صل على النبي ♡.
مِنن :
في يوم راقده وبتونس مع جنات بالتلفون قالت لي البنات مختفين ف المركز وانا براي قلت ليها يحليلهم والله كان ودي انزل معاهم بس مركزي م بقدر اخليه قالت لي حتى انتي مسجله ف مركز؟ قلت ليها لكن واحد تاني قالت لي حالتي عاوزه اقول ليك تعالى انا قاعده براي قلت ليها بجيك لاني عاوزاك ف موضوع قالت لي طيب بتين قلت ليها مم بجيك العصر سمح؟ قالت لي طيب خلاص حأنتظرك.. قفلت منها ومشيت لي امي كلمتها قالت لي بمشي معاك عاوزه الاقي كنوز لي زمن منها قلت ليها طيب حمشي اطلع عبايتي من هسي قالت لي بعد تخلصي امشي شوفي مُلهم عاوز شنو قلت ليها بكون عاوز قهوتو حأمشي اطلع عبايتي واعملها ليه قالت لي سمح انا النشوف حلبس شنو.. مشيت طلعت عبايه وطقمتها مع النقاب ومشيت المطبخ عملت لي مُلهم القهوة بالقرفه...
دقيت الباب مرتين قال لي خشي دخلت لقيت المصحف ف يدو قلت ليه ازعجتك شكلي قال لي لا ابداً ختيت ليه القهوه ف التربيزه الجمبو قال لي بالقرفه؟ قلت ليه ايوه قال لي كم ملعقه؟ قلت ليه اتنين ونص قال لي افتحي دولابي بتلقي بسكويت شيلي واديني قلت ليه طيب فتحت الدولاب لقيته بسكويت كوكيز اديته صندوق وشلت صندوقين وانا بقول د عشان غسلت لك ملابسك وكويتهم ود عشان عملت لك القهوه قال لي اول مره اشوف زول برشى نفسو قلت ليه اتعود ها ماف شي ببلاش قال لي عندي منو غيرك قلي ادبك سااي... ضحكت وطلعت تاني دخلت ليه وانا بقول مُلهم قال لي اها تاني فشنو قلت ليه ماشين ناس روز ممكن توصلنا؟ قال لي روز منو؟ قلت ليه هوازن يخ قال لي بنت خالتو كنوز؟ قلت ليه ايووه بالضبط كدا قال لي ابشري ان شاء الله بس ماشين بتين؟ قلت ليه العصر كدي قال لي حاضر أن شاء الله انا زاتي مارق قلت ليه وين؟ عاين لي دقيقه وقال لي الشغل ي منن واطلعي برا...
طلعت مشيت لي ماما قلت ليها انا كلمتو اننا ماشين لناس روز م لناس جنات عشان حتى لو وصفت ليه هو م حيعرفها قالت لي اي احسن اها امشي جهزي لأبوك الغده عشان نمرق طوالي قلت ليها نصلي اول قالت لي طيب ارحكي... مشيت اتوضيت وصليت واتحصنت بعدها لبست ومشيت ع المرايه سرحت شعري وحده وعملت قلوس وتميت لبسي لم ربطت النقاب.. شلت شنطتي وانا سامعه ملهم بناديني مشيت ليه وانا بقول اها قال لي اتأخرتي.. ماشه براك؟ قلت ليه لا امي معاي قال لي تمام امرقو قلت ليه دقيقه اناديها قال لي لا بناديها انا امشي قدامي م عاوز تأخير... مشيت قدامو وانتظرتو جمب العربيه لم مرق هو وامي وقفل الباب واداها المفتاح..
بعد اتحركنا دق تلفون وشكلو لي عامر عشان قال انت ف البيت؟ اي جايب امي وطالع عندي شغل لو ف البيت انتظرني برا يلا ف امان الله.. قلت ليه د عامر؟ قال لي اي قلت ليه حترجع بتين البيت قال لي عاوزه حاجه؟ قلت ليه قلت لي امي سمعي لي الجزء العندي فيه امتحان قالت م فاضيه واشوفك... قال لي جدا بعدين بسمع ليك قلت ليه وتروي لي قصه من قصص الأنبياء قال لي ان شاء الله ربنا يحينا لبعدين...
شغل محاضرة لمحمد سيد حاج ومنها سكتنا وبقينا نسمع معاه.. لم وصلنا قفل التسجيل ونزلنا.. كنت ماشه ع باب ناس جنات ناداني بي "يا بت يحيى" كالعاده يعني م بناديني بأسمي ف الشارع وبنده علي بأسم ابوي التفت وقلت ليه اي قال لي تعالي رجعت ليه تانيه ورفعت وشي عاينت ليه قال لي ماشه وين قلت ليه ماشه لجنات قال لي صح قلتي ماشه لي بنات خالتي كنوز؟ قلت ليه لكن انا م قلت ليك لأنك م حتعرفها قال لي لا بعرفها قلت ليه الله الله ومن وين قال لي البكاء د الكان بجيبكم صباح ومساء منو؟ قلت ليه اخخ راح من بالي قال لي مم م مشكلة طيب مش الصح انك تدخلي اول تسلمي ع ناس خالتي كنوز بعدها تمشي لجنات؟ لانو م حلوه ف حقك قلت ليه والله هو م بينا خالص لكن م مشكله حمشي أول قال لي طيب وكلمي ريناد تنادي عامر قلت ليه انت م داخل؟ قال لي بتأخر لو دخلت خلوهم ياندو لي برا بس قلت ليه حاضر مشيت خطوتين قال لي استني قلت ليه اهااا قال لي م عاوزين مصاريف انتو؟ امي دخلت ساي م شالت هاك.. طلع الجزلان واداني قروش قال لي اديهم امي قلت ليه طيب كنت عاوزة اتحرك سمعت صوت عامر بي وراي بقول اوووو شيخنا.. ملهم مشي عليه وبدو سلام الرجال الغريب دا حتى قال لي بنت الخاله كيفك ان شاء الله طيبه قلت ليه الحمد لله وانت قال لي الحمد لله ف نعم... دخلت جوا وخليتهم بتكلمو لقيتهم كلهم ف الحوش بتونسو... روز لم شافتني قامت جات على وهي بتقول والله ي بت مشتعلقين عديل كدا قلت ليها تعاليلي يا ورده سلمت عليها وانا بقول حسلم وامشي لجنات طوالي قالت لي وجيتي عشان تمشي؟ قلت ليها بالضبط كدا.. سلمت ع الباقي و وقفت جمب روز وقلت ليها انتي لي طولتي م مشيتي لي جنات؟ قالت لي والله لي اسبوع ف المركز ومشغوله شديد بيه هسي لكن ارح بمشي معاك قلت ليها طيب البسي بسرعه مشت تلبس وانا قعدت اتونس معاهم لم جات استأذنا وطلعنا لقينا عامر وملهم لسه واقفين بتونسو... لم يجينا مارين بجمبهم هوازن قالت السلام عليكم ملهم قال ليها وعليكم السلام ورحمة الله كيف حالك قالت ليه ف ازدحام من النعم الحمد لله... ضغطت ع يدي عشان نمشي بسرعه ف اتحركنا كدا ملهم قال لي يا بنيه م تتأخري عندهم قلت ليه طيب ومشيت بدون اعاين ليهم تاني قلت لي هوازن مالك متوتره كدا قالت لي عارفاني بتوتر جمب الرجال ديل قلت ليها لكن عامر في قالت لي حتى ولو يعني.... دقينا الجرس فتح تميم ولد خالتها... قال ليها اتفضلو جنات ف الحوش.. لم عاوزين ندخل سمعنا عامر بناديه ف مرق بعد قفل الباب هوازن قالت لي شكلو خالتها معاهم قلت ليها فعلا.. دخلنا للحوش جوا لقينا جنات راقده ف السرير وضامه المخده ودموعها جاريه... عاينت لي روز ومشينا عليها بسرعه ونحن بنقول جنات قامت مخلوعه بعد مسحت دموعها قلت ليها مالك يحبيبي بتبكي عاينت لينا بس بعدها نزلت رأسها وقعدت... روز قعدت ع الجهه اليمين وهي بتقول ليها اتذكرتي؟؟ ادعي ليها ي جنات قالت ليها انا نسيتها عشان اتذكرها؟؟ هي م طلعت من بالي اصلا... انا بموت ي هوازن بموت بدون امي ضهري اتقص انا بقيت وحيده م عاوزه حاجه غير اني الحقها قلت ليها ود الموضوع الجاياك عشانو قومي استعدلي عاوزه اتكلم معاك... قامت وعاينت لي قلت ليها شوفي ي جنات انا عندي احساس زيك وبعرف كويس يعني شنو موت وفقد انا بقول لك كلامي دا عشان عاوزه انجيك من البتعملي فيه دا.. جنات د قضاء ربنا وقدرو انتي حتعترضي عليه ؟... انتي عارفه امك محتاجه شنو صح؟ طيب غير الدعاء انتي م حابه تدخلي بيها الجنه وتلبسيها تاج الوقار؟ عاوزاها يوم القيامة تجي وتقول لك لييي م عملتي لي وليي بكيتي وعذبتيني ولي م اتصدقتي لي وليي م حفظتي القرآن عشاني؟ ليه وقفتي حياتك بموتي؟...
نحن نحن عارفين كويس انتي حاسه بشنو بس د قضاء ربنا ونحن مؤمنين جدا بيه... الموت د سنه الحياه اصلا وماف زول فينا باقي ياخي كل من عليها فان... انتي موجوعه انتي مكسوره انتي مهدوده نحن عارفين بس عاوزنك تقومي وتفهمي ان كل شي زائل هسي خالتو مشت بس انتي م مشيتي! حتقولي لي وضحي اكتر ي منن حقول ليك لازم تعملي ليها الكثير اتصدقي ليها ومن بكره انزلي مع ناس روز التحفيظ وفي المركز ادعي ليها وخلي كل زول يدعي ليها وانا متأكده انك حتنسي همك هناك لأن ربنا يقول هؤلاء قوم لا يشقى جليسهم...
هوازن مسكت يدها وقالت ليها انا واثقه انك حتعافري وتقومي قويه عشان البقع ويقوم بصندد ف الارض دي ويثبت... انا واثقه فيك انك قدرها وانك قادره تعملي لي امك كل الخير وتريحيها في قبرها عشان هي تستاهل كل دا واسمعي هنا انا معاك ومنن معاك وريناد ومهاد وخالتك كنوز وكلنا كلنا ف ضهرك وجمبك وسندك بعد الله سبحانه وتعالى... انتي بس قولي ياااارب تخفف على وتقويني صدقيني ربنا مقدر دا كله لخير وبعدين حتقولي هوازن قالت عارفه ليه؟؟ عشان لو م امك ماتت م كنت فكرتي في التحفيظ وم كنت فكرتي ف الأعمال الخيريه وانا بقول لك كلامي د مره تانيه بس لم تختمي المصحف بعدها حقول لك ي جنات تتذكري لم قلت ليك ربنا قدر وفاه امك عشان يعلى من مكانتك ف الجنه ويلهمك الصبر والقرآن وكل خير بإذن الله بس انتي اصبري على البلاء دا... ربنا يقول وبشر الصابرين.. بشاره بشاره يا جنات... الله بنفسه يبشر الصابرين.. ليك حرية التخيل... وعشان الصبر م هين ف ربنا حيكرمنا بأضعاف الوجع بس خير وفرح ربنا يقول {وَاصْبِرْ لِحُكْمِ رَبِّكَ فَإِنَّكَ بِأَعْيُنِنَا}... متخيله معاي ي حبيبه؟ وعشان م تيأسي قال ﴿لَا تَقْنَطُوا مِن رَّحْمَةِ اللَّهِ﴾... وادعي كتيييير لأنه يقول {فَدَعَا رَبَّهُ أَنِّي مَغْلُوبٌ فَانْتَصِرْ} ربنا معاك دايما فوضى امرك ليه قال تعالى {وَأُفَوِّضُ أَمْرِي إِلَى اللَّهِ إِنَّ اللَّهَ بَصِيرٌ بِالْعِبَادِ}... ربنا معانا كلنا وماف اطمئنان اكتر من كدا... وهسي امسحي دموعك وقولي اللهم إني المغلوبه فأنصرني وامسح على قلبي كل سوء واهدني حتى ترضى وترضني وارزقني القوه على مراره الدنيا ولا تجعلها اول همي ويسر لي أمري ف لا حول ولا قوة الا بالله... كانت بتردد وراها وهي بتشد ف البكاء لم مسكت يدينا وهي بتقول بحبكم والله بحبكم روز قالت ليها بلاش دور الدراما وارح نختار معاك العبايه حقتك حقت بكره قلت ليها انتو كدا كأنكم بتقولو لي خلي مركزك وتعالي سجلي معانا وابقي بياعه روز قالت لي لا خليك ف مركزك وم تحتكي كتير كدا.. جنات ضحكت وهي بتقول خلاص هي حتنسوني العاوزه اقولو لمنن قلت ليها احكي يحلوه قالت لي احم انا مبسوطه اول شي بيكم يعني عارفه اني تقلت عليكم شديد بس ان شاء الله ربنا يقويني المهم الحاجه العاوزه اقولها ليك ي منن وجبتك من هناك ليها ان تميم ولد خالتي قال عاوزك ع سنه الله ورسوله وصراحه انا سمعتو بتكلم مع خالتي سونه انو كلم ابوك ومنتظر ردو ...
