يالصدفه الحلوه وياحظي الردي

الجزء الاول

الصباح في حوش ابو مقرن يجتمعون كلهم حول النار وروح العائله ماليه المكان يتوسطهم ابو مقرن اللي يقلب النار ومنيف اللي يسوي قهوة الصباح وهو اكثر واحد يضبط قهوة ابوه والبنات اللي حول امهم يساعدونها في تزهيب الفطور ..
ابو مقرن : ماجد
ماجد : سم يبه
ابو مقرن: قم صوت لعمتك صيته تفطر معنا.
ماجد وهو يلف ع امه واخواته وبصوت وشوشه: الله لايصبح عليها بالخير من له خلق
منيف : ابوي يتكلم
ماجد : قايم قايم
ريم بصوت واطي جداً : يالله ان تصعقها في هذا الصباح الله يسامحك يبه
جمانه : ارفعي صوتك إذا فيك خير
ريم بلعانه وصوت عالي : وش فيها عمتي ياجمانه خليها تجي تفطر معنا .
ابو مقرن ناظر جمانه بحده ولف على ريم وهو يقول : من اللي ماتبي عمتها
ريم : محد ياتاج راسي محد جمانه بس تسأل وش بلاها عمتي خايفه صار معها شي .
جمانه بربكه وصوت واطي: هين ياريموه
ريم: مو قلتي ارفعي صوتك؟ لاعاد تعودينها.
جمانه وهي تزفر: صبرك يا ارض.
منيف : تأمر على شي يبه
ابو مقرن : افطر وتيسر
منيف: بالعافيه وهذي قهوتك جاهزه
قام منيف متجهه على دوامه وهو يبوس راس ابوه ومن ثم امه
ريم: منيف
منيف ناظرها
ريم: جمانه تقول تبي السوق قبل عيد الضحيه
جمانه ناظرتها بصدمه : متى قلته!
ريم : قلتيه اسكتي.
منيف: شوفوا ماجد،، وطلع متجهه لسيارته.
ريم: ياليل هالمنيف المعقد الكلمه نشحذها شحاذه.
ابو مقرن بحده وهو يحبها لكن مايحب كثرة الحكي : ريم قومي حطي لك الفطور وروحي لبنات عمتك.
ريم: نايمين يبه نايمين
ابو مقرن: رررريممم وش احكي أنا !
ريم: سم
قامت ريم وهي ودها لو انها مسكت لسانها ولا تروح لبنات عمتها صيته.
جمانه بضحكه: سلمي ع البنات ياريم.
طلعت ريم وقابلة في طريقها ماجد اللي توه راجع
ماجد : على وين
ريم: ابوي قال لي اروح افطر مع بنات عمتك.
ماجد: العب يالقايد محد يروضك غيره.
ريم: ياماجد خل عنك مااالي خلقهم ياماجد
ماجد رفع يده بأستسلام: ابوك قاله أنا مالي شغل
ريم بضيقه مشت ومشى وراها ماجد. ريم
ريم: خير
ماجد: خير اجل؟ جزاي اني جاي اساعدك يلا زين تيسري.
ريم: لا وربك امزح حقك عليه م أعودها.
ماجد: الحل عندي عشان م تروحين لبنات عمتك لكن لو لسانك يزل بكلمه وش اسوي لك؟؟؟
ريم بضعف: لا وربي ربك م انطق بحرف واحد بس شوف لي صرفه
ماجد: أنا رحت ع اساس اني دقيت الباب بس مادقيت وجاي اقول لابوي دقيت محد فتح وانتي روحي واجلسي شوي وارجعي قولي زي ماقلت
ريم : اكبر عليك ياماجد وانا اقول من اسبوع ما شفتها شرفت تفطر معنا
ماجد: ياشيخه تغث تجي تفرق الشمل وتروح
ريم: تم تم يالله اسبقني وانا شوي وراجعه.
رجع ماجد وقال لهم زي ما اتفق مع ريم.
جمانه لفت ع امها: يمه غريبه عمتي من اسبوع ماتجي؟
ام مقرن: مدري يا امي لكن أزين لنا ولها.

في الطرف الثاني عند منيف وولد عمه نايف
نايف: شعندك النفسيه اليوم ماش
منيف : ابد عَرَضية صداع
نايف : خذ بندول والا ارجع ريح وانا هنا عنك لو استجد شي طارئ كلمتك
منيف: لالا بسيط انزل للوحده 207استلمهم انت مكان عبدالله وكلمه يجيني
نايف : تم
نزل نايف لعبدالله" صاحبهم " وعطاه خبر ان منيف يبيه ومسك هو محله
عبدالله : بغيت شي كلمني نايف اجيك
منيف: اجلس اجلس
جلس عبدالله وبدا منيف يسرد له الحدث ويشرح على الخريطه
منيف: وصلني خبر قبل نص ساعه تقريباً  رصد ١٦ ارهابي من هالاتجاهه واحتمال يكون معاهم تعاون من جماعه ثانيه
عبدالله: طيب؟ وش تامر
منيف: مافيها طيب وجب الحذر ابيك تاخذ معاك السريه ثلاثه وتتجههه لنفس الموقع احترازاً لأي طارئ
عبدالله:  بس الموقع بعيد شوي ومايتبع لنا
منيف: حتى ولو ممكن يصير في احتياج طارئ أنا بكون ع تواصل مع اللواء اللي هناك وانت اول ماتوصل الموقع عطني خبر
عبدالله : على خشمي ، بأذن الله..
منيف: عليه الشحم ٫فمان الله
طلع عبدالله يجهز السريه متجهين للموقع.
وكمل منيف يقلب الخريطه ينتظر وصول عبدالله
—————
فالشرقيه  بالجامعه عند قمر وصاحباتها
كانت قمر بالنص ويجتمعون البنات حولها قاعده تشرح لهم كم سلايده قبل الاختبار
بشاير : قمر تكفين خليك من ذي شوفي الشابتر اربعه كيف مليان عجزت اختمه
رجوى: بعدين يابشاير في وقت خلينا نخلص من ذي الحين
قمر: بشرحها كلها بندخل وحنا حافظين زي بعض ان شاءالله بس في كم حاجه حتنى مو فاهمتها حفظتها زي ماهي
بشاير: والله احس راسي بينفجر من الحفظ كثيرر مره
رجوى: مافي وقت نتحلطم خلونا نراجع سريع