أنتي الفُـؤاد ومَا حَـوىٰ

« ١٨ »

~ بعد ايام , يوم خطبه جارح وسديم , بيت أهل سديم ~
ناظرت سديم بشكلها وهي مُعجبه في شكلها , التفتت لنجوى اختها اللي فتحت الباب وهي تنطق : سنه يا اختي , بيجون بعد نص ساعه
ابتسمت سديم : شكلي حلو؟
ناظرتها نجوى وهزّت راسها بالإيجاب ونطقت : تهبلين!
تأففت سديم : متوتره مره
ضحكت نجوى : بتكتبون الكتاب وبيشوفك من حقّك تتوترين
غمز لها نجوى : بس حلو وفوقها فارس
ضربتها سديم بكتفها بخفّه تنطق : طايحه من عينك حتى انا فارسه
مشت لنجوى للباب وهي تنطق : انتظري هنا يالعروسه
طلعت نجوى وهي تضحك وعضّت شفايفها سديم بتوتر ..
~ قصور آل طالب ~
جلس سهّم وهو يناظر بطن ليال البارز وهو حاسب ان ولادتها بعد شهرين , ناظر بفستانها الوردي والبرتقالي , ألوان الصيف المنعش , التفتت له وابتسمت تنطق : شكلي عاجبتك؟
ضحك سهّم ورفع راسه ينطق : عاجبتني وبس؟ الا جايبه راسي
ابتسمت تتقدم له ونطقت : ماش ماعجبتني المدحه
رفع حاجبينه يضحك ووقف ياخذ اغراضه وهي اخذت عبايتها وطلعوا , ناظروا جرّاح الواقف عند السياره ونطق سهّم وهو يضحك : آسفين لك ياجرّاح
هزّ راسه جرّاح بالأسف ينطق : صار لي ساعه انتظر , اخو العريس التوأم اللي اكبر منه بسبع دقايق انتظر ساعه
ضحكت ليال : ذليتهم على السبع دقايق
جرّاح : لازم احلل هالسبع دقايق
التفت سهّم للباقين ونطق : تراه يحش فيكم
متعب : ماعليه اخذنا حسناته
فتح عيونه جرّاح بصدمه ونطق : كذّاب , شكيت همومي لهم بس طلعوا خونه
طبطب جارح على كتف جرّاح ونطق : إنت تستطيع
ركبوا السيارات يتوجهون لبيت أهل سديم , نزلوا كلهم يدخلون البيت , التفتت ليال على بكاء راكان ونطقت : ولدك ذا فشلنا ما امدانا ندخل حتى
وجدان : تعالي سكتيه معي
اخذت نوال راكان وهي تحاول تسكته , سكت راكان يتأمل وجه نوال وضحكت وجدان : معجب بعمّتي
ابتسمت نوال ونطقت : امشوا فشله اكيد الناس ينتظرونا داخل
دخلوا البيت وهُم يسمعون ترحيب ام سديم حصه , جلسوا ونطقت حصه وهي مبتسمه تناظر البنات : عرفينا على بناتك
ابتسمت نوال : ماهُم بناتي بس اعدهم مثل بناتي , وجدان وهي زوجة غيّاث بِكري وبِنت أخوي عبدالعزيز , وليال بِنت متعب اخوي الصغير
هزّت راسها حصه تبتسم : ماشاءالله ماشاءالله
رفعت وجدان راكان وهي تنطق : وهذا الكتكوت حفيدها
ضحكت حصه تاخذه منها وهي تنطق : يازينه , تشوفونه دكتور إن شاءالله
ضحكت ليال تهزّ راسها بالنفي : يبونه عميد مثل ابوه
ابتسمت نوال : وين عروستنا ؟
حصه : بتنزل شوي
هزّت راسها نوال وهي تستمع لسوالف حصه ..
~ مجالس الرجال ~
بعد السلام والسؤال عن الأحوال , ابتسم متعب يشوف ابو سديم خالد امامه ينطق : احنا جاينك يا ابو سديم طالبين نسبكم , نطلب يد بنتك سديم لولدي جارح
ابتسم خالد وهو يناظر جارح : والله نسبكم ينشري بملايين , وجارح رجّال وسمعته وسمعة أهله سابقته , وانا معطيه بنتي وانا مرتاح بأنه يصونه
هزّ راسه متعب : ماتقصر ياخالد ولو نجي نوفيك بالمدح مانقدر
عضّ شفته غيّاث يشوف جارح المتوتر يعدل شماغه , التفت خالد وابتسم ينطق : عرفونا عليكم , نتعرف على نسايبنا اكثر
ابتسم غيّاث : انا غيّاث اخو جارح الكبير
سهّم : وانا سهّم ولد عبدالعزيز واصير نسيب عمّي متعب
ناظره جرّاح يهمس : غيّاث يحشر اسم راكان بكل سالفه وسهّم يحشر نفسه بكل سالفه فيها اسم ليال
قرصه سهّم بدون لا احد يلاحظه وتآوه جرّاح بهمس وهو يرقص سهّم , ضرب كفه سهّم وهمس : لعنه الرجّال يناظر فيك ينتظر تقول اسمك
ابتسم جرّاح يتعدل : انا جرّاح اخو جارح التوأم والأكبر منه بسبع دقايق
ضحك خالد ونطق : مين أعقل إنت ولا جارح؟
جرّاح : اكيد جارح مايبي لها تفكير
ضحكوا عليه على جملته ونطق خالد : الكُبر مايفيد لو مافي عقل
التفت جرّاح على سهّم وهمس : كأنه يسبني ولا انا غلطان؟
هزّ راسه سهّم يهمس : لا إنت غلطان
دخل الشيخ وجلسوا خالد وجارح حوله , ابتدأ الشيخ بواجبات الزواج على الزوج والزوجه , انهى كلامه بالصلاة على النبّي ~ صلّوا على النبّي ~ التفت الشيخ على جارح ونطق : وقع ياجارح
ابتسم جارح ياخذ القلم يوقع تحت اسمه , وقف يسلّم على العيال وهو يسمع مباركاتهم له وطقطقتهم عليه , التفت لخالد اللي نطق : تعال وراي ياجارح
مشى وراه وهو ياخذ نفس , يعد الثواني لـ لُقائها وهي حلاله , دخل المجلس وجلس ينتظر , اخذ نفس بتوتر يعدل ساعته ورفع راسه من سمع صوت كعبها وابتسم من شافها امامه تحت سقف اهلها حلاله , تقدمت له سديم ووقف جارح امامها ونطق : هو صحيح إنتي حلالي؟
هزّت راسها تجاوبه وتقدم يقبّل جبينها ينطق : مبروك علينا يافارستي
رفعت راسها وابتسمت سديم : الله يبارك فيك يالجارح
ضحك من نادته بلقبه واخذ علبه البدل ينطق : تلبسيني وألبسك؟
ابتسمت تهزّ راسها بالإيجاب وفتح العلبه تشوف دبلتها المُرصعه بالألماس , رفعت كفها واخذه يحتضنه بكفه يلبسها دبلتها , رفع كفها يقبّله وابتسمت سديم بخجل يعتري على ملامحها , رفع كفه واخذ دبلته تلبسه وابتسم جارح يغمز لها وهو ينطق : باخذك اليوم نطلع على آخر الليل
طلع من المجلس وضحكت عليه ومشت ترجع للبنات , صرخت وجدان من شافت دبلتها وهي تنطق : قلت لك ياليال شاري دبل
جلست سديم ونطقت : بسم الله شفيكن تهاوشتوا؟ وايه شاري دبله
هزّت راسها ليال بالنفي تنطق : لا لا ماعليك ماهي هوشه شيء روتيني عندنا , بس جارح كان يقول لنا انه ما اشترى ذبله وكنا نخمّن
ضحكت سديم ونطقت نجوى : الحين اللي قبل شوي كان روتيني عندكم؟ طمنتوني لقيت ناس يتهاوشون اكثر مني انا وسديم
ضحكت وجدان : لا تشوفين غيّاث وجرّاح وسهّم , اكثر ناس تتهاوش ويستغربون لو هاوشوهم عمّتي نوال وعمّي متعب
نجوى : الحين زوج سديم جرّاح ولا جارح؟ ضعت بينهم كيف تفرقون بينهم
ليال : لا زوجها جارح اعقل واحد فيهم , جرّاح اهبّل واحد فيهم وصح انهم توأم ونسخ لصق بس ترا في فرق بملامحهم
هزّت راسها وجدان تنطق : جرّاح بس شنب والأكبر وليّته الأعقل , اما جارح العاقل له شوارب وعوارض
اخذت نفس براحه نجوى ورجعت ظهرها لورا : الحمدلله بعيش مرتاحه وانا متطمنه على اختي ماتضيّع بينهم
ضحكوا البنات واخذت نفس ليال تمسح دموعها بالمنديل اللي بجانبها , التفتت وجدان للبنات تنطق : اقولكم شيء عن سهّم وليال؟
ابتسمت نجوى تعضّ شفتها : ترانا نحب العلوم!
ضحكت وجدان ونطقت : سهّم وليال كانوا يحبون بعض من كانوا بزارين وكبروا وهُم يحبون بعض وسافر سهّم للشمال خمس سنوات ورجع ويوم رجع هِمام خطب له ليال وهُم مايدرون!
صرخت سديم ونطقت : اخخس ليال كنتي هيمانه!
رجعت ليال شعرها بنرجسيه لورا وهي تنطق : طبعًا!
نجوى : ماعليكم من اسألتي الفاهيه والفضوليه بس مين تزوجتوا؟
رفعت وجدان يدينها تأشر على نفسها وهي تنطق : انا وجدان اخت سهّم وبِنت عبدالعزيز واصير زوجة غيّاث اللي يصير اخ جارح
ضحكت نجوى تنطق : يا اختي قلنا مين تزوجتوا ماقلنا عرفوا على انفسكم , بس صراحه حلوين
ابتسمت ليال تقلد وجدان ؛ انا ليال ماعندي اخوان ولا خوات وبِنت متعب واصير زوجة سهّم اللي يصير اخ وجدان
وجدان : وضيفوها عليها عشيقة السهّم اخوي
شرقت سديم اللي كانت تشرب قهّوتها وهي تسمع وجدان , فزّت وجدان تضربها على ظهرها بخفّه تنطق : مسكينه كانت بتموت سلفتي
ضحكت نجوى وهي تمثّل الحده : هي لا تدعين على اختي ولا بدعي على ولدك ذا الصنم
ابتسمت سديم : بعدين وجدان ليه تفضحينها مسكينه
وجدان : اتركيهم يوم كانوا بشهر العسل اتصلت عليهم ويناظرون بعض واجد وقلت لهم ولا تنسون تبوسون بعض إذا قفلتوا ولمّا رجعوا من السفر كانت حامل
صرخت ليال : كذّابه! حمّلت بعدين
طبطب سديم على ذراع ليال تنطق : بصير معك حزب ضدها ونصير اقوياء
ابتسمت ليال تبعد يد سديم عن ذراعها وهي تنطق : حبيبتي اتركي ذراعي لأنه منطقه حساسه وممكن اكسر يدك
ضحكت سديم وناظرتها وجدان : تراها هي وسهّم مايحبون احد يمسك ذراعهم ولا كتوفهم فانتبهي منهم
كمّلوا سوالفهم على هذا النمط مابين الضحك والطقطقه ..
~ مجالس الرجال ~
طلعوا العيال بعد ما تعشّوا ورفع يده متعب ينطق : اكرمك الله يا ابو سديم
ابتسم خالد ينطق : عاودوا الزياره يا النسايب
ابتسم غيّاث يهزّ راسه : إن شاءالله
طلعوا من بيته يوقفون عند السيارات ينتظرون البنات يطلعون , طلعوا البنات وكل واحد ركب السياره , التفت غيّاث من ركبت وجدان وبيّدها راكان ومسك كفها يرفعه ويقبّله , ابتسمت وجدان تنطق : اليوم الخطبه خياال!
هزّ راسه غيّاث ينطق : الله يوفقهم
ناظرته وجدان : بيسوون زواج؟
غيّاث : ايه وحددوه بعد شهرين
رفعت حاجبينها وجدان : اوف! وقت ولادة ليال
عقد حجاجه غيّاث : مب هي بالتاسع؟
ضحكت وجدان : مضيّع باقي لها شهرين
غيّاث : الله يسهل لها ولأسرار
ابتسمت وجدان تهمس : آمين
وقف غيّاث عند الكوفي بعد مده وعقدت حجاجها وجدان تنطق : ليه جينا؟
ابتسم غيّاث ينزل ويفتح بابها ونطق ياخذ راكان منها : وش تاريخ اليوم؟
وجدان : ما اعرف ليه؟
مسك كفها ودخلوا الكوفي , ابتسمت وجدان من شافت الترتيب البسيط وناظرته ترفع راسها : كنت ناسيه تاريخ اليوم!
ابتسم غيّاث يقترب منها ونطق يرجع شعرها لورا : كل عام وإنت حبيبتي وزوجتي وروح قلبي وأم راكان
ابتسمت وجدان : وإنت بخير ياحبيبي
جلسوا على الطاولة واخذ غيّاث راكان يحطه على الكنبه عشان مايصحى , ناظرت وجدان بالورد الأحمر اللي امامها ورجع غيّاث يجلس ونطق : تعشيتي ولا نحلّي؟
ابتسمت وجدان تنطق : نحلّي
وقف غيّاث يجيب الحلا وناظرته وجدان مبتسمه , حط الحلا على الطاوله ورفع وجهها بيّده يقبّل ثغرها , ضحكت بوجدان بوسط تقبيله وهي تنطق ؛ يعني تحلّي عليّ؟
هزّ راسه غيّاث يبتسم : ليه لا؟
صب لها من القهّوه وهُم يستمعون لسوالف بعض بكُل حُب ..
~ قصور آل طالب ~
نزلوا من السيارات وهُم تعبانين , كل واحد مشى لغرفة نومه ينهي ليلته الا سهّم , فتح الدولاب ياخذ ادويته وانسدح بعد ما اكلها , تمددت بجانبه تناظره وهمست : متى بيروح هذا المرض؟
التفت عليها بعيونه وهمس : لمّا انسى كل شيء عشته
تنهدت ليال وغمضت عيونها , رفع كفه يبعد شعرها عن وجهها ونطق : تقدرين تشفيني
فتحت عيونها وابتسم سهّم : إنتي دوايّ
ابتسمت بخفوت ورفعت راسها تدخل بحضنه وهي تنطق : وإنت القوّه اللي استمديتها لي
قبّل راسها وغمض عيونه يبدأ يغرق ببحر هواجيسه , متحمس لبنته القادمه أسرار , ينتظر جيّتها بلهفه وحماس , مايقدر يوصف حماسه بـ كلمه او جمله , فقط ينتظر أعظم هديه من ربّ العالمين له ولـ ليال ..
~ آخر اللّيل , غرفه جارح ~
طلع من غرفته من تأكدت ان القصر كله نايم , ركب سيارته وحرّك لبيت خالد , وقف عند بيتها واخذ جواله يتصل عليها , التفت من ركبت ونطق بابتسامه : حيّ الله حرّم الجارح
ابتسمت سديم وهمست : الله يحييك
حرّك السياره جارح ونطق : تعشيتي؟
هزّت راسها بالنفي ونطق يبتسم : ابشري فيني
ابتسمت بخفّه ووقف عند مطعم بعد مده قصيره , نزلوا ومسك كفها يدخلون , جلسوا على احدى الطاولات ينتظرون طلبهم , اخذت نفس بربكه تشعر بتوتر معه , ابتسم جارح ونطق : ليلنا طويل يا الفارسه
رفعت راسها سديم تنطق : قولي عن حياتك
ضحك بخفوت وهزّ راسه : ابشر بقولك عن حياتي , إنسان عايش تحت ظلّ امه واخوانه وعائلته بشكل عام , كنا نعيش تحت حكم جدي القاسي وفقدنا جدتي بسببه وصارت لنا احداث كثيره بسببه وبسبب اعماله , جينا للريّاض نبتعد عن الديره وعشنا حياة هنيّه , وقتها قررت بأني ادخل الفروسيه ودخلت , بس ما دريت اني بصادف أغلى شيء صادفته
ابتسمت سديم بخجل لأنها يقصدها وكمّل جارح وهو مبتسم : حققت كأس عالمي ولكن حققت شيء احلى
اشر على دبلتها ونطق : كسبتك
رفعت كفها تثبته على كفه وهمست : لأنك صادق بحُبك لي , كسبتني برجولتك
ابتسم جارح ورفع عيونه للنادل اللي جاب طلبهم , اكلوا وهي تسمع سوالفه ولا تقدر تشاركه تخجل منه , ركبوا السياره وحرّك ينطلق للوجهه اللي يبيها , التفتت عليه بإستغراب : مب طريق بيتنا , بنروح مكان ثاني؟
هزّ راسها بالإيجاب ووقف عند المربط الخاص فيه , نزلت وراه وهي مستغربه المكان , دخلت معاه وسرعان ما ابتسمت من شافت الأدهم وخيلها المهره بجانب بعض , رفعت عيونها للوحه والمكتوب فيها ~ مربط آل طالب للفروسيه ~ ابتسمت وهمست له : لك؟
ابتسم جارح : او بالأصح لنا
مشى يدخل غرفه الملابس يبدل ملابسه وطلع ينطق : بدلي ملابسك عشان نركب الخيول
دخلت تغيّر ملابسها وطلعت له بعد ما انتهت , شافته بالميدان يركض مع الأدهم وتقدمت تفتح الباب تدخل الميدان , وقف يتعب من ركضه مع الأدهم ورفع راسه جارح ينطق : تعالي
تقدمت له سديم وركبت الأدهم وهي تدعي بداخلها انه ما يركب معها , لكن خاب كل ظنونها وركب خلفها على ظهر الأدهم , اخذت نفس بتوتر من ألتصق صدره بظهرها وسحب جارح اللجام يمشيّ الأدهم , ركض بهم الأدهم وضحكت تنطق : ما تعرف تتحكم بالخيل يا الفارس
جارح : تشوفين يا الفارسه
وقف الأدهم ونزل هو ونزلت وراه , وقفت امامه وتقدم يرفع يدينه لخصرها وهمس : اسمحي لي
ناظرته يتقدم يقبّل ثغرها أولى القُبل بينهم , يذوق عنبّر ثغرها ويحييّ قلوبهم باللّحظه هذي اللي بترسخ بعقولهم للأبد , بين الخيل يسقط رايه الهزيمه لقلبه , اشرق عليها بقُبله منه وانمحت اوراقه امامها تعرف نيّته الحقيقه ويكشف عنه لها , اشرقت شمس المحبه عليهم وارسلت لهم ضوء الحُب , هبّت سحّابه ديمه تحييّ جفاف ارضهم .
ابعدت عنه تطلب النفس , مسكت كتوفه تتنفس بصعوبه , فتح عيونها مع زمن فتح عيونها , صدت عنه تخجل ومشت تدخل غرفه الملابس تبدل ملابسها , عضّ شفته يناظرها تمشي امامه , رفع راسه للنجوم وضحك يستوعب إندفاعه لها , مسى يبدل ملابسه وناظروا بعض من طلعوا بنفس الوقت , ابتسم جارح ينطق : نمشي؟
هزّت راسها تهمس : ايه
مسك كفها ومشوا لسيارته يوصلها لبيتها , رجع للقصور وهو يسمع سندباد الأغاني يقول : عظيم إحساسي ومن الشوق فيني شيء ما ينقال , وَفقير الحُب قدّام اللي بين ضلوعي لك شِلته , أحبّك كثّر ما تسرّي بشراييني وتجي على البال , وكثِر ما في خفوقي لك كلام ما بعد قلته
وقف سيارته وقفلها يدخل القصر , انسدح على فراشه على مابدل وهو مبتسم , يعيد اللحظه بباله كل ما خطرت بعقله , غمض عيونه يستلم للنوم ينهي ليله سعيده ..
~ العصر ~
نزل جرّاح للصاله الملكيه وهو يدندن : القوس قوسك والسهّام سهّامك
سكت من ناظر سهّم وغيّاث واقفين امام التلفزيون ونطق : شفيكم انتوا؟
التفت سهّم ونطق : نضبط التلفزيون عشان مباراة الهلال والنصر
دق تحيه جرّاح وهو ينطق : عاشوا بنشوف مباراة الزعيم
دخل جارح وبيّده الرسيفر ونطق وهو يضحك : العايله كلها هلاليه اكيد بتشوفها
جلسوا كلهم بعد ماضبطوا التلفزيون ونطق سهّم : كمّل الأغنيه اللي بأسمي
ناظره جرّاح : اقول سرّ
دخلت نوال تسلّم وجلست تنطق : هاديين اليوم ما لكم حسّ
غيّاث : اليوم جمعه , هجدنا الإيمان
انفجر سهّم يضحك وهو ينطق : الا جارح طول عمره هادي
ابتسم جارح : العقل نعمة
ناظرهم غيّاث ينطق : كل ما جيت افكر في التوأم اقول كيف جو بنفس البطن
ابتسمت نوال : معجزه
سكتوا العيال والتفتت نوال على سهّم وغيّاث تنطق : البنات بيروحون للسوق قالوا لكم؟
عقد حجاجه سهّم ونطق غيّاث : قالت لي وجدان
نزل عيونه سهّم لإتصال ليال ونطق يرفع راسه : هذي هي تتصل
قفل الإتصال ورفع راسه يشوفها داخله , سلّمت شفهيًا وجلست بجانبه , ابتسم سهّم وهمس : بتروحين للسوق؟
هزّت راسها بالإيجاب : بروح مع وجدان نقضي لأسرار
هزّ راسه سهّم : خذي بطاقتي واشتري السوق كله لها
ضحكت ليال بخفوت وهزّت راسها : وام وأسرار ما لها بطاقه؟
همس سهّم : ام أسرار لها العيون والخفوق
ابتسمت ليال تصد عنه وهي مبتسمه , دخلت وجدان تجلس وناظرتهم نوال تنطق : مب بتروحون السوق؟
هزّت راسها وجدان : الا بنروح , تروحين معنا عمّتي؟
نوال : لا تعبانه شوي
عقد حجاجها ليال تنطق : سلامتك وش فيك؟
ابتسمت نوال : بس رجولي تعورني , علامات الكُبر
ابتسم غيّاث ينطق : بس ام غيّاث ما تكبر
نوال : نضحك على انفسنا بهذا الكلام
ضحك الجميع على جملتها ونطق جرّاح : صحيح يا أمي , ام جرّاح ما تكبر
هزّ راسه جارح يقلدهم : ام جارح ما تكبر
ضحك سهّم : غصب كل واحد يحط اسمه
رفع حاجبه غيّاث : انا الأكبر المفروض اسمي يكون كنيّتها
جرّاح : اقول كلنا عيالها ما في الأكبر والأصغر
عضّ شفته جارح : شرايكم نلعب كوره على ما تجي المباراة؟
نطقوا العيال كلهم بنفس الوقت : تم
وقفوا العيال يلبسون شورتاتهم ويروحون للملعب يتفقون على الأفرقه , رفع يده جرّاح : انا وسهّم فريق
ابتسم سهّم : تم
التفت غيّاث على جارح ونطق : اجل انا وابو فارس
صرخ جرّاح : اقععد يا ابو فارس! متى صار هذا الأسم مب كان ابو صارم
ابتسم جارح ينطق : هو اختار انا مالي دخل
جرّاح : اجل انا ابو ايش؟
سهّم : ابو سهّم
ابتسم جرّاح : على انك نشبت لي عشان اسمّي ولدي عليك بس ابشر
رفع صوته سهّم ينطق : عاش أبو سهّم عاش!
ضحك غيّاث : خل نبدأ الشوط الأول
تفرقوا العيال يبدأون اللعب ..
~ الصاله الملكيه ~
وجدان ناظرت ليال ونطقت : نروح الحين؟
هزّت راسها ليال بالإيجاب : ايه
ابتسمت نوال : روحوا انتم انا ماني رايحه
ابتسمت وجدان : على أن كنا نبيك تجين بس مب مشكله
وقفت نوال : انا بروح اجلس اشوف العيال وانتم روحوا
هزّوا روسهم البنات ومشت نوال تروح للعيال بالملعب , راحوا البنات يلبسون عباياتهم ونطقت وجدان تعضّ شفتها : اعترف اني متحمسه نروح السوق
ضحكت ليال : إنتي تبيها من الله راكان ماهو معك
وقفوا يركبون السياره , توقفوا عند المكان اللي يبغونه ونزلوا يغوصون ببحر ملابس الأطفال , رفعت ليال فستان صغير جدًا ونطقت : ناخذ ذا
ابتسمت وجدان : وه يناسو يالحجم!
حطوه بالسله وناظرت وجدان بدله لشخصين صغار , وحده لبِنت ووحده لولد , التفتت وجدان تنطق : باخذ ذي لراكان ولأسرار
هزّت راسها ليال تلتفت وهي تختار أنواع الملابس لأسرار , ألوان كثيره وموديلات كثيره واكسسوارات جميله تناسب حفيده آل طَالب , جلسوا لكوفي بعد ساعتين بتعب وناظرتها ليال تنطق : خلصنا كل شيء؟
وجدان : حتى إنتي اشترينا لك
وقفت ليال ونطقت : باخذ هديه لسهّم ولنا
وقفت معها وجدان تنطق : غرت باخذ هديه لغيّاث
مشوا لاحدى محلات الهدايا , التفتت ليال لوجدان تنطق : باخذ ميداليه ثلاثيه إنتي؟
رفعت كتوفها وجدان : معرف , شاوريني
عضّت شفايفها ليال تنطق : خذي شيء لغيّاث وراكان نفس الشيء , مثلًا قلم او اللي يحطونه بـ الكُم
هزّت راسها وجدان بالنفي من جاتها فكرة اخرى : لا لا جتني فكره , آخذ شفنير
ابتسمت ليال تهزّ راسها : حلو حلو
مشت وجدان تختار شفنير وطلعوا من المحل بعد ما حاسبوا , ركبوا السياره يرجعون القصور وبيّدينهم أكياس قد شعر راسهم , نزلوا البنات ونزل السواق ياخذ اغراضهم ودخلوا القصر الرئيسي , سلّموا شفهيًا وناظرت ليال العيال تنطق : مين فاز؟
ضحك جرّاح : اوه طافك صارت اشياء كثيره وكانوا غيّاث وسهّم تكه ويتصافقون
ضحكت وجدان : غيّاث وسهّم صراحةً ما استبعد انهم يتهاوشون!
ليال : وش صار؟
حَكى لهم جرّاح اللي حصل قبل ساعات ..
~ قبل وقت , الملعب الخارجي ~
انتهى الشوط الأول بسلام , بدأ الشوط الثاني وسرعان ما صرخ غيّاث ينطق : غش غش جالسين تضيّعون جارح من المرمى!
رفع كتوفه سهّم ينطق : ما لنا دخل إذا فريقكم فاشل
غيّاث : فريقنا يلعب بدون غش!
تقدم سهّم ونطق : وين الغش بالموضوع دام اننا نلعب بإحترافيه؟
هزّ راسه غيّاث ينطق : نشوف الإحترافيه
كمّلوا لعب وانتهى لعبهم وصرخوا سهّم وجرّاح بفوزهم على غيّاث وجارح بثلاثه صفر , اخذ غيّاث الكوره يصفقها برأس سهّم نوع من أنواع المزح وضحك سهّم يهزّ راسه : تذكرت الثانوي!
ضحك غيّاث : ويوم انطردنا من حصه البدنيه عشاننا تصافقنا
جرّاح : الله يشفيكم قبل شوي كنتوا تكه وتتصافقون والحين تتذكرون الثانوي
دخلوا القصور وكل واحد راح ياخذ شاور ..
~ الوقت الحالي ~
ضحكت وجدان تنطق : غيّاث حتى لو كوره لازم يقلب الموضوع جد
غيّاث : وش اسوي لازم افوز بكل شيء
ناظره جرّاح : الحياة فوز وخساره
ضحك سهّم : يعني قايل حكمه؟
التفت جرّاح لسهّم : ابلع لسانك
ابتسم سهّم يرجع ظهره لورا ونطق : ما وراك اختبارات يوم الأحد ورا ما تذاكر؟
شهق جرّاح : حشى شعرفه ذا باختباراتي!
ابتسمت وجدان : سهّم اللي مايخفى عليه خافيه تبي ينسى جامعتك؟
ضحك سهّم ونطق جرّاح : الله يرزقني ذاكرته
كمّلوا سوالف على هذا المنهج ما بين المزح والطقطقه ..
~ آخر الليل ~
صرخوا العيال من فاز الهلال وضحكت وجدان من كسر جرّاح كوب الشاي اللي بيّده واتجهه يضرب سهّم وهو يصرخ , ضحك سهّم يبعده عنه ونطق : يا اخوي كسرت ظهري وانا للحين ماشفت عيالي انثبر
ضحكت نوال تنطق : استانسوا بس لا تطقون بعض
تقدم جرّاح لانه ونطق : يمه اخطبيها لي بسرعه
صرخوا غيّاث وسهّم بنفس الوقت ينطقون : ادععس يالعاشق!!
هفّ جرّاح على شعره ونطق : شعرفكم بالحب يا جاهلين المحبه
انفجر غيّاث ينطق ويأشر عليهم : احنا جاهلين محبه يا ابو اسرار؟
هزّ راسه بالنفي سهّم : طبعًا لا , اخوك اعمى حب
ابتسمت نوال : نخطبها لك لمّا تعقل
جلس جرّاح يتكفت وهو ساكت وانفجروا يضحكون عليه , جارح : يعني الحين عاقل؟
هزّ راسه جرّاح وابتسمت ليال تنطق : لا تكفى جرّاح تكلم وذبّ عليهم ما عندنا احد يضحكنا
رفع حاجبينه جرّاح : شايفتني مهرج حضرتك ام العزّ؟
وجدان : ضعت بين بالألقاب حددوا لقب واحد
سهّم : كلها واحد يختي
التفت عليهم جرّاح : انتم اسكتوا بسمع ردها
ابتسمت ليال : للأسف شفتك مهرج بدال المهندس , ضحكني واتوسط لك تتزوج
كشر جرّاح : يعني مثلًا مثلًا بتكونين المأذون؟
ضحكت ليال وناظرهم سهّم ينطق : اجل لمّا تضحّك ليال بقول لخالك متعب نخطب لك
جرّاح : اقول سرّ بس ضحّك زوجتك منها تكسب أجر ومنها تزوّجني
رجع غيّاث ظهره لورا ونطق : يالخوي بنزوجك بس اثقل
صرخوا التوأم ونطق جرّاح : نسينا الصواني؟
ابتسم جارح يعضّ شفته : الحين يقول كنت مدوام وجيعان اكيد باكلها
ناظروهم بإستغراب ونطق سهّم : وش سالفة الصواني ذي؟
عضّ شفته جرّاح يكبح ضحكته : بنعلمك بعدين
هزّت راسها وجدان تنزل عيونها لراكان تنطق : الله يشفيكم ويرزقكم العقل
أشر جرّاح على جارح ينطق : الا جارح هو الوحيد عنده عقل
ضحكت نوال وهي تنطق : وانتم عندكم عقول بس ماتستخدمونها
هزّ راسه سهّم : صدقتي ياعمّه
رفع حاجبينه جرّاح : شوف مين يتكلم!
اخذ سهّم كوب قهّوته اللي امامه ينطق بسخريه : عقلت لأني بتزوج
التفت جرّاح على ليال وهو يهزّ راسه بالأسف : آسف لك ليال يبي يتزوج وإنتي بتولدين , صدق الرجال مايملى عينهم الا التراب
ضحك غيّاث ينطق : هدف عكسي يالطيّب
وقفت نوال تنطق : الوقت تأخر ومب تسهرون وترا بكرا بنجهز لزواج جارح
هزّوا روسهم وكل واحد راح لغرفة نومه ..
~ بعد مرور شهر , ليلة المقابله لزواج جارح ~
جلست ليال بتعب وناظرتها وجدان : ادعي كل شوي انك ماتولدين بايّ لحظه وإنتي مجهزه كل شيء
تنهدت ليال تغمض عيونها تنطق : تكفين اسكتي ما عندي شملكه اولد بايّ لحظه اهم شيء افتك من ذا التعب
ابتسمت وجدان تنطق : لو ولدتي بتنسين تعب الحمل كله وتعب النفاس
فتحت عيونها ليال من دخلوا غيّاث وسهّم يسلّمون , ابتسم غيّاث ينطق : شكل محد متحمس مثلي للزواج , اخيرًا زواج لنا بعد سنتين من بعد زواج سهّم
هزّ راسه سهّم : ايه ايه افرح جاء زواج وبتعرض لين تقول آمين
رجع ظهره غيّاث لورا ينطق : جارح وينه؟
ابتسمت وجدان : من بيت عمّي خالد للقصر , بس راح للريتز كارلتون يشوف الأوضاع
هزّ راسه غيّاث يوقف ونطق : بروح انام اجمع طاقة لردح بكرا
ضحك سهّم ومشى غيّاث يطلع للقصر الشرقي , التفتت وجدان على سهّم ونطقت : شريت لها بطيخ ولا نسيت؟
رفعت ليال اصابعها تهدده : سهّم لو ماجبت بخليك تطلقني
ضحك سهّم وهزّ راسه : جبت جبت وكثرت هالمره عشان العامل قالي جاب دفعه كبيره , شكله طفش مني من كثر ماجيته اسأله عن البطيخ
ضحكت ليال ونطقت : شكرًا تعبتك معي يالمحامي بس ترا مب مني من بنتك
ابتسم سهّم : يفداها
ناظر سهّم راكان اللي جالس ووقف ياخذه يرفعه للأعلى وهو ينطق : ولد العميد اليوم كمّل ثمان شهور
ضحكت وجدان : ايه نسيبك اليوم كمّل ثمان شهور
نزله سهّم وهو يضحك : يعني إنتي وغيّاث متفقين انه نسيبي غصب؟
هزّت راسها وجدان بالإيجاب : لازم
ناظرتهم ليال تنطق : طيّب يمكن أسرار ما تبي ولد العميد؟
وجدان : بنسوي مثل ما سوى هِمام
ضحكوا سهّم وليال ووقفت ليال تنطق : يلا أم ولد العميد نامي عشان ما يروح عليك الزواج بكرا
رفع يده سهّم ينطق : نستأذنكم أم راكان
ابتسمت لهم وجدان ومشوا لقصرهم , ناظرها سهّم ونطق : بكرا تدخلين التاسع؟
هزّت راسها بالإيجاب وهمست : مب مستعده للولاده
تمدد بجانبها سهّم ونطق : افاا ليه؟
رفعت كتوفها ليال بعدم معرفه ونطقت : ودي اغمض عيوني وافتحها احصلني ولدت
ضحك سهّم ورفع كفه على بطنها , انحنى يقبّل بطنها وهو ينطق : تحس فيني؟
ابتسمت ليال : مدري , بس ترا اليوم كل شوي ترفس
ضحك سهّم بخفوت ورفع كفه على بطنها مره ثانيه ينتظر أسرار تصدر ايّ حركة , ناظرت وضعه ليال وهو ساكت ينتظر ايّ إشاره ونطقت : لا تحاول
ابتسم سهّم ونطق من حسّ بحركة أسرار ونطق : بعدي بنتي اللي تحسّ بابوها
ضحكت ليال ورفعت راسها تقبّل خده اللي كان قريب منها جدًا ورجعت ظهرها على ظهر السرير , رفع اللحاف ونطق : تصبحين على خير يا أم أسرار وأسرار
ابتسمت ليال وهمست : وإنت اهله يا أبو اسرار
غمضت عيونها تفكر بزواج غدًا الضخم واللي كل الناس يتكلمون فيه ولا بدأ ..
~ العصر , الريتز كارلتون ~
ضحكوا العيال على جرّاح اللي توّه صاحي من النوم وجاي من القصر ونطق غيّاث : لو مكمل نومك احسن
هزّ راسها بالنفي جرّاح : لا كنت انتظر عزيمه منكم عشان اجي
ضحك سهّم وهو مستند على المرايا ونطق : طردك عمّي متعب مره ثانيه عشان قلت له بتخطب ولا هالمره صار شيء غير متوقع؟
جلس جرّاح ياكل من التمر ونطق : هالمره سكت ولا قال شيء بس يناظرني , لو كلمته مره ثانيه بيصفقني اتوقع
صرخ جارح ينطق : هي اخلصوا بيأذن المغرب ولا جهزت وانتوا قلبتوها مجلس الديره
وقفوا كلهم يجهزونه ويعطرونه ويخبرونه , جهزوا كلهم وآخرهم سهّم اللي شخّص شماغه ونطق جرّاح : خلونا نصور
هزّ راسه غيّاث ينطق : يلا قربوا
تجمعوا كلهم حول بعض وأخذ جرّاح جواله يصور صورة جماعيه , شافوا الصور ونطق جارح : اقولكم شيء؟ تذكرت خطبه سهّم
ضحك سهّم ينطق : اوه اللي مرّ عليها سنتين ونص!
ابتسم غيّاث : الأيام تركض امس جيت من الجوف , يا سرّع الأيام
ابتسموا كلهم وتفرّقوا يطلعون , طلع سهّم للحديقه ياخذ نفس , ما يعرف ليه تذكر امه وابوه وجدته واختنق , رفع راسه يمسك عنقه يشتنق الهواء , نزل راسه من نزلت دموعه يبكي , يبكي لأنه فعلًا مشتاق لهم , وده يرجعون للدنيا ولو دقيقه يقولهم اخباره , يبشرهم بكل خبر مُفرح صار له , وده يحضنهم ويشتنق ريحتهم , أمنيته الوحيده لهذي الدنيا , التفت لمتعب اللي حط كفه على كتف سهّم يعرف شعوره , رفع ذراعه يحضنه يبكون شوقًا لنفس الشخص , عهد و عبدالعزيز و دلال اللي احنّ الأشخاص بهالدنيا , بكى سهّم على كتف متعب ومتعب تنزل دموعه وسهّم يسمع شهقاته , شعور الشوق للميّت مُميت , اخذ نفس سهّم يبعد عن متعب يدخل دورة المياه , غسل وجهه ورفع راسه يشوف وجهه المحمر بسبب بُكاءه , نزل شماغه وعقاله يغسل وجهه ورجع يشّخص من جديد , ابتسم وناظر نفسه بالمرايا , يشوف نفس الشخص اللي يبكي قبل شوي , لكن تغيّرت ملامحه من ابتسم , طلع وناظر غيّاث اللي نطق : وينك اختفت فجأه؟
هزّ راسه سهّم بالنفي : لا بس طلعت لسيارتي , كنت مضيّع جوالي
ناظره غيّاث يهزّ  راسه بعدم تصديق وهو يشوف إحمرار عيون سهّم , صد عنه غيّاث وناظر الفرقه اللي دخلوا يرفعون اصواتهم بكُل مكان , ابتسم جرّاح ودخلوا كلهم للصاله الواسعه يبدأون بالعرضه النجديّه , ابتسم سهّم من بين غيّاث وجرّاح يردد معهم : نجد شامت لأبو تركي واخذها شيخنا , واخمرت عشاقها عقب لطم خشومها , لا بكت نجد العذيّه تهلّ دموعنا , بالهنادي قاصرين شوارب قومها , حنّا هل العادات مخضبين سيوفنا , والطيور الحاميه جادعين لحومها , صّعبه أفعالنا لا بغاها غيرنا , وكلمة التوحيد حنا عمّار رسومها .
ابتسم جارح من بينهم وهو يلعب بالسيف ويردد وهُم يرددون وراه مع الفرقه , يستخدمون عاداتهم حتى لو ما كانوا بديّارهم , استمرت الأغاني الشعبيه السعوديّه تصدع بالمكان تحت سقف آل طالب
صرخوا العيال من دخل متعب يعرض بسيفه وتقدم امامه غيّاث بسيفه ,
~ قسم النساء , قبل وقت ~
ناظرت ليال شكلها بالمرايا وآخر اضايفتها للبسها , نزلت عيونها لبطنها الكبير ومسحت عليه بكفوفها تبتسم , رفعت راسها تاخذ جوالها تلتقط لها كم صوره مع بطنها البارز , دخلت وجدان وابتسمت تنطق : عمّتي نوال تدورك تقول اخاف ولدت
ضحكت ليال ونزلت جوالها تاخذ عطرها وهي تنطق : شدعوه كلكم خايفين عليّ اولد بنُص الزواج , ماعليكم مارح اولد
وجدان : يختي كلنا نبيك تولدين
ابتسمت ليال وهزّت راسها : اجل بولد الحين دامكم تنتظروني اولد
هزّت راسها وجدان ونطقت : امشي عمّتي نوال تقول شوفيها وين وانزلوا
نزلوا البنات وناظرتهم نوال تبتسم ونطقت : ماجت العروسه؟
ابتسمت وجدان تهزّ راسها: الا جات قبل شوي
وقفت نوال تنطق : بروح اشوفها , تجون؟
وقفت معها وجدان وهزّت راسها ليال بالنفي تنطق : لا لا انا تعبانه ومافيني حيل امشي كثير , بشوفها إن شاءالله بالزفه
ابتسمت نوال لها تنطق : المشي زين للولاده
ضحكت ليال بخفوت ومشوا نوال ووجدان يطرقون الباب , فتحت الباب نجوى وابتسمت من ناظرتهم ونطقت : ادخلوا حيّاكم
دخلوا واتسع ثغرها نوال تشوف كنّتها الثانيه وتقدمت تسلّم عليها وتبارك لها , سلّمت وجدان وغمزت لسديم تهمس : اخيرًا جاء زواجك وصرنا سلفات
ضحكت سديم بعزّ توترها وهزّت راسها لوجدان , ابتسمت نجوى تدور ليال بعيونها : ليال وينها؟ ما جات؟
وجدان : الا بس برا تقول تعبانه مافيها حيل تمشي
اخذت نجوى جوالها ونطقت وهي تطلع : بروح اشوفها واشوف الكروشه
ضحكت وجدان وطلعت نجوى لـ ليال , ناظرت نجوى ليال اللي ماسكه بطنها البارز وعلى وشك ولاده والتعب بوجهها , لكنها جميله بفستانها الأصفر وتقدمت نجوى وابتسمت تنطق : واه يالكروشه الصغنونه
رفعت راسها ليال وضحكت تنطق : ياعيوني تفداك الكروشه
جلست نجوى تنطق : لا بيطلع لي سهّم من تحت الأرض إذا سمع كلامك
ابتسمت ليال : لا ماعليك إنتي بوجهي
رفعت نجوى ذيل فستان ليال ونطقت : امشي بصور مع الأصفر
هزّت راسها ليال تنطق : لا تكفين نجوى تعبانه مره و..
قاطعتها نجوى توقف وتمسكها وهي تنطق : امشي معي , معك دكتوره عادي اولدك بنص الزواج وتحركي واجد الحركه لك كويسه
تنهدت ليال ووقفوا امام المرايا , ابتسمت ليال وغطت وجهها بيّدها وتصورت مع نجوى كم صوره , ابتسمت نجوى تطفي جوالها ونطقت : ياعيني على الصور البيرفكتو
ضحكت ليال ورجعوا يجلسون , ابتدأ زواج النساء بالرقص والأغاني والموسيقى , نزلت وجدان من البست وهمست لـ ليال : ماودك تجين معي نوقف وترقصين على الخفيف؟
تنهدت ليال ووقفت مع وجدان , مسكت يد ليال وابدت ترقصها على الخفيف واستجابت لها ليال بسهوله ترقص على الخفيف , ضحكت ليال من نطقت وجدان : يلعن بليسك ماعندك بطن كبير مثلي يوم كنت حامل
ليال : الدنيا حظوظ ياوجدان
ابتسمت نجوى وهي تنطق : صورتها عطوني رقم سهّم ارسله عشان ينهبل
رفعت ليال حاجبينها ونطقت وجدان : تكفين بتنهار الحين
مر الوقت وجاء وقت الزفه , اخذ جارح نفس بتوتر وناظر غيّاث اللي يوصيه وهزّ راسه يدخل غرفه العروس مع خالد , خطى خطوته وسمّى بالله ورفع راسه , شاف أمه وخالته وتقدم يسلّم عليهم , وقف امامها يناظر يصدق حلمه , مايعرف إذا هو حقيقه أو حلّم , لكنه مدرك أنها حلاله واسمها تحت اسمه , اقترب يقبّل جبينها وهمس : يقولون لي مبروك مايدرون ان عُمري متبارك بك!
ابتسمت ترفع راسها بخجل وناظرته مبتسم , تقدم خالد يربت كتف جارح يوصيه على أغلى بناته وبِكره وجارح يطمنه بالكلام , وقفوا امام الممر ومسك كفها يطمنها بوجوده ويخفف توترها ولكن ما يدري انه سبب توترها , انفتح الباب واعلنوا الزفه الآن , مشى بها امام الحضور وكأنها أعظم إنتصاراتها , ولو نال كل الجوائز والذهب والألماس يبقى فايز بقلبها , وقفوا عند الكوشه وتقدمت لهم نوال تدعي لهم وهي تناظرهم , ابتسم جارح ينطق : أمي ليه ماترقصين؟
كشرت نوال تنطق : أرقص وانا بهذا العمر؟ وش بيقولون الناس؟
مسك كفها يرقصها ونطق : امي وش علينا من الناس , خلينا نستانس ووريني رقصك
ضحكت سديم بخفّه وهي تسمعه , ضربته نوال على كتفه بخفّه وقبّل راسها وهمست نوال : الله يحفظكم ويويلك تحرج بنتي الجديده
هزّ راسه ومسك كف سديم يتلفت لها , طلعوا من الصاله وركبوا السياره بعد ما سمع توصيات اهله وخالد له ومشى يحرك للفندق , وصل ونزل يساعدها بفستانها ودخلوا جناحهم ، التفت لها ونطق : تبين عشاء؟ انا تعشيت تبغين إنتي؟
هزّت راسها بالنفي وهمست : اكلت مع البنات
هزّ راسه ونزل بشته وعقاله وشماغه وحطه على الكنبه وطلع من الغرفه , اخذت نفس سديم بتوتر ونزلت طرحتها تحطها بجانب بشته , جلست على السرير بفستانها تسهو , مر وقت طويل وهي الى الآم جالسه بفستانها فقط ورفعت راسها من طرق الباب ينطق : سديم؟
سديم : ادخل
دخل جارح وناظرها بفستانها يشوف عُري اكتافها , وأطراف شعرها المتناثر على اكتافها , تقدم لها ما يتحمل منظرها الجنوني امامه ورفع راسها بيّده وهمس : اسمحي لي
قبّل فاها وتسللت يدينه لظهرها يفتح حبال فستانها , يسكب الخمر بالخمر والوصَـل بالوصَل , تفجر قلبها من مشاعرها , تشعر بأن قلبها بيخرج من بين صدرها , يحسّ برجفتها بين يدينه , ويشعر بخجلها الدائم اللي يحبه , غمض عيونها وهي بأحضانه ينام بعد ليله مُخلده بذاكرتهم ..
~ الريتز كارلتون ~
طلعوا البنات بعد ماخلص الزواج وناظروا سهّم الواقف عند سيارته ويلعب بسبحته ويناظر الأرض ساهي وتقدموا له , ناظرته نوال ونطقت : وين الباقين؟
رفع راسه سهّم واعتدل ينطق : راحوا مع عمّي متعب وقالوا خذ البنات معك
ركبوا السياره وابتسم سهّم يناظرها من المرايا وغمز لها , ضحكت بخفوت والتفت سهّم عليهم ونطق بابتسامه : اعزمكم؟
ابتسمت وجدان : عزيمه ونقول لا؟ كيف تصير
ضحكت نوال تنطق : لا تكلّف على نفسك
هزّ راسه سهّم : مامن تكلّفه
وقف عند احدى الكوفيهات وطلب من الدرايف ثرو ياخذ لهم قهّوه , التفت لهم ونطق يمد لهم القهّوه ينطق : ما اعرف ذوقكم بس طلبت لكم على ذوقي
نوال : ما احب القهّوه ذي ياسهّم , جيب لي مويه
ابتسم سهّم : افا! ذوقي عشاني
هزّت راسها نوال بالنفي : ما ادانيها
اخذوا البنات منه القهّوه وطلب سهّم لنوال مويه , حرك للقصور وهو يسولف لهم عن تفاصيل الزواج , دخل القصور وطفى سيارته ونزلوا يمشون لكل واحد للقصر , تقدم سهّم لوجدان ولراكان اللي بيّدها يقبّل راكان ويمد فلوس بجيب راكان : هذا عشان البشت والشماغ اللي لابسه
ناظرته وجدان تنطق : سهّم! مايبي منك شيء والله , بكل مره تشوفه تعطيه
ابتسم سهّم يرفع راسه : ماسويت حقه
غمز لها ينطق : وإنتي اخذيها وخبيها لين يكبر
ضحكت وجدان ونطقت : تصبح على خير
دخلت وجدان القصر الغربي وحطت راكان بسرير بعد نانزفت ثوبه وبشته , ناظرت بغيّاث النايم بشورته وقللت درجة بروده المكيّف عشان لا يمرض , رفعت اللحاف تدخل فيه ورفعت راسها تبتسم تقبّل طرف ثغره بخفّه , ابتسم من حسّ فيها وهي داخله الغرفه ورفع ذراعه يدخلها بحضنه وهو يهمس : ماشفت كشختك بعلمك الصباح لو صحينا
ابتسمت وجدان : ماعليك صورت
ناظرها ونطق : ماصورتي معي , ماتحتسب
ضحكت وغمضت عيونها تدفن وجهها بعنقه تغمض عيونها ..
-

~ لا تنسون النجمه يا احبّتي❤️~