صلو على خير خلق الله 🤍اللهم صلى وسلم وبارك على سيدنا محمد 🤍
عند راية كانت مستغربه ف ايمن ما بعتلها شي مع انه المفروض الوقت هدا يكون نايض و في خدمته
هدى: راية بنتي
راية انتبهت لها: ها نعم عميمة
هدى : هاك ستفي الصواني اكيد قريب يوصلو
راية: تمام هي
ايات و جنة: صباح الخير😊😊
راية و هدى: صباح النور
ايات: كيف حالكم
هدى: الحمد لله اهو نستنو ف حنين و عمك مشي همام بيروح بيهم
جنة: به كويس الحمد الله على سلامتها
هدى: الله يسلمكم
ايات: اني خلي نمشي نوتي ل جدي و جديدة فطورهم و نجي
راية: تمام
و هدى مشت تنوض محمد و عبدو و ضياء
راية: حليلي تعرفي امس رعب مش طبيعي نحسابها الا ماتت🥲💔
جنة: ايييي تعرفي لين امس الليل ناضت عليا الحساسية من التوتر💔
راية: و تعرفي امس عمي و مرته قريب تعاركو ف المستشفى عمي فصل فصله قوية
جنة: احاااا علاش
راية: ما فهمتش الموضوع هلبا لاكن الي فهمته من كلام عمي انه عميمة هدى هيا السبب في مرضت حنين قالها كان انتي ما جبرتيهاش ع ولد اختك ره مصارش فيها هكي
جنة: كييف من ولد اختها حليلي كان ما قصده بتجوزها ل واحد من ولاد خواتها
راية: شكله هكي لانه من زمان خالت حنين ديما تقول ل حنين يا كنتي عساس تبصر عليها و شكله توا قلبوها جديات😃💔
جنة: حييي حييي يناري ع حنين اكيد ما تبيش لانه متحبهمش ولاد خالاتها🥲
راية: اسسس عميمة هدى جت
راية: شنو عميمة ناضو الولاد؟؟
هدى: اي كيف ناضو خلي نتصل ب همام نشوفهم وين حسيتهم عطلو
راية: ايي حتى اني حسيتهم عطلو هلبا 10:15 توا
قدام البحر و السمي مليانة غيوم ☁️🌊
كانت واقفه تشوف للموج و دموعها ينزلو بدون صوت، اصلا هيا فرحت انه مفيش حد جنبها بش تبكي على راحتها، بوها يتكلم ف التلفون اتصلو بيه الشركة و خوها مشي يجيب فطور
همام جي من وراها و دغدغها من جنابها
حنين نطت: خزي عليك همام خلعتني🙂💔
همام يضحك على منظرها:🤣🤣واااككك كان تشوفي منضرك
حنين ضحكت و هيا تمسح ف دموعها: تافهه😂
همام قرصلها خدها: توا بنخليك على راحتك و مانبيش نضغط عليك لاكن لما نروحو بتحكيلي كل شي و اني حنوقف معاك فاهمة😊
حنين: حاضر😔
عماد جاهم : شن تهدرزووو
همام: اسرار بين الأخ و اخته😃
عماد شاف ل حنين: اسرار عليا انييي🤨
حنين: يكدب عليك يا بابا قالي لما نروحو احكيلي و اني نوقف معاك
همام: حشيشتك انتي عاد ما تنبلش ف فمك فوله 🙂
عماد: بوها اكيد بتعاودلي تحسابها زيك كل شي ادير فيه من وراي انت و خوتك🤨
همام: اههه😅 اممم هي كولو اني جعان ره نبي نروح امي موتيه فطور ملكييي
عماد:🤦🏻♂️🤦🏻♂️🤦🏻♂️
عند صاحبنا الي بيموووت من الندم💔 كان مقعمز ف الكوخ يفكر كيف يراضيها و يخليها ترجعله لاكن ف نفس الوقت فاقد الامل لانه يعرف حنين عنيدة بكل و ديمه تسكر ف راسها على اتفه الاسباب يبال تكون مظلومه
تنهد تنهيده طويييله💔 على خشت ضياء
ضياء: ان شاء الله ربي يفرج🙂
احمد تنهد مره تانيه
ضياء: حسستني انك مترمل و عندك سبعه صغار🙂
احمد: ونبي سكرلي قراجك ماعنديش ليك خلوق😤
ضياء: تؤ تؤ تؤ معقوله اني ضياء خوك و صاحبك و ولد عمك و عشيرك و رفيقك و ضي عيونك تقولي سكر قراجك🦦💔
احمد: زمر اهو بيحل برادته هي🤦🏻♂️
ضياء : مدامه برادتي مضايقاتك حاضر يا حمودي تو نحل سخونتي المهم انت متضايقش🦦
احمد: الصبررررر اختك روحت؟؟
ضياء وقف بسرعه: اييي حي فكرتني اهو اكيد قريب يوصلو خلي نمشي نستقبلها
احمد: جاي معاك💔
