لـم ننتـه بعـد [ تكـملة ]

زيـف الهـوى ام لعـنة القصـاص _الفصـل 61_

في غرفـة المعيشة متلميـن على طاولة الفطـور ثلاثتـهم ، كملـوا الخدم وجدوا الطـاولة وانصرفـوا ، نطقت جلـنار : وجدوا رواحكم راح ترافقوني للشركـة ، لحفل الاعلان..

شافت داريـا فيها بسرعة : اكيـد انـا لا ..
جلنـار : انتي اول واحـدة راح ترافقني ، رجعتي فرد من العـائلة ، زوجة الوريث الوحيد لثروة بينيامين ، والي راح تجيبلو الي يورثو طبعا ، والاحسن تغيري ملامح الكـآبة والحزن الي على وجهك ، بدلما تبقـاي تبكي في غرفتك لازم تحاربي على زواجك...

كانت تشـوف فيـها باستغراب ، كيفاش تحكي هكذا وهي عـارفة كلشي اساسا ...
داريـا : لكـن انـ...
قاطعتها جلنـار : داااريـاا !!! اسمعي مني .. الخمول و التوحد في غرفتك ماراحش يجيبلك حتى نتيجة ، انـا وعدتك نوقف معاك وراح نوقف معاك ، لكن اسمعي كلامي ..

شافت روبي في داريـا بنظـرة ازدراء ، مازال تشوفها شبيـهة لديـالا وماعندهاش ثقـة فيها اطلاقا ، في نظـرها مثلها مثل اختها ، واحدة انانية عايشة على الابتزاز و التطفل و الاستغلال ، لهذا تزوجت خوها اساسا ...

روبـي بنبرة ازدراء : ههه اسمعي كلام حماتك مـدام داريا برصـالي ، مش هذا الي كنتي حاباتو من البدايـة !؟ علاش تحاولي تلعـبي دور البنت الفقيرة البريـئة المسكينة ، اللطيفة الي القط ياكل عشـاها !!

جلنـار : روووبي ؛!

استطردت روبي كلامهـا متجاهلة أمها : اساسا تزوجتي بخويـا فقط باش تحسني من وضعك وتخررجي من الفقر المدقع الي كنتي فيه ، مثلك مثل اختك تماما ! عايشين بالاستغلال ! غير انو ديـالا احقر منك ، حبت توصل بطرق ملتوية ، و انتي اخترتي الطريقة التقليدية ، فقيرة تتزوج غني باش تعيش في رفـ...

قاطعتها جلنـار وقت ضربت بيدهـا على الطاولة بكل قوتهـا : رووووبي !؛ احتترررمي نفسسك !! داريـا خووك الي عرض عليـها الزوااج !

لوات روبي شفـايفها ، تشوف فيها بنظرات احتقـار وتعالي ، في حيـن الاخرى ، اكتفت تشوف لصحنها وتلتزم الصمت ...

شدت روبي منديـلها ، مسحت فمها ووقفت : انـا اعذريني نطلع لغرفتي ... مانقدرش نحضر حاسة روحي تعبـانة ..
جلنـار بحـدة : روووبي !! هذا حفل اعلان مجموعتنا الجديدة كيفاش ماتحضريييش!!
روبـي : قلتلك تعـبااانة .. الحمـل متعبني !!

نسفت جلنـار من استمـرار هذا الكذبـة ، توجهت روبي لغرفتـها قبلما ماتسمع اي كلام ثاني...
جلنـار : بنت غبيـة !! [ رفعت صوتـها باش تسمعها] معنتـها ممنـوع تخررجي ! مش حابين وجع راس جديد مع خـوك بعـد الي صـرا اخـر مـرة !

#فلـــــــــــــــــــــــــــــاش_بــــــــــاك🔙🔙

بعدمـا كمل كلامـو مع داريـا ، نزل للصـالون لاقاتو جلنـار بلهفة ، حابة تعـرف واش صـرا بالضبط ...
جلنـار : حكيـتو؟!
شاف طـارق لسـاعتو : اكيـد.. روبي رجعت ؟!
جلنـار : مانيش فاهمـة واش من القلب عـندك ، خليت ختك عنـد واحد ثاني و مرتااح عادي وكأنو ماكان ولا شيء !
حط يديـه على خصـرو : اولا كانت غلطتك انتي لانك قلتي انـا نتكفل ونجيبها من فرنسـا ، ثاانيا مـاتياس ماهوش واحد وخلاص ، راه واحد من اقرب رجالي ليا وبمثابة صديق ليـا ، يعني عندي ثيـقة كبيرة فيه ومتأكد راح يحميها بروحو ، واخر شيء نتمنى عمرك تزيدي تدخلي في خدمتي او في اي شيء يخص روبي ..