_شخصيتي م عاجباني ف قمت غيرتها هل د يعتبر نفاق؟!
انسانه سلبيه كل ما يحصل ليها حاجة تتشائم وتتنرفز وجملتها الوحيده "اشمعنا أنا وغيري لا" م بعرف يعني شنو احتساب الأجر ولا بعرف يقين ولا بعرف الصبر ولذتو م بعرف معنى الرضا ولا حصل جربت اكون راضيه.. حتي الايجابيه م كنت بحبها وممكن تكون نسبتها عندي واحد وكتير الواحد د زاتو... بكره الناس وبكره الحياه وبسميها "الحياه السوداويه".. كل لما اعتب عتبه ارجع الف عتبه لي ورا... انسانه كئيبه وكل مافي قلبها انها تموت وبس... م حصل فكرت تفرح لم اتعلقت بي مشنقه الحزن وانتحرت وهي حيه... حاربت الحياه وخلت ف حواجز بينها وبين اي شخص يدلها للتغيير... وكان كلامها كلو:
_هم م بحسو بي
_انا بموت انا م قادره اعيش
_أنا ليه غرقانه في الحزن؟ لي انا وما غيري؟
_اشمعنا انا اكون حزينه وغيري مبسوط
_كل سواد العالم تحت عيوني ليه؟
_منتظره يومي وبس انا م عندي حاجه ف الدنيا دي تاني
... حرفيا الكلام السلبي كان جزء مني ومُحتل روحي بشكل جبار...من غرفتي م بطلع وم بحب الضيوف...ودايما بخت احتمالات انو اهلي بكرهوني.. م كنت بحب نفسي وم عارفه اعمل شنو والصراحة المركننه جواي اني نفسي اتغير ولمن ينصحني زول بزعل وبقول هو م بحس بي.. أمكن الحاجه الوحيده الكويسة فيني اني حساسه وضميري صاحي أيّ بأنبني..
" السؤال كان هنا ده كلو بسبب شنو؟
__
" لقد اختارني الله من بين عباده♡".
في يوم وانا ف غرفتي كالعاده ماسكه التلفون بتصفح ف الانستا لاقاني بوست كنت حأتجاوزو عشان طويل بس ف حاجه وقفتني وقررت اقراهُ كان مكتوب فيه :
" وسط العاصفة و الغيوم الرماديه
ضائعٌ انت ونفسك والذنوب الكثيره
انت بين الظلمات والنهايه القريبه"
سبب الظلام الانت فيه ده بُعدك من ربنا... المسافات البينك وبين القرآن... الليل العبارة عن واتسب انستا فيس تويتر وتيك توك والخ ومفترض يكون ليلك قيام وذكر.... انت حزين عشان بعيد من الخلقك..
ربنا سبحانه وتعالى بقول : { فَمَنِ اتَّبَعَ هُدَايَ فَلا يَضِلُّ وَلا يَشْقَى وَمَنْ أَعْرَضَ عَنْ ذِكْرِي فَإِنَّ لَهُ مَعِيشَةً ضَنكًا }
بيني وبينك آخر مره ركعت بخشوع بتين؟ اخر مره ذكرت ربنا بتضرع وخشيه بتين؟ آخر مره صليت ركعتين شكر وحمد بتين؟ آخر مره حاولت تصلح نفسك بتين؟
انت حزين وكئيب وقلبك تقيل وم عارف الفيك شنو وليه انت بالحزن والضيق ده عشان البعد... عشان المسافه البعيده بينك وبين ربنا عشان الذنوب والخطايا..
