاكته وترتيبه اكعد من سته الصبح احضرله ملابسه واسويله الاكل مالته واضل اخذله صور لحد ميجي ابو الخط وصارت حفله التخرج مال تمهيدي ورحت وتوكف يمي المعاونه ومتدري اني امه لأمير جان اتكلي شكد يعجبني شكله وشلون مرتب ونضيف طبعا كلش افتخرت بي وكلت الحمد لله مراح تعبي بلاش وحسيت الله عوضني بي