قابل للكتمان (كاملة) لـ خديجة السيد من (سلسلة رجل شرقي منقرض)

الفصل الخامس عشر ج (2)

فصل بتاريخ : ٢٤/٧/٢٠٢٤

#روايه_قابل_للكتمان 
من سلسلة رجل شرقي منقرض

⁦✍️⁩#بقلم_خديجه_السيد 

الفصل الخامس عشر 
_________________

زمجر شاهين بشراسة من بين أسنانه المطبقة بقسوة

=ما تحترم نفسك يالا مين ده اللي صايع! ازاي اصلا تكلمني بالطريقه دي فلوسي وانا حر فيها اعمل اللي انا عاوزه بيها، انت هتنسى نفسك ولا ايه انت شغال عندي زي اي عامل تاخد فلوسك على الجزمه وتسكت وما لكش دعوه بالباقي؟ ولا مفكر عشان سايبك تدير كل حاجه هتفكر نفسك صاحب الوكاله بجد وانا اللي شغال عندك

ظل منذر بمكانه عدة لحظات بجمود وهو يتطلع له باعين مظلمة ممتلئة بالغضب العاصف قبل ان يرد بانفعال ظاهر

= انت إللي ما تنساش نفسك ولا ابنك! الوكاله دي من غيري ما تعرفوش تدوروها وانا اللي كبرتها وكبرت الشغل وطورت كل حاجه فيها
وانت بقيت في الفتره الاخيره زيك زي ابنك تيجي تاخد الفلوس على الجاهز من غير ما تتعب وتشقى، اوعى تفكر ان ساكت ضعف لا كنت بقول معلش ابويا في الاول وفي الاخر وكلمته تمشي غصب عني لكن لما توصل انك تاخد شقيه، وتروح تشتري لابنك بيه عربيه عشان يتمنظر بيها قدام صحابه وانا كنت بحوش الفلوس دي بقيلي شهور كثير عشان أعمل مشروع تبقى لا بقى وكفايه أوي لحد كده انا استحملت اللي ما حدش يستحمله.

في تلك اللحظه انفتح الباب على اثر الاصوات العاليه، وتقدم معاذ وخلفه زوجته وهم قد استمعوا إلي بعض من الحديث، تصلب جسد شاهين فور سماعه كلماته تلك بينما اشتعل بداخله غضب عاصف غمغم بحدة وهو يضغط على فكه بقسوة

= هو إيه اللي استحملته هي فلوسك واحنا إللي شغالين عندك ولا إيه، انت هتصدق نفسك وتخيب انت من غيري ولا حاجه

تقدمت والدته التي كانت تتابع الموقف من بعيد ولم تتحمل تطاول منذر علي والده وهي تقول بتوبيخ حاد

= هو في حد لعب في دماغك ولا ايه؟ مالك بتكلم ابوك كده ليه ما تحترم نفسك و مالك داخل شايط في الكل كده ليه

نظرت إليها ضحي التي دخلت من باب المنزل أثر الأصوات لكن لم ترد عليها إنما انشغلت مع حاله منذر وهي تطلع له بقلق وخوف، بينما تحدث معاذ مغمغماً بحدة و نفاذ صبر

= ما تهدي يا منذر و خلينا نحل المشكله بالراحه هو انت ايه اللي مضايقك في كل ده، يا سيدي خلاص انا مستعد ارجعها طالما حته العربيه دي اللي عامله المشكله

اقترب منذر من والده ولم يهتم لأحد غيره وهو يهتف بشراسة وغضب و قد بدأ يفقد السيطرة على غضبه فكل ما يحدث يضغط على اعصابه و قوة تحمله

= عاوز تعرف مستحمل ايه! مستحمل من اول ما إبنك الحيله عرفت انه تعبان وعنده القلب وانا عمال اتنازل واقدم تضحيات مش مفروض عليا؟ بلاش تلعب اللعبه دي عشان اخوك ما يتعبش حاضر؟ بلاش تكمل دراستك وكفايه عليك لحد كده عشان اخوك بيرجع من المدرسه تعبان و زمايله بيضربوه حاضر؟ عينك تبقي عليه علي طول ولو حصله حاجه حتي لو هو اللي غلطان انت اللي هتتعاقب مكانه؟ ما هو عيان وما ينفعش يحس ان اقل من غيره لكن انت تنفع تحس وتتعاقب و تتضرب وتاخذ بالجزمه وتتعب وتشقى وما تفتحش بوقك.