ခမ်း

Title 27

အပိုင်း ၂၇

နန်း ရင်ကိုအစိမ်းလိုက်ခွဲလိုက်လေသလား မောင်ရယ် ...ရင်ဘတ်ပေါ် မောင်ပေးတဲ့စာလေးအား အသာပိုက်ကာ နန်း၏မျက်ရည်တို့က တားဆီး၍မရအောင် ဝေခဲ့လေပြီ..မည်မျှပင် ဝေးရမည်ကိုကြိုသိထားခဲ့လည်း တကယ်တမ်းဝေးရတော့မည်ဆိုတော့ နန်းရင်ထဲ အစိမ်းလိုက် သွေးရှင်ရှင် ကျသလိုပင်....

မြိုင်တို့မှာ နှစ်သိမ့်သောအားဖြင့် ထွေးပွေ့သော်လည်း အပူမီးတို့ဟာလှိုက်၍တက်လာခဲ့သည်။ မောင့်လက်ရေးဝိုင်းဝိုင်းတို့ဟာ နန်းတို့ရဲ့ ဆက်ဆံရေးအတွက် ေနာက်ဆုံးဆိုတာ သိလိုက်ရတဲ့အသိဟာ
နန်းနှလုံးသားတို့ကိုတင်းကျပ်ဆို့နစ်စေ၏..

ခင်ထူးတို့မှာလည်း ဤကဲ့သို့ဖြစ်မည်ဆိုး၍ အတန်တန်တားခဲ့ကြသော်လည်း ရှေ့ဆက်တိုးခဲ့သော ဒီနှစ်ယောက်အားအပြစ်မဆိုရက်တဲ့အပြင် သနားလည်းသနားသည်။ သူမတို့နှစ်ယောက်လည်း ကိုယ်တတ်နိုင်သလောက်ကူညီခဲ့ပြီးပြီမို့ မည်သည့်အရာတို့မှမတတ်နိုင်တော့သည့် ဤအခြေအနေတွင်ဘာဆက်လုပ်ပေးရမည် မသိတော့ပါ..အကယ်၍များ သူမတို့လုပ်နိုင်ခဲ့သည့်အရာများရှိလျှင်တော့လုပ်ပေးဖို့ဝန်လေးမိမည်မထင်ပါ..

...
မဂ်လာပွဲနေ့...

လူကြီးလူကောင်း များ၏မဂ်လာပွဲဟုအမည်ခံထိုက်သော ထိုမဂ်လာပွဲသည် တန်ဖိုးအကြီးဆုံး..အမြတ်ဆုံး ဂုဏ်အတင့်ဆုံးသောအရာများဖြင့်သာ စီစဥ်ထားသောကြောင့် ခန်းမတစ်ခုလုံးတောင်ပြောင်လင်းလက်နေကြသည်။ သတို့သား ဇောင်းမှာလည်း သူအမြတ်နိုးဆုံးသောမိန်းကလေးအား ပိုင်ဆိုင်ရတော့မည်ဖြစ်တာကြောင့် အပြုံးတို့ဟာရပ်တန့်၍မရပါ..နှစ်ဖက်သောမိဘများမှာလည်း လာသမျှဧည့်သည့်တို့အား အပြုံးပန်းများဝေဆာ၍ လှုိက်လှိုက်လှဲလှဲ
ဆီးကြိုခေါ်ယူကြသည်။

သို့သော် မျက်စိကျိန်း၍ မျက်နှာမလွဲနိုင်အောင်လှပလွန်းသောသတို့သမီး၏မျက်နှာတွင်တော့အပြုံးဟူ၍မရှိပါ...
စိန်ထည်စိန်ပွင့်စီချယ်ထားသော ရင်ဖုံး တန်ဖိုးကြီးပိုးထည်ပိုးမျှက်တို့ကို ရက်အတန်အကြာ ရက်လုပ်ထားသောထိုင်မသိမ်း တို့မှာသူမ၏အလှအပတို့နှင့်ပေါင်းစပ်လိုက်တော့ မြင်သူတို့မျက်စိမလွဲနိုင်ကြပေ..