لا تنشد المشتاق وش فيه مَا نام
رح وأنشد اللي غاب وشلون نايم .
...........................
الماضي .
بأحد ايام الصيف الحارقه جالسين قدام بعض و فوقهم شبك الغنم ويلعبون بالحصى احدهم بال 14 من عمره والاخر اصغر منه بال 12
ضحك لما خويه رماها فوق وطاحت على راسه وتألم :- قلت لك ارمها بس مو بقوه
تنهد ورماها بعيد عنه وتكتف يناظره وابتسم لما سمعه يضحك ويرمي اللي بيده بدوره
تنهد وهو يناظر ابو صديق عمره واقف ويرعى الحلال بالشمس ذي :- ابوك ما يتعب ؟
التفت يناظر ابوه وابتسم :- لا ابوي قوي ما يتعب بسرعه متعود
سمعوا صوته وهو يقرب منهم :- يلا ياعيال قوموا بدخل الغنم ترتاح
وقف ونفض ثوبه وهو يبتسم لابوه :- ابشر يبه يلا ساجي قوم
ناظره ساجي وتكتف وهو يرفع حاجبه :- انا ماني ولدك عشان تقول لي يا عيال
توتر وناظر ابوه اللي شد على يده وتنحنح يناظره :- طال عمرك بدخل الغنم
همهم ساجي و وقف ونفض ثوبه وناظر خويه اللي خرج من الشبك بخطوات سريعه
لحقه يمشي وراه لحد ما دخل بيت الشعر الصغير ودخل وراه :- زعلت الحين انت ؟ جدي قايل لي اقوله كذا مب انا
جلس وبدا يجمع الحطب وهو متجاهله تنهد وقرب يجلس جنبه وناظره :- غريب انت تعرف جدي لازم اطيعه اذا كنت ابي اكون الشيخ
ناظره غريب وهز راسه و وقف يمسكه من يده :- طيب روح لا يشوفك احد هنا ويعلمه
همهم ساجي و وقف يناظره قبل ما يحك راسه بتوتر :- عيونك لونها من لون الغروب
ابتسم غريب وناظر وراه وعيونه على الشمس اللي بدت تغرب ورجع يناظر ساجي بعيونه العسليه الفاتحه
تنحنح ساجي ومشى خارج من البيت قبل ما يوقف وهو يسمع غريب :- عيونك لونها من لون الليل
ابتسم ساجي ولا التفت له واسرع بخطواته لخيمه جده الشيخ بما انه كل ليل يتجمعون عنده
تنهد غريب ورجع لداخل ورتب فراشه و فراش ابوه
خرج من بيت الشعر وقرب من الزير وشرب مويه وعيونه على ابوه اللي قرب منه وتكتف يناظره :- وينه راح ؟
هز راسه ونزل الطاسه اللي بيده ومسح فمه :- يبه بترقد هنا اليوم ولا عند الحلال
ابتسم ابوه وقرب يمسح على وجهه وباس حبينه :- لا يبوك بروح للحلال وحده من ناقات الشيخ تعبانه انت صك البيت وخلك هنا
التفت بيمشي بس وقف وناظره :- ابو ساجي ما رجع من مرواحه ؟
ناظره غريب وهو مبتسم :- بيرجع بكره يبه
