SR || Ongoing

13

එදත් වෙනදා වගේම ඉර පායලා තියෙන හරිම සාමාන්‍ය සිකුරාදා දවසක් . හැබැයි , ඒක රජයේ නිවාඩුවක් වැටිලා තිබුණ සිකුරාදාවක් වෙච්ච නිසාම වෙනදා නැති විශේෂත්වෙකුත් ඒ දවසට එකතු වෙලයි තිබුණේ . එදා දවසේ විශේෂත්වය කොහොම වෙතත් ඒක ස්වේන්ට නම් හරීම සාමාන්‍ය නිස්කලංක දවසක් වුණාට ධමීරට නම් එහෙම වුණේ නෑ

මොකද කියලා කිව්වොත් නිවාඩු දවස් වලට පස්ස පැත්තට ඉර එළිය වැටෙනකන් නිදාගන්න ජාතියේ ඩයල් එකක් වෙච්ච ධමීර අද වෙනදටත් වඩා කලින් ඇහැරෙන්න සිද්ධ වෙලා තිබුණා . ඇත්තටම ඒකට හේතු වෙල තිබුණේ වෙන කවුරුත් නෙවෙයි , ධමීරගේ දේවරාජ වලව්වේ නැවතිලා ඉන්න ස්වේන් සුදු මහත්තයා !

මීට සතියකට විතර කලින් ඩ්‍රින්ක් එකක් දාන්න ගිය වෙලාවක ස්වේන් එක්ක අල්ලපු ඔට්ටුවේ ප්‍රතිඵලයක් විදිහට ධමීරට දවස් හතක්ම එයා එක්ක ජොගින්' යන්න වුණා . ඉතින් , ස්වේන්ගේ ඔට්ටුවේ විදිහට එයාලා දෙන්නා උදේම නැගිටලා එකට ජොගින්' යන හත්වෙනි දවස අද වෙද්දි මේ මහා පාන්දර ගම වටේ දුවන්න යන්න වුණ එක ධමීරට දැන් නම් තිත්තම වෙලා ගිහිනුයි තිබුණේ

ඔට්ටුව දාපු වෙලාවේ ස්වේන් එයාගේ කන්ඩිශන්ස් කියද්දි ධමීර කිසිම විරෝධයක් නැතුව තමයි ඒ හැම එකකටම එකග වෙලා තිබුණේ . අනික , ධමීර හිතලා තිබුණේ ස්වේන් පොඩ්ඩක් දුර දුවලා ආපහු වලව්වටම එයි කියලා වගේ එකක්

හැබැයි , අවාසනාවකට ඒක එහෙම වුණේ නෑ !

පහුගිය දවස් හය පුරාවටම මහා පාන්දරින් ඇහැරෙන ස්වේන් මුලින්ම කරන්නේ පැය කාලක් විතර දොරට ගහලා ධමීරව ඇහැරවගන්න එක . ඊටපස්සේ ඔට්ටුව ගැන මතක් කරලා බලෙන්ම වගේ එයාව වලව්වෙන් එළියට ගන්න ස්වේන් නිදි මරගාතේ ඉන්න ධමීරවත් ඇදන් ජොගින්' කරන්න ගියා

ඒකත් පොඩි පහේ දුරක් නෙවෙයි !

හරියටම කිව්වොත් , ධමීරට ජොගින්' කරන එක තිත්ත වෙන තරමටම ස්වේන් එයාගේ ගේම් එක ප්ලේ කළා . කොහොමත් , ටෆ් ට්‍රේනින්' එකක් එක්ක හැදිලා වැඩුණු ස්වේන්ට ඒ දුර දුවන එකේ කිසිම අවුලක් නැති වුණත් ධමීරගේ තත්වේ නම් ඊට සහමුලින්ම වෙනස් එකක් වුණා