الفصل الثامن عشر
وضعت نهال الهاتف بعد المكالمة الحلم التي للتو اصبحت حقيقة وواقعا وعلى وجهها علامات الدهشة والسعادة والغرور بأنً واحد!.
حتى تحدث كريم وسألها بتعجب :
_ بيتصل بيكي ليه ؟!.
نظرت له نهال بغرور وهي تضيق عينيها بثقة مبالغ فيها :
_ ده الطبيعي إنه يتصل بيا! .. اللي مكنش طبيعي هو فراقنا الفترة دي كلها.
بدا على كريم شيء من السخرية وقال:
_ ما تثقيش أوي كده فيه .. أشهد شاهين عامل زي العقرب.
ردت نهال على سخريته بسخرية أشد :
_ مش مع نهال يا كيمو .. حبيبته الوحيدة ، وهفضل حبيبته مهما حاول يخبي وينسى .. بس مش هيعرف ينساني!.
ولاول مرة يقلق كريم من الثقة المبالغ فيها التي جعلت نهال بذلك الحد من التأكيد انه لا زال على حبها قائما .. وحذرها :
_ للمرة المليون هقولك متثقيش فيه أوي كده !.. عشان ثقتك دي هضيع اللي فاضلنا وهتودينا كلنا في داهية .. خلي بالك منه وافتكري حاجة مهمة، أنه دلوقتي متجوز وكان قالب الدنيا على مراته لما أختفت، وكان واضح إنه بيحبها .. يعني ما استبعدش أن المكالمة دي تكون فخ اصلًا.
استفزت نهال من كلماته التي تبتر آمالها ونهضت بعصبية وهي تقول وتشير إليه بتحذير:
_ أنا مش مراهقة ولا طفلة عشان حد يوقعني في فخ ويضحك عليا! ... واللي مخليني متأكدة كده هو أني عارفة أشهد وعارفة حبه وجنونه بيا، وده الدنيا بحالها كانت عارفاه أيام ما كنا مخطوبين .. محدش يحب الحب ده كله ويعرف ينسى !! .. وجوازته دي أصلًا كيد فيا، أصل مش طبيعي يحب ويخطب ويتجوز في اقل من اسبوعين !! .. وده غير الفيديو اللي اتبعتلي واللي هو بنفسه بيعترف فيه أنها مجرد جوازة هيخلص منها في اقرب فرصة .. اصدقك بقا ولا أصدقه ؟
فكر كريم لبعض الوقت ولم يجد أي شيء غير منطقي بحديثها، فقال بجدية :
_ طب هصدقك .. بس خلينا برضه نفكر بالعقل، أفرضي أشهد بيعمل ده كله عشان ينتقم منك وده بسبب حبه ليكي وغدرك بيه، يبقى برضه روحنا في داهية !.
ضحكت نهال ضحكة ناعمة مليئة بالخبث الأنثوي وقالت :
_ أنا هعرف أرجعه ليا أزاي وأخليه ينسى اللي فات .. المهم أنه أخيرًا فتحلي الباب من تاني .. والخطوة الجاية بتاعتي أنا.
ورغم ما قالته لم يطمئن كريم وقال :
_ أنتي حرة في نفسك وفي حياتك يا نهال .. أنما مش حرة في أملاك أبويا ومس هسمحلك تضيعي اللي فاضل .. وأن كنت وافقتك على خطتك ده مش معناه أنها عجباني، أنا بس محبتش أكبر المشاكل اللي بينا وأعقد الأمور أكتر ما هي!.
ضيقت نهال عينيها بمكر وسألته بشك :
_ سيبك من ده كله .. أنا ملاحظة عليك شوية تغييرات الفترة دي ! .. ده تأثير البت دي بدأ يظهر أهو !....
تعجب كريم مما قالته :
_ بت مين ؟
قالت نهال بغمزة وابتسامة خبيثة :
_ مرات أشهد .. أو بالاصح طليقته المستقبلية !.
أنت تقرأ
كسرة و ضمة و سكون ... للكاتبة رحاب إبراهيم حسن
Romanceجميع الحقوق محفوظة للكاتبة ممنوع النقل او الاقتباس كسرة وضمة وسكون ........ إهداء........ للقلوب الخائفة من الحب ..... إليكم هذه القصة .............. لتخافوا اكثر ..............................................
