#المتشرده
٠٠٠٠٠٠٠٠٠٠٠٠٠٠٠٠٠
#البارت3
#مرج_البحر
لجين : اني كطعت الكلام بس جان ابويه ميروح من يمي وابجي عليه هالكد ماانكسر عليه جنت من امدد ع جربايه أدير وجهي للحايط ومااحجي ويه احد شافوني نفسيتي تعبانه عندي بس صديقه وحده بصفنه جنه نحجي اني وياها من ع الحايط اسمها رسل كلش احبها
خلو بالك سالفه الحايط لان ورة ١٧ حيصير ويايه شي يكلب حياتي كلها
اجتي رسل يمي وضلت تحجي ويايه واني بس اباوع كلمه مااحجي وصار المغرب اجه ابويه وبس ويا جنت احجي جان يكوم يبجي كال خليج قويه ولتضعفين مااريد اشوفج هيج مكسورة هوة يبجي واني ابجي امي ضميرها اذاها كلش اتحير شسويلي لليل دخلتني شهد للحمام وسبحتني وجان عندي علاج ومغذي اوتت الكانونه اخذني ابن خالتي للمستشفى اخلي كانونه وانصدمو بايدي عبالهم صاير انفجار وايدي هيج مضروبه لان ايدي وصلت الفتحه مالتها لزندي رجعنه للبيت وكالعاده كلهم نامو وضليت اني وابويه وحايرة بالوجع
صار الصبح بالسبعه بدلنه ودنروح للمستشفى طبعا سويت العمليه بالمستشفى العسكري بمطار المثنى امي مراحت ويايه اتخاف اجتي خالتي ويايه وشهد هوة ممنوع احد يدخل بس ابويه دخلنه بالباجات مالته بيومها جان عيد ميلادي يعني كله اسبوع وايدي هيج انفتحت طبينه للمستشفى وشافني دكتور كال لازم عمليه ودوني اخذولي اشعه واني كوة امشي لازمتني خالتي جان يكول الدكتور لابويه الأنسجة مال ايدها كلها متفسخه ورايحه واحتمال نص العمليه ونكص ايدها ابويه بس دموعه تجري اني جنت ساكته وكلشي مااحجي الدكتور كله لابويه انطينه موافقه حته ابدال منطلع ونكلك انكصها
تختصر الوقت ابويه يباوعلي ويبجي جان يكله للدكتور خليها اتموت من الوجع ولا اشوفها ايدها ماكو اني رحت حضنته وضليت ابجي كتله لخاطري وافق تعبت من الوجع اريد انام صار اسبوع منايمه وكوة قنعته لابويه يوافق جابولي ملابس عمليه ومشيت وصلت باب غرفه مال عمليات جان افقد الوعي
حسيت ع صوت ابويه يبجي ويحجي ويايه دخلوني للعمليات اجه دكتور كال هاي العيون الحلوة ليش تبجي والله حرامات كتله فدوة دكتور اخاف احس ع الوجع كلي لا هسه اتنامين وترتاحين اجه نزعني القراصه جان شعري طويل ونمت ع السديه ضربني ابرة بالكانونه من ضربني الثانية اني بعد محسيت لحد محسيت ابويه يحجي ويايه بس كوة افتح عيوني مغوشه كلشي مااشوف طلعوني للغرفة واصيح من الوجع واسأل ابويه ايدي كصوها كال لا بابا الحمد لله عدت ع خير طلعت من العمليات دمي مصفر خلولي دم هالكد مجانت عمليتي صعبه المدير مال مستشفى ضل يمي بالعمليات والدكتور ورة مخلصت العمليه وزع جكليت طولت عمليتي من ١١ الصبح لل ٢ الظهر جانت كلش خطرة فكني البنج لزمت ايدي لافيها من فوك لحد أصابعي حته أصابعي لافيهن ومعلكيها بركبتي
كتله لابويه جوعانه طبعا هذيج الايام لو اكل لكمه لو مااكل راح ابويه سأل الدكتور كله مو زين هسه تاكل بس ابويه مسمع من الدكتور وراح جابلي كيكه وعصير وخلاني اكل بسكوت اجتي امي من طلعت من العمليات وضلت يمي هيه وخالتي وشهد وابويه خطيه للمغرب راح لان تعب اجتي سارة وزوجها شافوني وراحو طبعا المغذي ابد مشالو من ايدي وعندي ابر هالكد ماقويه لازم بساعتين يضلون يضبروها يعني يدفعون منها شويه شويه بالكانونه لان اذا ضربوها حيل يصير عندي صدمه بالقلب واتوفه المهم بليل اجوي خلولي ٦ ابر مسكن بالمغذي جان ابن خال امي يكلي يلا كومي كتله وين كال نبدلج الضماد اني كمت ابجي كتله هم يعصروها كال لا ولج بس نبدل ضماد واني الخوف يقرة الف وامي تقرالي قرآن اني كل ضني نضفوها لايدي وخيطوها😥😥 رحت وهم دخلوني للعمليات وهمه يفتحون بالضماد واني ابجي مقبلو اباوع لايدي كالو ديري وجهج ماادري شلون انداريت باوعت ايدي العظم مبين وبس دم وايدي مفتوحه بكد شبر كمت اصيح ومخليلي جوة الجلد فتيله هاي الحجي ينضفون بيها بدون بنج خلصو وكمت هالكد متاذيت وبجيت رجعت ملابس متبلله من العرك كالو الصبح هم نجي عليج واني الليل كله منمت مااريد الصبح يجي
