"كيف ينام المرء في اول ليله فقد)).
جنات :
"صدمه الإنسان عند فقد امه"... يجي الليل بدون ماما يجي على الصباح بدون أصبح بيها بدون اشاغلها بدون تجي تصحيني وتقول لي كفاك نوم ياخي تعالى انا قاعده براي... طيب ما انا هسي قاعده براي وينك م جيتي مش عارفه اني وحيدة بدون اخوات ولا اخ؟ مشيتي خليتيني لمنو؟ بكره بابا يعرس والأهل ينسوني... مشيتي خليتيني لمنو... مش انتي الكنت منتظره تخريجي؟ طيب اها تخريجي بعد اسبوع حتجي ولا حتخلفي وعودك؟ صح قلتي عاوزة تعملي الما عملتو ام في تخريج بنتك؟ وصح قلتي عندك لي مفاجئات؟ طيب انا هسي لا شايفاك لا شايفه المفاجئات... يعني خلاص؟
جاده مشيتي؟... طيب مالو لو اصحى زي كل مره مخلوعه واقول ليك حلمت بحلم الله لا حققو... مالو يهني لو بقى حلم؟ واصحى اشوفك جمبي.. صعبه يعني؟
صعبه ترجعي؟ تتذكري لم حكيتي لي وقت امك اتوفت حصل فيك شنو؟ يعني انتي حابه انا اجرب؟ عشان تشوفيني قويه ولا لا تمشي؟
طيب تعالي عشان انا لا قويه ولا زيك قدرتي تتحملي بس انا لا... انتي قدرتي تصبري على فقد امك بس انا م بقدر ف لو سمحتي تعالى..
عدت الايام وانا م عارفه ليلي من نهاري م فاهمه هل انا عايشه ولا الحاصل شنو كنت بشوف بنات خالتي كنوز بمشو ويجو من بيتنا وبكون عاوزه اسألهم ماما رجعت؟ بس بسكت خايفه من الإجابه... كنت بشوف هوازن لم تقع بس م بقدر اقوم ليها وكانو جسمي مثبت في السرير... م قاعده اكل ولا اشرب مويه وكل البجي يحاول بدفق ليه الصينيه لم قنعو مني.
بعد فتره ما عارفه قدر شنو هي راسي بقى يجمع والمشاهد بقت تجي في راسي وكأني يادوب استوعب الحصل بطني وجعتني شديد وراسي لف بي... كان بس همي اني اكذب الحصل ويطلع د وهم وكذب وحلم وبس... قمت بسرعه وبقيت اتنفس بسرعه وابكي تقريبا كنت بهمس بي كذابه م مشيتي.. جريت بره شايفاهم كلهم قاعدين ف الحوش وساكتين لم شافوني عاينو لي بخلعه من منظري... قلت ليهم امي... أمي في البيت.. قامو مخلوعين هوازن جاتني وقالت لي قولي بسم الله ي جنات قولي بسم الله.. زحيت منها بسرعه وانا بقول انا انا ماشه جريت على بيتنا وفتحت الباب ودخلت وانا بنده عليها ف كل مكان..
الصاله والصالون والتلات غرف وفي المطبخ مكان بتقيف.. بس م كانت في... بعد دخلت غرفتها ولقيت الاسدال حقها ف الارض غمضت تلاته مرات فتحت والرابعه م فتحت فيها...
"يُصعب علىَ الأمرُ يا امي💔))..
هوازن :
"قبل التلات ايام"
الشاي بالزلابيه؟؟ هم جاااااادين؟ جادين هم بطلبو مننا نعمل شاي وزلابيه وكمان بالسكر يااااا رناااد ومنن لا ي بنات انا م بقدر اعمل الزلابيه... رناد قالت لي وطي صوتك م يسمعوك اها ياكلو شنو ي هوازن يعني يصومو؟ قلت ليها ما يصومو لكن م يفتحو نفسهم لدرجة الزلابيه.. عاينو انا بعدين لم أموت م تفرشو لي ولا تشتغلو وكل الحصل هسي م يحصل بعدين.. منن قالت لي بطلي هسي أن شاء الله بعد عمر طويل مديد.. اخدت نفس وبقيت اعمل ف الشاي وانا ببكي... وبدأ البرنامج من هنا.. من وقفنا شغالين شاي فطور عده نظافه غده شاي قهوه شاي عشاء قهوه عده نظافه حرفيا م فاهمين حاجه بس كنا شغالين وحيلنا مهدود بنرجع البيت نصلي وتاني نمشي بيت البكاء...
