يالصدفه الحلوه وياحظي الردي

الجزء الخامس

بينما العيال يأخذون ويعطون بالسوالف دخل مقرن من باب الحوش وقام له ماجد كالعاده يستقبله بكل رحابه وحب
ماجد: ارحبب ياعزوتي وين انت غاط." وين مختفي"
مقرن: البقا بك ابد خذيت لي فره حول الديره والمزرعه، غداكم زهب
منيف: ارحب، زاهب زاهب.
دخلوا كلهم المجلس ومنيف اتجهه يدق باب المقلط يسأل عن الغدا، ويبحث عن الصدفه الحلوه .
ريم: لا تدخل حن قاعدين هنه.
منيف: خذي لي طريق بحط الغدا .
ريم: ابشر ابشر.
قاموا البنات ودخل منيف منزل راسه  ومستعجل ع المطبخ وهالمره جات عينه ع نفس المكان اللي كانت واقفه به قمر لكن للأسف مو كل مره نحضى بالصدف.
منيف: ريمه
ريم: عيوني.
منيف: اللي كانت بالمطبخ بنت عمتي صيته؟
ريم رفعة حاجبها: وانت ويش دخلك؟ استح.
منيف: لا بس استغربت كانت لحالها.
ريم: لا تستغرب كنت عندها وافلحت اشل القهاوي من المجلس
طلعت ريم من المطبخ للبنات وهي ناقده على منيف وهالشي في سلومهم عيب ومنقود وبقى منيف يهوجس واصبح شبهه متأكد من عصبية ريم  وانفعاله انها من بنات صيته .
——————————————
اما بالمجلس عند الرجال يترأس صدر المجلس ابو مقرن والعم فيصل والباقي يمين ومقرن شمال بحضنه عياله وعيال اخته نوره بعيد تماماً عن جلستهم والسوالف وهو فعلااً يحب الاطفال وحنون عليهم ولا يستعيب إظهار هالمشاعر.
وبعد الغداء .
ابو مقرن: أنا يا اخي فيصل لي عندك طلب والشاهد الله ماني طالبه إلا من رجال شايف علومه طيبه وافعاله غانمه والكفو لا جاته فرصه غانمه يغتنمها
أنا طالب ايد بنيتك على سنة الله وملة نبيه لولدك ماجد.
ماجد انسلقت عظامه وحس بمويه حاره تنصب عليه يدينه على قلبه وهو حاسه بيخرج من بين ضلوعه وعينه على نايف : ياربي أنا احلم والا صحي ياربي
وهنا مايطري على باله غير لحظة انزاح عنها الغطا وشاف بدر التمام

العم فيصل انشرح صدره وخصوصاً ان ماجد دخل قلبه من اول مافاق بالمشفى  وشافه فوق راسه : طلبك يبو ماجد مجاب وقربك مراد ولاني بحصل احسن من هالوجهه الطيب لبنتي ٫ لكن بشور عليها وارد لك
عقد ابو مقرن حواجبه بضيق من فكرة انه يرجع لرأي البنت لكن تدخل منيف بسرعه.
منيف: ابد ياعمي هذا زواج وحقها تستخير
للحظه كان بيصرخ ماجد بأعلى صوته من الفرحه لكن تدارك الوضع نايف : ارخص لنا ياعمي حن بنفلح نسقي المزرعه ونشوف الحلال .
ابو مقرن: مرخوص يانايف استعينوا بالله
———————-
برا بالحوش وماجد يحضنننن نايف بكل قوتتته ويبوس راسه : اهخخ يانايف والله ان أبطي ماوفيت دينك
نايف بضحكه وهو يضربه ع ظهره: مبروك مبروك ياماجد الله يجعل لك التمام على خير.
ماجد: امين اممميننن يارررب
ومنيف اللي يبادله الأحضان الحاره رغم انه ماكان متقبل الفكره لكن فرحة ماجد تنسيه: مبروك مبرروك الله يتمم لك على خير يارب
ماجد: الله يبارك فيك يارررب والعاقبه عندك
حامد: وانا اللي قايم وقاعد اخطط لك مابتسلم علي.
لف ماجد بأرتياااااااح وحضنه حيل وهو يهمس بأذنه: ما اوفيك يبو هزاع حقك جعلني افداك.
حامد: مجار ياماجد يفداك أعداك
نايف: هيا افلحنا للمزرعه قبل يخرج عمي ف ينفضنا.
————————————-
وبكذا انتهى اليوم بسفر العم فيصل وبناته وهدوء المزرعه استعداداً للنوم

ومن بكره الصباح الكل صاحي وهذي قوانين بيت ابو مقرن
ام مقرن بالحوش تشب النار للفطور ومنيف كالعاده يزهب قهوة ابوه قبل يطلع دوامه اللي من فتره ساحب عليه.
والبنات بالمطبخ يشيلون ويحطون .
قمر بكسل: يالله احس باقي فيني نوم
ريم: وانا وربي ودك نرقد لين شوي؟
جمانه: وش ودك نرقد والله محد يرقد ويخليني لحالي
قمر: شدعوه جوجو بس فطور
جمانه: لا جوجو ولا هم يحزنون مانيب قاعده وحدي.
حوريه: خلاص أنا أساعدك
ريم: فديت مرت الأخو الكفو
جمانه: مابترقدون وبسسس
قمر: ياعديمة الرحمه معد اشوف
جمانه: قلت لكم ناموا بدري ابيه بيصحينا محد طاعني.
نوره وهي تقطع البصل لامها: ياجمانه اهجدي أنا وحوريه معاك خليهم يرقدون شوي.
جمانه بضيق : طيب لو أنا م خليتوني
نوره: إلا بنخليك وانتي لك بكره ابشري.
حوريه: يلا روحوا ساعه وبصحيكم عشان عمي لو سأل عنكم.
قمر: الله يسعد قلبك الحلووو يلااا.
راحوا وبقوا جمانه ونوره وحوريه بالمطبخ إلا باب المقلط يدق.
مقرن: ححوارري
جمانه وهي تضرب كتف حوريه: العب ياحوارري
نوره: والله يحق لها هالدلع.
حوريه: ادخل مابه حد.
دخل مقرن وكالعاده مبتسم وخص بالابتسامه حبيبة القلب
جمانه: اخسي يامقرن ، دلع وحركات.
نوره: وانتي شعليك .
مقرن وهو يمسك أطراف اصباع حوريه : حواري وحياتي وكلي وربي
نزلت راسها حوريه بسحى من دلع مقرن لها اللي في كل مره يخجلها.
جمانه بغمزه: علينااااا الخجل ياحوريه
مقرن: بعدي عن مرتي، ويلا امي تبي المواعين .
حوريه: زين بس اطلع يمكن عماتك يجون المطبخ.
نوره: تغار ياربيييي.
حوريه بضحكة: لا بس فشله.
مقرن: يلا حاضر طالع بس استعجلوا لا تبطون.

————————————————
عند منيف اللي وصل دوامه والشغل لين فوق راسه قلب الاوراق و رفع سماعة التلفون: جيبوا لي الجندي فلاح مسرح ال مقدم
: سم طال عمرك.
رجع يقلب ف الأوراق ورسايل البريد: لعنك الله لو امسك عليك زله يافلاح.
الملازم ع الباب: بعد إذنك أنا ريان ومعي الجندي فلاح ال مقدم
منيف: ارحب حياك
دخل الجندي ورجع ريان
منيف: عرف بنفسك.
تقدم فلاح يدق تحيه ويعرف بنفسه: جندي اول فلاح مسرح هفوان ال مقدم.
منيف: وصلني خبر تطاولك على الرقيب سعيد ال فهيد.
فلاح: م حصل طال عمرك.
منيف وهو يضرب المكتب وهو يكره المراوغ: فلااااح، اخلاقي اليوم لك عليها وانا بعد لك عليه ،طالع خمس دقايق بس وراجع اجلس مع نفسك ابي ارجع واحصل علم الوكاد وان تبين لي تكذب دفنتك بأرضك.