صل على النبي ♡))..
انتي عارفه لو ابوي مات الحيكون مسؤول عنكم منوو قلت ليه انت قال لي يعني انا هسي ف مثابه ابوك ف ياريت نبطل حساسيه و اي شي نفسك فيه اشري بس... ابتسمت و قلت ليه عاد انت اخو السرور ي يمه ولاده النسوان كلهنن ي يمه تتعلى وم تدلى... قعد يضحك قلت ليه صحي انت جيت قبل المغرب ليه قال لي شويه تعبان قلت ليه ربنا يعينك بس قال لي يلا هاك الصينيه انا داخل اصلي وارتاح ونسبه لموضوع السوق ف وريني اليوم العاوزه تمشي فيه ده أن شاء الله وبسوقكم قلت ليه حاضر.. شلت الصينيه ومشيت دخلتها المطبخ جاتني مهاد وقالت لي ابوي قال عاوز الغده قلت ليها جا هو؟ قالت لي اي انتي ختيهو انا ماشه اصلي قلت ليها لحظه انا زاتي عاوزه اصلي قالت لي طيب طيب بكلم رناد اصلا صلت قلت ليها تمام...ومشيت طلعت الحوش اتوضيت وصليت المغرب بعدها ركعتين النافله...
_اتريد بيتاً في الجنة؟
=نعم بالتأكيد
_ لا تترك النوافل♡
__
مِنن:
_ زهور م عجبتك حتمشي تجيب غيرها ؛ لبسه م مناسبه ليك ممكن تمشي تشتري غيرها ؛ شخص لقيته م بنفع معاك حتسيبو وتمشي تختار الأحسن منو....انت قادر تبدل كل شي حتى نفسك..
"هوازن" م تخيلت مجرد خيال انها ممكن تتغير ف يوم... عمرها م اعتبرتني صحبتها او حاجه اكتر من اني وحده ببقى ليها وبس... عكس اخواتها الكانو متعلقين بي جدا..
انا لم جيت من البلد كانت صدمه بنسبه لي... بعرف انو ماف حاجه مستحيله ع ربنا بس تغير هوازن الوحيد الما كنت متوقعه... فخوره بيها جدا وبقيت اقول عليها قدوتي عشان اشجعها اكتر تستمر وم تقيف عشان المشوار م هين ولا حاجه تتقال وبس.. لا دي فيها معافره وبكى ع بال م تضبط وسوسه الشيطان ونفسها وتقدر تتغلب عليه وعلي نفسها عاوز جهد.
يوم حتكسل ويوم م حتقدر ويوم حتحاول تتغلب ع نفسها.. م هو ماف شي بجي بالساهل كده..
_
هوازن:
الساعه كانت 8 لم بدينا نظافه زي م قالت ماما... جبت جردل فيه مويه وختيت فيه اربعه قطع وقلت ليهم شغلو لينا دلوكه.. منن قالت لي اييااا نحن ناس نحب الهجيج قلت ليها طيب عندك اغاني دلوكه؟ قالت لي ايوه قلت ليها طيب يلا شغلي.. رناد قالت لينا م تنسو حنعمل الفرشات برضو عشان كده استعجلو قلت ليها لا على مهلنا ورانا شنو؟... سمعنا صوت بقول ي هوى انا جاي... منن جرت الغرفه وهو قال سونك اختفى؟ قلت ليه أجل أجل... رناد قالت ليه سونك دي نعلو مرتك المستقبليه؟... هو قح بأستهبال بعدها قال بصوت عالى زوجتني نفسها ولا شنو... قلت ليه عااامر قعد يضحك مهاد قالت ليه صحيت من النوم هسي ولا شنو قال ليها اي صحيت زهجان وجعان وعاوز اشوفكم بتعملو فشنو وسونك مالا م مشت لحد هسي قلت ليه بايته هي قال لينا يااا ستيير لبتين؟ جا صوتها الواطي وهي بتقول ليه متقله عليك؟.. قام من الكرسي بسرعه وعاين ليها وحول نظرو لي وهو بضحك "شديد".. بعد قال ليها كده... بدت المشكله والمناقره بينهم... م انو منن بتخجل منو وم دايما بتجادلو وكتير جدا تسكت وم ترد بس المره دي شايفاها انداحت....بعد هو دخل المطبخ حتى هي انتبهت انو كلنا خاتين القطع وبنتفرج عليهم وهم بتناقرو.. حكت راسها وقالت لينا هناي اسمو شنو ااا اندحت صح؟ قلت ليها شديددد رناد قالت ليها م بسألكم عاد زي الشفع.. مهاد شالت القطع ومشت ع الحيطه وهي بتقول شغله فااارغه فاااارغه... ضحكنا وقمنا ع النظافه خلصنا الحيط سرعه سرعه وزهجنا من الاغاني ف قفلناها ومشينا نغسل الفرشات ف الحوش لقينا عامر خاتي كرسي قدام السرير وقاعد يتكلم... مهاد قالت لينا ارح عادي مالكم واقفين كده قلت ليها بري هي خلي منادح شكلو رناد قالت لينا ونخلي الفرشات يعني؟ امي بكره حتزعل لكن قلت ليها اها نعمل شنو ارح ارح نرجع هوي... مهاد قالت بصوت مسموع ي بنات ارح نغسل الفرشات ياخ... عامر عاين لينا وقال للزول الفي التلفون دقايق برجع ليكِ.. قفل وقام قال لينا عاوزين تغسلو الفرشات ولا شنو قلت ليه احم اي قال لينا طيب بغسل معاكم اصلا ماف موضوع قلت ليه طوالي اررحح قال لي م صدقتي صح.. مهاد قالت ليه حتغسل ولا لا اها؟ قال ليها حأغسل وحده وحمشي وراي شغل وانتو عاوزين تشغلوني... قلت ليه وانتو شنوو؟ انت براك اتشالقت قال لينا يلا ماشي كتر خيرك بس ي عامر قلت ليه تمشي وييين؟؟ انت ماليك مفر من هنا وهم اصلا اربعه فرشات ارح نتفق بالذوق عشان م نتكافت قال لينا طيب عاينو انا بنظف وحدة وانتي وسونك الكبيره دي ومهاد المتوسطه دي ورنوده الطويله اها نبدأ؟ قلت ليه اجللل.. عامر شجعنا م كان عندنا حيل رغم انو كل شويه برشنا بالمويه لمن هو خلص شغال لينا يلا بسرعه اجرتي وين... منن قالت ليه ماف اُجره ويلا امشي قال ليها انا سألتك ي سونك؟ قالت ليه بطل ثغاله اسمي مِنن قال ليها وانا عامر اتشرفنا عبيطه دي... شال تلفونو من التربيزه وقال يلا تصبحو علي خير ودخل جوا... عاينت لي منن الختت الفرشه ودخلت... رناد قالت لي اجي؟ مالا؟... عاينت ليها نظام الله اعلم بعد خلصنا دخلنا وكل وحده م قادره تعاين للتانيه من التعب لمن وصلنا السرير انا اخدت نفس بصوت عالي وقلت تعب تعب... رناد قالت لينا والله خطرت لي فكرة جهنميه.. الكل عاين ليها ومترقبها تتكلم لمن هي قالت لينا بكرة نمشي الكوفير رايكم قلت ليها ممم حلو زاتو طولنا م مشينا مهاد قالت لينا اكيد م حنمشي نخلي ماما صح؟ قلت ليها بالضبط كده... عاينت لي منن او عاينا كلنا ولاحظنا انها سرحانه.... بقيت ادندن ليها ف غنيه شال قلبي سلبو ومشى ورناد كملت الباقي وهي بتلكزها.. مهاد قالت لينا الأخت زهجانه عشان عموري قلت ليها كيف؟ مفهمت دخل عموري شنو... منن عاينت ليها بحده بعدها قالت لا عامر لا زفت... قلت ليها عاد موضوع سكوتك حتى ف الحوش د محيرني وحتى لم كان برش فينا المويه مرات انتي م قلتي شي.. ممم م يكون الفي بالي بس؟؟
