بولاريس

اتوق للمسك

كان أغلى خلاَني ، وخلاَني

__

                           ( قبل 19 سنه من الان )

فتح عينه و ابتسم بكسل من طاحت عينه على باقة الورد المحطوطه على الطاولة وهو يتذكر حفلته اللي سواها له حبيبه امس ليوم ميلاده

التفت وراه ولا لقاه جنبه ، اعتدل و صار يتفقد الغرفه بعيونه ينتظر يلمح زوله بركن فيها بس كان المكان خالي بشكل موحش

تحرك بسرعه يسحب جواله يتصل على الرقم الوحيد الموجود فيه و كان لحبيبه ، صار ينفض شعره ينتظر يسمع صوته

: هلا مشاري

مشاري : حبيبي وينك ؟ صحيت ولا لقيتك جنبي وين رحت

: تعال لمكاننا بسرعه

عقد مشاري حاجبه من النبره اللي سمعها وقال : مشعل .. صاير شي ؟

مشعل : تعال و اقول لك كلشي

مشاري : مشعل لا تخوفني ...

قاطعه مشعل : مشاري لا تكثر حكي وتعال بسرعه

مشاري ارتخت ملامحه وهو يحس بدقات قلبه تزيد وهمس بـ ابشر وقفل ، استغرب مو بعادت مشعل يطلع ولا يقول له و يكلمه بطريقة جافه

بدل بسرعه و قلبه ما هدى و طلع متجه لمكانهم اللي شهد على قصة حبهم من بدايتها وصعد لسيارته

ربع ساعه طريق ولماً وصل شافه واقف قدام البحر يستناه ، ابتسم ونزل على الرمل يركض له ويحضنه من ورا وهو يقول : حبيبي ليه ما صحيتني معك ؟

التفت عليه مشعل و من شاف عيونه و ابتسامته صد عنه و مسك يده يمشي فيه ناحية الكرسي الخشبي يجلسه فيه و يجلس جنبه

مشاري : وش فيك حبيبي ؟

قالها بعدما شافه منزل راسه و ماسكه بين يدينه .. بس ما رد عليه

تنهد مشعل وقال : أنا .. أنا بتزوج يا مشاري

مقدر مشاري يمسك نفسه وضحك وهو يضرب كتفه ويقول : مشعللل عن المزح الماصخ قلي وش عندك؟

التفت عليه مشعل وهو يقول : وانا قلت لك .. بتزوج

تغيرت ملامح مشاري للحده وهو يقول : يعني جايبني لين هنا عشان تقول لي بتزوج ! ترا انا كلش مو بمزاج مزح الحين

وقف مشعل وقال وعينه على البحر قدامه : ولا أنا عندي الوقت عشان امزح معك

وقف مشاري قدامه وقال وهو عاقد حاجبه : انت منجدك تتكلم ! شنو بتزوج ذي وش قاعد تقول امس وش حلونا قاعدين نحتفل سوا الحين صحيت و فجأة يلا أنا بتزوج شفيك !

قرب منه مشعل وقال : حنا ما ينفع نستمر سوا .. أنا مو قد اللي بينا ..

قاطعه مشاري اللي انفعل وصار يقول بعلي صوته : انت سامع روحك وش قاعد تقول ؟ أنا ما عرفتك امس ولا اللي قبله أنا معك صارل لنا اكثر من 14 سنه الحين حسيت انك مو قد علاقتنا ؟ انت شايفني اهبل ولا بزر قدامك عشان تكذب علي بهالكلمتين